الحلقة الأولى
أوقات في كتير أشياء غريبة بتكون عم تصير حوالينا ونحنا مو شايفينها.. لأنها بالأساس بتكون غايبة عنا وما بنكون ملاحظينها إلا لحظة لمّا نبدا نشعر فيها ! .. أشياء غامضة ما إلها سبب أو تفسير.. بتدفعنا للتفكير والتحليل المستمر وبتدخّلّنا بحالة من التوتر والشك والخوف.. أما الفضول فبكون الشعور الأكبر الغالب على كل هالمشاعر الملخبطة.. وبسببه بنحاول نكشف حقيقة هالأشياء من بعد ما نجرب المستحيل لنرتاح.. بس يا ترى قديش فينا نتحمل إذا الراحة طوّلت لتيجي والحقيقة كانت مخبّية جوا سرداب طويل وغميق ومجهول وما إله لا مخرج ولا منفذ ؟!.. بتذكر إنه كل شي كان طبيعي ومستتب.. لوقت ما أجت الليلة يلي كنا فيها رح نرجع على البيت.. بهالليلة تبدّل كل شي ونقلب من فوق لتحت.. كنت وقتها عم بضّب الشنطة وبحكي مع امي على التلفون.. بتسألني كيف كان شهر العسل ؟.. بجاوبها وبقلها أنا بقمة سعادتي ومبسوطة كتير.. هالأيام يلي مرّت كانت من أحلى أيام حياتي.. ربنا استجاب كل دعواتك والله بعتلي زوج أحسن من ما كنت متخيّلة.. بتضحك وبتقلي الحمد لله هاد يلي كان بدي ياه بس زوجك وينه أسلّم عليه .. بترك الشنطة وبفتح باب غرفة النوم وبطلع للغرفة التانية.. بشوف باب الشاليه مفتوح.. بحكيلها من شوي كان هون.. يمكن راح ينهي اجراءات الخروج.. بتحكيلي صوتك في شي انتي عنجد مبسوطة ولا بتحكيلي هيك بس لأتطمن!؟.. بقلها لا والله صدقيني مبسوطة.. بقفل الخط وبطلع برا الشاليه.. بتطلع عالناس جنب البحر وبدوّر عليه ما بلاقيه.. برجع مره تانيه لجوا وبسكّر الباب.. بكمّل ضب الشنطة وأنا بفكّر وبقول غريب ماقلي إنه طالع وباب الشاليه مفتوح.. كيف بنساه وهوه أصلاً بخاف عليه وما بتركني أطلع إلا معه.. بهاللحظة استغربت بالفعل.. تركت كل شي ورنيّتله.. كان رقمه مشغول.. فصلت ورجعت رنّيت.. بقي مشغول.. بعتّله محادثه وقلتله وينك ؟.. بس ما أجاني رد.. قلت يمكن أجاه مكالمة عمل لهيك اضطر يطلع.. كمّلت ترتيب وضب ملابسنا وأنا لسه متوترة.. سمعت صوت الباب فتح وسكّر.. ضحكت وقلت وأنا بدخّل الملابس بالشنطة.. اجاك مكالمة عمل مو هيك حبيبي ؟!.. بس أنا بخاف لحالي كيف بتطلع وبتتركني !!.. مو على أساس بتخاف عليه حتى من نفسي!.. الله يسامحك.. صبرّت ليحكي بس ما سمعت صوته.. قلت محمد ؟.. ليه ما بترد !.. انت يلي دخلت ؟.. قفلت نص الباب وصرت بتطلع من طرفه وأنا لسه بنادي عليه بصوت واطي.. ولأنه نحنا بتايلاند وفي ناس من كل الجنسيات برا عالشط.. وباب الشاليه مفتوح ومو مقفول بالمفتاح.. فأنا بهاللحظة كنت بالفعل خايفة !!.. مسكت التلفون وحاولت أرن مرة تانيه.. خطه مشغول!!.. وقبل ليقفل الخط بسمع صوت ناس بتصرخ برا.. فضولي بدفعني لأفتح الباب وأطلع.. بلاقي الباب مسكّر ومو مفتوح.. بستغرب وبطلع وبشوف في ناس بتركض.. بحتار مين بدي أسأل لأني مو قادره أصبر أكتر وأنا لوحدي.. بشوف ولاد صغار تنين بركضو.. بسألهم بلغتهم ليه الناس بتصرخ !؟..بحكولي في تنين لقيوهم مقتولين عالشط ودمهم مالي البحر.. بهربو لبعيد وبقرّب مني واحد من أمن السواحل بحكيلي بلغته.. الأفضل تدخلي لجوا لأنه الوضع صعب بالمكان هون.. في مجرم هارب الشرطة هلأ بتدوّر عليه.. بدخل أركض للشاليه وبسكّر الباب عليّه.. بتوتر وبحكي شو هالورطة !!.. رقم زوجي لسه مشغول وأنا الصبر معي نفذ.. مع مين عم بحكي كل هاد ووينه أصلاً !!!.. بتطلع حواليه مابلاقي شنطة الملابس.. والغرفة مرتبة بشكل غريب.. هاد مو ترتيبي.. في حدا معي يعني أو شخص دخل الغرفة بس طلعت !؟.. بوقع مني التلفون عالأرض.. وقبل لأشيله بشوف خيال عالحيط لشي عم يمشي ببطئ ورا ضهري.. وصوت شي تاني بوقع من ورا.. بلف راسي ما بشوف حدا.. إلا غرض صغير أسود بزاوية الغرفة عالسجادة.. مابقرّب وباخد تلفوني بهدوء وبتصل مع خدمة الشاليهات.. بلاقي الرقم مشغول!.. بتبقى عيني على الغرض الصغير يلي عالسجادة.. ومن بعد تركيز بعرف إنه مشط ملفوف عليه شي أحمر بشبه الشعر الخشن.. بفتح زوجي باب الغرفة وبدخل.. بحكيله وينك وين رحت!.. أنا عم برنّلك من ساعة وبضل يعطيني مشغول.. كيف بتتركني!.. حكالي كنت بنهي إجراءات الخروج.. مو انتي حكيتيلي رح تضبي الشنطة ؟.. طلعت دخنت سيجارة برا وبتذكر قفلت الباب.. حكيتله لأ انت نسيته!.. كيف بتتركني هون لحالي.. بحكو في تنين مقتولين عالشط ويلي قتلهم هارب وعم بلاحقوه.. الشنطة اختفت وأنا حاسه انه في حد دخل لهون.. خلينا نمشي بسرعة أنا خايفة.. لف وجهو جنب السرير وقلي بهدوء.. مايا.. الشنطة موجودة عالسرير.. صفنت فيه وقلتله يعني انا توهمّلي إنه في حد دخل الشاليه وأخدها من بعد كلام الولاد !!.. حسيته مرتبك ومستغرب مني.. حكالي سكريها وخلينا نمشي.. قلتله ليه بتتطلع عليه هيك!؟.. حكا لأنه أنا تلفوني هناك قبالك عند المرايه وما أخدته معي مايا !.. رحت بسرعة وأخدته لقيت الخط مفتوح عمكالمة صادرة !.. حطيت التلفون على أذني واستغربت من يلي سمعته.. قرّب مني وقلي شو في؟!.. حكيتله في صوت ضحك بعيد.. كأنه وحدة أو واحد.. مو عارفه بس في ناس عم تحكي وتضحك!!.. اخد التلفون وحطه على أذنه.. وقلي ما سمعت شي الخط قافل أصلاً.. شاف الرقم وقلي الرقم من تايلاند.. كيف هالشي!.. معقول انا يلي رنيت وتركته قبل لأمشي!!.. حكيتله كيف بتتركه! وكيف أنا ما لاحظت!! البلد هون صحيح حلوة بس بتخوف وكلها مجرمين.. كيف تركتني لوحدي وأنا شو صرلي!.. كان في مشط أسود عالأرض كمان ملفوف عليه شي قبل لتيجي وين راح ؟!.. استغرب مني وحكيتله.. أنا مستعدة للسفر.. شفته تطلّع عالساعه ونرفز وعصّب وقلي رح نتأخر عالطيارة.. نحنا أصلاً تأخرنا !!.. حمل الشنطة وطلع معي بسرعة.. شفت الشط كان فاضي برا والليل مخيّم عالمكان.. طلعنا بالسيارة لخارج المنتجع وفجأة وقفونا الأمن.. حكولنا اجراءات الخروج مو متممة!.. لازم تنهوها من جوا.. تطلعت بزوجي مستغربة وهوه حكالهم بنعتذر يمكن في شي ناقص.. رح ننهي كل شي.. شفته عصّب مره تانيه وأنا أول مره بشوفه هيك!! ماقدرت أسأله لأني استغربت من ردة فعله وعصبيته.. طلع من السياره من بعد ما صف بمكان آمن.. وحكالي مابطوّل عليكي شوي وبرجع.. حكيتله لا تتأخر أبداً.. بقيت بالسيارة متوترة وبحلل وبحكي إذا قلي إنه عمل إجراءات الخروج ليه الأمن ليحكو هيك.. يعني هوه وين كان !.. دخل عالسيارة.. كان غريب ومستعجل.. شد الستيرنج بسرعة وطلعونا الأمن.. حكيتله على قد ما انبسطت اسبوع كامل بهالمكان على قد ما دعيت اخلص منه بهالساعتين!.. كيف صار فجأة هيك ؟!.. للحظة حسيت نفسي نجنيت أو المكان يلي نحنا فيه صار مسكون.. انت ليه ساكت !؟.. قلي شو بدي احكي.. غلبوني بإجراءات الخروج وعصبت منهم كتير.. قلتله مو مشكله المهم خلصنا من المكان.. قلتله أنا جوعانة !.. حكالي في محل ضاوي من بعيد.. شكله مطعم !.. ما رح نقدر ننزل ناكل لأنه رح نتأخر على المطار.. رح أنزل أجيب ساندويش بسرعة وارجع.. خفت وقلت المنطقة مقطوعة لا تتأخر.. قلي رح أصف جنب المحل تماماً.. وصلناه وطلع فعلاً مطعم.. صاحبه اشّر لزوجي وقله ممنوع تصف جنب المحل.. لبعيد شوي.. في سيارات تانية كانت واقفة ورانا وواحد تاني دخل فجأة اخد مكان.. لهيك رجعنا لورا كتير.. والشارع كله كان أسود وانارة الشوارع خافتة.. حكالي مابطوّل.. طلع وأنا بقيت.. كان مستعجل ومنرفز.. شفت موبايله عالكرسي مع باكيت دخان.. عصبت وقلت نسيه مره تانية !!.. مرت دقيقه وأنا استنى.. بين نظرات على المحل وبين محادثات عم بكتبها مع صاحبتي نانسي.. بتسألني عن شهر العسل وأنا بجاوبها وببتسم بس بنفس الوقت متوترة.. وأنا لسه عم بكتبلها شمّيت ريحة ستيرنج السيارة..كان عليها عطر نسائي ما بعرفه !.. تلفون زوجي رن.. مسكته ورديت.. كان نفس الرقم يلي لقيته مفتوح عالخط ونحنا بالشاليه.. وهالمره وحدة عم تحكي وتقول.. حبيبي وينك!.. قفلت الخط وأنا حاولت ارنلّها بس كان الرقم مغلق.. حسيت نفسي ضايعة وسمعت جنب السيارة طقة كعب.. توهّملي انها هيه ! من بعد ماشميت ريحة باكيت الدخان وكانت كمان عطر!!.. هالشي ما اله غير تفسير واحد.. انه زوجي شاف وحدة بالوقت يلي نزل فيه يتمم إجراءات الخروج!!.. وهالريحة ريحة عطرها.. فتحت الباب بعصبية ونزلت.. السيارات ورا سيارة زوجي مظلمه وأنا ما كنت شايفه شي.. طقيت على شباك أول سيارة ما حد فتح.. والتانية كانت كمان مسكّرة لوصلت للتالتة.. سمعت طقة الكعب وفي خيال مرق بلمح البصر.. استدرت من ورا وتطلعت من الشباك.. فتحت باب السيارة ونزلت راسي بالظلمه.. شفت عيون بيضه بتلمع ولون أحمر قوي.. يلي شفته بعد تركيز هيه بنت شعرها أحمر وعيونها بيضه ووسيعه.. ماكان مبيّن الا وجهها لأنه المكان كان كحل أسود.. وانا بدي احكي معها شعرت بحدا ضربني على ظهري بإيده وصرّخ فيني وقلي.. كيف بتفتحي سيارتي انتي سرّاقة !!؟.. كان شخص عربي ومفكّرني بنت تايلاندية.. حكيتله لأ أبداً.. زاد صراخه وأنا حاولت أهدّيه.. شفت زوجي جاي من بعيد وبإيده كيس الأكل.. بحكيلي وين اختفيتي! مين هاد !؟ حكاله انت معها.. بدكم تخطفو ابني يلي نايم جوا السيارة وتسرقوني!.. تطلع فيه وقلي هاد مجنون.. حاول يهدّيه ويفهمه انه نحنا عرب ومو سراقين !.. بس ما فهم.. تركته يصرخ وزوجي شد ايدي ودخلني عسيارته وطلعنا بسرعة.. قلي ليه طلعتي !.. قلتله في وحدة رنت على موبايلك وحكت حبيبي!!.. احكيلي محمد انت بتعرف وحدة هون ؟!.. تطلع فيّه وصرّخ.. كنت رح أعمل حادث!.. شو صرلك اليوم!.. صار يفتش بالتلفون.. وقلي اخر مكالمة كانت منك.. سجل المكالمات كله منك!.. خدي تأكدي!.. تطلعت على السجل كان بالفعل كله مني.. حتى سجل المكالمة يلي سمعتها والخط مفتوح ماكانت موجودة.. سكتت وصرت باكل بدون ما اتكلم.. قلتله يمكن أنا تعبانه.. اسفه.. حكالي كلي منيح لأنه قدامنا سفر وبعرفك مابتحبي أكل الطيارة.. صرت بفكر وبقول أنا ما شفت ولد صغير بالسيارة أنا شفت بنت شعرها أحمر!.. والمشط يلي كان بالغرفة كان ملفوف عليه شعر أحمر.. نفس لون شعر البنت يلي شفتها !!.. وغير هيك أنا لسه شامّة ريحة العطر بالسيارة وعلى ايدين زوجي وهوه عم بحركها تجاه وجهي!!.. فتحت تمي لأسأله سبقني وقلي افتحي هون.. أشّر على صندوق السيارة الصغير جنبي.. فتحته وشفت علبة.. قلي هاي آخر هديه جبتلك ياها من هالبلد.. وبصراحة تعبت للقيت الريحة يلي ممكن تحبيها.. لأني عارف ذوقك صعب.. بس اظن جبت شي صح.. فتحتها وشميتها كانت نفسها.. بس كل هالشي ما بعّد شكوكي وسألته بشكل غير مباشر متى جبتها ؟!.. قلي مبارح !!.. قلت بيني وبين نفسي اذا مبارح كيف أجت ريحة العطر على إيده هلأ !؟.. والعلبة مسكرة ومحطوطه بصندوق السيارة !..في كتير شغلات كانت غريبة وتوّهتني!!.. معقول تزامن الأحداث تخربط بعقلي أو أنا تعبانة ومو مركزة وعم بتوهّم!!.. سلّم السيارة يلي استأجرها ووصلنا للمطار بتكسي.. كنت عم بتخيّل أشكال مضيفات الطيران نفس شكل البنت يلي شفتها بالسيارة.. كنت ببعّدهم بطريقة فظة وغريبة استغربها زوجي.. وصلنا البيت بعد تعب.. حاولت اتقرّب منه واعتذرله.. بعّد عني وقلي بنظرات جامدة.. أنا بعرف التنين يلي نقتلو عالشط.. وكنت موجود وشفتهم بنقتلو.. اذا حابه تضلي مرتي لا تساليني ولا شي عن الموضوع لأنه لو عرفتي سبب قتلهم وليه خبيت عنك رح تتدمر علاقتنا.. حكيتلك ليرتاح ضميري ونقدر نكمل حياتنا بس من هالليلة بدي تنسي كل شي صار !
الحلقة الثانية
تركني وراح نام بكل برودة أعصاب وكلامه رعبني.. كيف يعني شافهم بنقتلو وبعرف سبب قتلهم وبعرفهم بالأصل وما قلي!!.. كنت ضايعة وخايفة أفتح معه الموضوع يهددني بدمار علاقتنا يلي ما لحقنا نبدأ فيها لسه !.. طلع الصبح مع ليلة كانت من أصعب ليالي حياتي.. البيت يلي كنت مبسوطة فيه وتعبت وأنا أجهّز فيه من العفش لكل تحفة صغيرة حطيتها بزواياه.. صار عم بخنقني ومو طايقته.. صحي محمد على مكالمة من حماتي أميرة !.. وكنت سامعه صوتها العالي المزعج من بعيد وهيه عم تلومه وتعاتبه ليه ما اتصل فيها وقلها انه رجعنا من السفر.. برغم هلأ صحينا !!.. اعتذر منها واعطاني بالغصب أسلّم عليها.. كان مزاجي سيء بس ابتسمت ابتسامة كذابة وجاملتها وطلبت منا نيجي ونجيب الهدايا.. سكّرت الخط وقلتله شو جبتلها !؟.. حكالي في شنطة خاصة لأخواتي وامي.. فيها هدايا جبتهم الهم وقت طلعت أشتريلك العطر.. قلتله وينها بدي اشوفها.. منعني وقلي بصوت عالي هدايا عادية!!.. حكيتله خلص ما بهمني.. رحت حضرت الفطور وكان في غسيل بالكوم مو مغسول.. افطرنا واجاه مكالمة من صاحبه يوسف.. لبس بسرعة وطلع عالمكتب العقاري يلي بشتغل معه فيه.. ضبيت السفرة وفتحت الغسالة لأحط الغسيل.. وأنا عم بنفض الغسيل.. لقيت شعرة حمره على قميص زوجي الأبيض يلي كان لابسه ليلة مبارح.. بهاللحظة انتفضت واتصلت مع نانسي بسرعة وقلتلها تعالي لعندي بسرعة!.. ماكنت عارفة شو أعمل.. أنا شاكه فيه وبعرف لو شرحت لأختي أسماء ما رح تفهمني.. ولو قلت لأمي شفته بعيوني بخوني رح تقلي ما الك غير بيت زوجك شو ما عمل!!.. بقيت قاعدة والغسيل عالأرض.. اجت لعندي وقعدنا.. قلتلها متأكدة في وحدة تانية بحياته.. محمد بعرف وحدة.. كل الأدلة يلي شفتها بتأكد.. بس في شي صار مبارح أنا مو عارفة أستوعبه ومخي موقّف.. سألتني شو !.. قلتلها البنت يلي شفتها بالسيارة اختفت بلمح البصر برغم كان الباب يلي جنبها مسكّر.. والزلمه يلي ضربني واتهمني بالسرقة ما شافها أبداً.. كان بين كلامي معه ولفة راسي لنفس المنطقة أقل من دقيقة.. حكتلي يمكن طلعت من الباب وما شفتيها.. مو حكيتي انه كان كتير ظلمه!.. قلتلها صح بس أنا ما سمعت طقة كعب رجلها برغم انه كان كتير واضح اول مره سمعته.. الشعرة يلي لقيتها عقميصه نفس لون شعرها تماماً صدقيني!.. عدا عن المشط يلي اختفى من بعد ما اجا زوجي عالشاليه.. وكان ملفوف عليه كمان شي بشبه الشعر الخشن بنفس اللون!!.. لون شعرها مميز.. احمر ناري قريب من الأورانج وأنا أول مرة بشوف هيك شعر عبنت!.. ويادوب لمحت عيونها لأنه نص وجهها كان ممحي من السواد والظلمه.. فرجيتها الشعرة وشفتها قرفت من لونها وحطتها بعيد.. حكيتلها أنا خايفة من هالغموض ومن الشغلات التانية يلي قلي ياها مبارح !.. حكتلي شو قلك!.. ماقدرت أخبي وقلت عن التنين يلي نقتلو.. حكتلي زوجك مو هيّن.. انتي شو بتعرفي عنه غير الكلام يلي قلّك ياه بسنة الخطبة يلي خطبتو بعض فيها ؟!.. قلتلها عن اهله وشغله وشخصيته.. محمد كتير منيح صدقيني نانسي.. وكان شبه الملاك من وقت الخطبة ليوم العرس لشهر العسل كلّه.. بس بليلة مبارح تغيّر وتحوّل فجأة.. صار يعصب ويعلي صوته بدون سبب.. الصبح طلع بسرعة أول ماحكا معه صاحبه يوسف.. وحتى ما ودعني ولا سمّعني كلمة حلوة.. وحتى عموضوع صغير مبارح نرفز بطريقة مخيفة.. يعني فيها شي لو شفت هدايا أهله بالشنطة ؟!.. حكتلي لأ.. ادخلي شوفيهم هلأ.. قلتلها مابدي.. عصبت وحكتلي بكفي هبل.. تعالي معي.. دخلت معها عالغرفة مالقيت الشنطة واحترت وين ممكن يكون حطها !!. حكيتلها معك حق أنا طلعت ما بعرفه.. صارت تضحك وتقول هاي نتيجة الزواج التقليدي حبيبتي!.. بكونو ملائكة وقت الخطبة وكل شي بتحوّل بأول يوم زواج.. لهيك أنا ما رح أخد واحد غير عن حب.. عالأقل بكون خابزته وعاجنته ومربيته على إيدي وحسب مزاجي!.. حكيتلها نانسي مو وقت المزح !.. أنا حاسه انه بعرف وحدة ودخلت جديد عالخط واحساسي بقلي انها كانت معنا مبارح ودخلت الشاليه لأنه كل شي كان مخربط وترتب فجأة.. هاد إذا ما كانت معنا بنفس الطيارة لأنه كان غريب ومتوتر !!.. شفتها احتارت وقالت ممكن خدمة الشاليهات؟!.. حكتلي مابدي تحتاري وتخافي.. انتي بس راقبيه وحاولي تستجوبيه.. الرجال مالهم أمان.. وانتي مابتعرفي ماضيه.. انتي غشيمة وطيبه كتير ومتل ما بتقولي مبارح اختفى ساعة وقال انه كان طالع يتمم اجراءات الخروج برغم انها ما كانت متممة وقت طلعتو !.. في شي فعلاً.. بس الموضوع يلي محيرني الخط يلي كان مفتوح والبنت يلي شفتيها وهاد المشط يلي بتقولي عنه!.. سألتني شو جبتيلي معك ؟!.. توترت من سؤالها لأني ماجبتلها شي.. وفجأة قلتلها عطر !!.. رحت بسرعة للغرفة وأخدت علبة العطر يلي اعطاني ياها محمد بالسيارة واعطيتها ياها.. حكيتلها اسفه بس شفتي شو صار مبارح.. أنا كنت حابة أشتريلك شي عليه القيمة لأنك غاليه عليه.. كنت بتكلم معها وشفتها بتفتح فيها لتشمّها.. ضحكت بصوت عالي وقالتلي بالفعل انك جايبيتلي شي عليه القيمة !!.. مايا حبيبتي العلبة فاضية!.. صفنت فيها وقلتلها مستحيل!.. حكتلي ضاحكين عليكي بتايلاند.. العلبة لسه بغلافها بس فاضية ولا نقطة.. قلتلها نانسي.. عنجد في شغلات غريبة عم تصير !!.. وفجأة ونحنا بنتكلم سمعنا صوت شي وقع ونكسر من جوا.. كان قوي كتير.. ضحكت وحكتلي تحفك الثمينة شكلها انهارت جوا.. قمت اركض وهيه لحقتني.. شفت صورتنا الكبيرة أنا وزوجي بفستان العرس يلي كانت عالحيط واقعه عالأرض مع التحف يلي معلقة عالحيطان.. حكيتلها قلتله يمكّنها منيح!!.. هيها وقعت عالتحف وكلها تطحنت.. لفيت الصورة عالوجه.. شفت وجهي متمزع تمزيع بزجاج التحف ووجه زوجي مافيه ولا شي.. كأنه في حد كان يشوّه صورتي بإيده مو زجاجة ووقعت فوق صورة!!.. فتحت نانسي تمها بدهشة وقالت شو هاد!!!.. وجهك مو باين ومتشوّه وباقي الصورة لسه متل ماهيه!!.. صرت ألملم الزجاج عالأرض وحكيتلها التخت لسه مو مرتب والغرفة منفوضة اعذريني.. حكتلي حبيبتي شو هالحكي ليه انا غريبة.. انتي شيلي هدول عن الأرض وأنا برتب التخت.. راحت ترتبه وفجأة شهقت.. حكيتلها شو في؟!.. شفتها حاملة كتلة شعر كبيرة حمرة بإيدها وحكتلي وقعت بعد ما نفضتها من المخدة.. قلتلها هي مخدة زوجي!.. خافت وحكتلي مايا الوضع ببيتك بخوّف.. هالشي ما بدل إلا عشي واحد.. تركت الزجاج وقرّبت منها وحكيتلها شو؟.. حكتلي أذية لإلك من حدا.. تفرقة!.. انتي معمولك عمل أو في حدا ناوي يأذيكي بأول أيام زواجك.. غمضت عيوني من الصدمة وقلت شو هالحكي!.. أنا بعمري ما أذيت حدا.. حكتلي مصدقة ليه في أطيب من قلبك انتي!.. مواقفك معي بالمدرسة وبالجامعة وبكل حياتي مابتنتسى وبعمري ماشفت بنت زعلت منك.. الكل كان يحبك.. بس بدي احكيلك شي.. قلتلك زوجك مو هيّن.. انا حسيت هالشي من أول ما خطبتيه وما قلت.. ولا تنسي زوجك شب حلو.. حلو كتير كمان!.. وهيك واحد أكيد كان اله علاقات بالجامعة وفي بنات بحبوه.. إسأليه وشوفي مين كان بعرف.. وهلأ انا بدي اروح عشغلي.. أخدت مغادرة ساعة من الصيدلية عشانك وشوي وصاحبها عمو وليد بعصب!!.. ضحكتلي وباستني وأنا حكيتلها انتي عطول فارطة ضحك هيك!؟.. قالت صح هوه أكبر مني بكم سنة بس بقله عمو وليد وعطول بنرفز.. قولتك بكون حاببني؟!.. حكتلي لا تخافي.. بس طهري البيت عطول وانتي اصلاً نضايفيه مابنخاف عليكي.. قلتلها ولو كان معمولي عمل؟!.. حكت ما عندي خبرة بهالقصص بس رح أسألّك عحدا يفهمنا شو يلي عم بصير معك.. بس صدقيني نقطة الوصل عند زوجك.. الحلقة الناقصة هوه بعرفها !.. طلعت من البيت وأنا صرت بمشي بين كل زاوية وبتطلّع حواليه.. كنت بفكر وبقول أنا كيف رح أنام الليلة بالسرير جنبه وأنا مو خايفة.. وكيف رح أبقى هون لحالي من الصبح ليرجع من شغله!.. غير إنه ما بعرف حدا بهالبناية يلي سكنّا فيها.. عشر طوابق ما بعرف مين ساكن فيهم ولا حتى بالشقة يلي جنبنا !.. غسلت ونضفت كل مكان وكبيت الشعر يلي لقيته بكيس كبير.. فتحت باب البيت وبإيدي الكيس لأنه ماكان بدي أخليه جوا.. لقيت مره واقفه قبال الشقة يلي جنبنا وبتتطلع عليّه وبابها مفتوح.. أنا صرت بخاف من أي شي.. وماعرفت ليه واقفه وصافنه فيني بهالشكل.. فجأة ابتسمت وقالت أنا شروق.. ساكنه هون.. انتي مين أول مرة بشوفك !؟.. افتكرت هالشقة مسكّرة لأنه ما بشوف حدا بدخلها لهيك قلت أكيد صاحب البناية مو مأجرها !!.. حكيتلها أهلا وسهلا.. انا جديدة هون.. قالت عروس صح!!.. قلتلها صح.. باركتلي وحاولت تفتح مواضيع بس أنا قاطعتها وقلتلها ممكن أسألك وين بكبو الزبالة لأنه أنا ما بعرف.. قالتلي في غرفة الزبالة بجنب الأصنصير عالشمال.. وبالليل بيجي الزبال بوخدهم.. اذا بدك أي مساعدة أنا موجودة !!.. ابتسمتلي وتطلعت نظرات غريبة ماقدرت أفسرها .. قلبي بهاللحظة ما ارتاح.. لا لمنظرها ولا لحركاتها ولا لأسلوبها ولا حتى لأبتسامتها الصفرة البشعة.. حاولت تتعرّف عليه بس رحت رميت الكيس بغرفة الزبالة وسكرت الباب بوجهها ودخلت عالبيت.. اتصل زوجي وقلي شو بتعملي؟!.. حكيتله بنظف.. حكالي امي عزمتنا عالغدا ولازم نروح بعد ساعة تقريباً.. كان صوته طبيعي بس أنا كنت متوترة.. سألته وينك قلي بالشغل.. حس إني شاكه وأنا ما كنت سامعة صوت ازعاج.. ظنوني زادت وحكيتله تعال عالبيت هلأ وبسرعة.. قلي شو في؟!.. حكيتله بس تيجي بتفهم بدي ياك أنا مو منيحة.. قعدت أفكر عالكنبة وفجأة رن الجرس.. انتفضت ورحت بإتجاه الباب وتطلعت بالعين الساحرة شفت المره يلي شقتها جنبي.. واقفة برا وبتستنى افتحلها.. قلت شو بدها !!.. فتحت الباب ولقيتها بتتطلع عليه.. قلتلها نعم ؟!... قالتلي خليني أكلمك شوي.. حكيتلها لوحدي أنا وبصراحة ما بعرفك!.. حكت ماتقلقي بس دخليني دقيقة.. دخلت لعندي وتطلعت بوجهي.. وفجأة صارت تلتفت ععفش البيت بطريقة غريبة وعيونها تتقلب.. حكتلي بيتك ملعون.. قلتلها شو عم تخبصي!! قالت بيتك ملعون صدقيني.. نفس الريحة!.. نفس نظرات العيون.. نفس رجفة الإيد ونفس الشعور.. أحساسي مابكذّب.. حكيتلها فهميني شو بتقصدي بترجاكي.. صارت تحكي هاي الريحة يلي شميتها منك من لمّا فتحتي الباب نفس الريحة يلي كنت أشمها.. والتصرفات وخوفك غير المبرر مني.. سألتني عن زوجي.. قلتلها بشغله ورح يجي بعد شوي.. حكت منيح بدي أحكي معه.. قلتلها رح يطردك.. زوجي مابحب اختلط بالجارات ولا اعرف حدا.. هوه طلّعني من الجامعة لنتزوج ومو سامحلي احكي غير مع صاحبة وحدة الي.. لو شافك رح ينجن.. اتركيني لحالي!.. قالت مستحيل.. لو تركتك رح تنتهي.. قلتلها شو بدك مني انا منيحة.. حكت لأ.. قامت بسرعة وصارت تطلع على الغرف.. مسكتها وصرخت عليها.. شافت الزجاج عالأرض والصورة لسه واقعة.. حكتلي شو هاد !.. شافتها وأنا صرت أبكي.. حكيتلها أنا تعبانة.. قالت حبيبتي عارفة بقسملك حسيت وبرغم بيتك جوا نضيف خايفة لسه تشيليها مو هيك!!.. حكت أنا نأذيت من مرت أخوي واكتشفت انه زوجي على علاقة معها.. ولولا ما انا مرة كويسة وإلا كنت خربت بيوت.. بس نحنا انتقلنا على هالبيت من سنة والقصة قديمة كتير بس رجعت ذاكرتي لورا من بعد ما شميت هالريحة.. حكيتلها شو الريحة أنا مو شامة شي!.. حكت ريحة ابليس يلي معبقة فيكي.. يلي كنت اشوفه بكل زوايا البيت.. ويلي حاول يفرقني أنا وزوجي كل ليلة عن بعض ويقتل ولادنا.. قلتلها لو طلعت من هون ممكن أخلص!؟.. حكت رح يلحقك ورح تتعذبي لروحك تتعب وتهلك.. وقلبك الطيب رح يصير أقسى من الصوان لتخلصي من يلي فيكي.. ورح يبعتلك أشخاص تشوفيهم ليشتتوكي ويشتتوا انتباهك وتفكيرك.. حكيتلها شو أعمل بترجاكي !.. قالت يا بنتهيه يا بنهيكي.. فتح الباب وزوجي حس في حد بالغرفه.. دخل لعنا وقلي مين هي؟!.. قالت انا جارتها شروق.. اسمعني بيتكم ملعون.. نصدم وقلي مو قلتلك ماتدخلّي حد أبداً !!.. حكتله في حد عاملكم شي ورح يفرقكم.. حكالها لبرا بسرعة.. قالت رح تندم لو طردتني.. اتركني بدي أساعدكم أنا مريت بنفس الحالة.. أنا مرة كويسة.. شدها لبرا وطلعها وضلت تطبّل عالباب.. قرّب مني وضربني عوجهي.. نصدمت فيه وحكيتله محمد انت ضربتني؟!.. قلي بكسر وجهك لو دخلتي عالبيت حدا.. انتي ناوية تخربي بيتك من أولها !.. جاوبيني!!.. دخلت بسرعة للغرفة واخدت الصورة وحكيتله شوف.. في حدا بده يبعدنا عن بعض.. احكيلي مين ممكن يأذينا.. احكيلي بترجاك انت كنت تعرف حدا ؟!.. في بنت حبتك وانت تركتها عشان تتزوجني!.. بترجاك قلي وإلا رح انتهي !.. حكالي مو شغلك!.. قلتله قول هلأ.. مين يلي تركتها عشاني!!.. قال أنا عرفت بنات بعدد شعر راسك وما بقدر اتذكر.. نصدمت وحكيتله اكتر وحدة حسيتها بتحبك مين فيهم!.. حكالي يلي عرفتهم وتقربت منهم كتير كانو ست بنات.. وفيكي تقولي عملت معهم كل شي!.. قلتله بدي أعرف مين همه!.. حكالي اذا بترجعي بتسألي عن الموضوع اعتبري نفسك طالق.. البسي أي شي ورشي من العطر يلي جبتلك ياه لأنه الك ريحة مو حلوة.. حكيتله بقسملك بالله اذا ما حكيتلي مين البنات.. هلأ رح أتصل بالمكان يلي كنا فيه بتايلاند واحكيلهم انك بتعرف بجريمة القتل!.. قلي خدي أتصلي واحكيلهم أني أنا قتلتهم لحتى اقتلك متلهم!!
الحلقة الثالثة
قلتله شو معنى هالكلام ؟!.. يعني انت صحيح قتلتهم أو عم تحكي هيك لتخليني أنسى موضوع البنات !؟.. قرّب من وجهي وقلّي بصوت واطي.. أنا القاتل يلي كانو عم يدورو عليه.. أنا قتلتهم!.. بهاللحظة يلي حكا فيها هالجملة ما عرفت شو صرلي.. دخلت بحالة صدمة وخوف وما عرفت شو أرد.. حاولت اطلع من الغرفة بس لحقني ومسك ايدي وحكالي قتلتهم لأنه شكيت إنك بتعرفيهم من بعد ما تكرر وجودهم بالأماكن يلي كنا نمشي فيها بالمنتجع وشفتك بتتطلعي فيهم نظرات غريبة.. بالليلة يلي كنتي فيها بالبيت شفتهم قريبين من الشاليه.. ولأنه بطلع منه وبتركك أوقات كتير ما كان بدي أسكّر الباب.. وكان بدي أشوف اذا رح تدخّليهم لعندك أو لأ.. وتركت خط موبايلي مفتوح على رقم تاني كان معي لحتى أسمع شو يلي بصير جوا الغرفة.. الموبايل التاني نسيته بالمكان يلي كنت فيه لهيك سمعتي ناس بتضحك وهاد يلي خلاّكي تتأكدي إنه مو أنا يلي عملت هيك.. انتي كنتي بتعرفيهم ولا لأ أحكي!!.. تطلعت فيه وقلتله انت واحد حقير.. انت مجرم.. عشان هيك ما تممت اجراءات الخروج وكان بدك نهرب بسرعة !!.. أنا كيف بدي أضل معك بالبيت.. اتركني بدي أمشي لعند اهلي.. كان بدي أطلع من البيت بس سحبني من شعري ورجعني للغرفة وقلي إذا ما لبستي هلأ رح أطلقك وأرميكي برا وحياتك كلها رح تتدمر بدوني.. وفجأة سكت وقرّب مني وقلي.. أنا تأكدت خلص انك ما كنتي بتعرفيهم.. أنتي ما خنتيني انا اسف أنا بدي نكمل مع بعض.. مسح على شعري وقلي البسي بستناكي برا الغرفة رح نتأخر على امي.. طلع من الغرفة وسكّر الباب وهوه بتطلع عليه وبضحك وأنا ما كنت عارفة يلي عم بشوفه حلم أو كابوس أو حقيقة.. صفنت بنفسي بالمرايه وتذكرت كلام جارتنا شروق.. أنا صح ما بعرفها بس كلامها ونظراتها كانت بتقول إنها عاشت حالة متل حالتي.. ممكن يكون كل شي قلي ياه محمد غلط.. وممكن يكون هوه قتلهم بالفعل لأنه مو حاسس على نفسه.. بس انا كيف فيني أتأكد!!.. كيف فيني أراهن على حياتي معه فبيت واحد لوقت ما يصحى ويحس إنه كان تحت تأثير سحر.. ممكن يأذيني وممكن يصير أي شي مو متوقعته !.. لبست وجهزت نفسي وشفته عالكنبة بستناني ومعه شنطة هدايا أهله الصغيرة يلي ما عرفت وين كان حاططها أصلاً.. حكيتله أنا نسيت كل شي وما بدي أعرف ماضيك وما بهمني ولا شي غير إنه نكمل علاقتنا.. قلي هي مايا يلي بعرفها.. وصلنا بيت أهله.. استقبلتنا حماتي أميره.. سلّمت علينا بدون نفس وبعصبية.. دخلو فجأة وجد وميادة أخواته للصالة وهوه سأل عن ابوه.. شافو الشنطة وحكو هي أكيد إلنا صح!.. أخدوها ودخلو بعد ما سلّمو علينا.. أنا ما كنت مرتاحة ومحمد سأل حماتي على شو عازميتنا !.. قالتله انا ما عملت أكل.. بدي مرت أبني الشاطرة تقوم تعمل أكل.. اليوم العزيمة من تحت أيدها.. وبدنا نشوف شطارتها لحتى عمها ينبسط بطبخها ويرضى عليها !!!.. نصدمت وما عرفت شو احكي.. وفجأة قلتلها قايمة عالمطبخ!!.. دخلت لجوا وتركتها مع محمد عم تحكي معه بصوت واطي.. غرفة وجد وميادة كانت شبه مفتوحة وشايفتهم عم يحكو جوا.. قرّبت من الباب وسمعت كلامهم.. وجد حكت لميادة.. كيف بيوخد هاي الشرشوحة وهوه كان بيعرف يلي أحلى منها !؟.. يخرب بيتها شو بشعة ..بتتذكري ايناس قديش كانت حلوة !؟.. ولا ناديا !!.. أنا مصدومة بإختياره الغبي.. امي اليوم رح تتوصى فيها.. لنشوف بتعرف تطبخ ولا لأ.. حكتلها ميادة شكلاً مقبولة برغم معظم يلي عرفهم كشفناهم بطريقتنا وكانو بالفعل كلهم أحلى منها.. بس لا تنسي كل وحدة فيهم كان عندها عيب وما كان ينفع يرتبط بأي وحدة فيهم.. يعني ايناس مثلاً أبوها بحفر قبور!!.. شو بده يحكو الناس لو ارتبط فيها.. اخد بنت واحد بشتغل حانوتي !.. وناديا كانت مفصومة وعقلها ضارب تماماً.. بتتذكري بس قرأنا رسالتها لما قالتله انها حرقت امها وهيه صغيرة لهيك صارت مريضة نفسياً وعايشة بشخصية امها يلي كانت تأذيها وقت كانت طفلة !.. ضحكت وجد وقالت ولسه الباقي يلي اغتصبها أبوها وهيه صغيرة لهيك كرهت الرجال.. هي بالذات أخوكي وقف معها كتير بس اظن تركها بعد ما اخد يلي بده ياه.. قالتلها ميادة شو كان اسمها ؟!.. حكت نسيت شو بعرفني كانو كتار!!.. المهم اتركي هالطوق يلي بإيدك لأنه هاد أكيد لأمك مو النا وخلينا نفتح الشنطة ونشوف شو جايب.. فتحت الشنطة وأنا حاولت افتح الباب شوي صغيرة لأقدر أشوف أكتر.. وفجأة وجد شهقت وقالت مستحيل!!.. شوفي هدول!!.. ميادة قالت نفسهم!!.. أخوكي كيف بهدينا أغراض ناس تانية.. هي الساعة نفسها وهي بلورة كرة الثلج يلي شفناها بمقطع الفيديو وبتذكر الها صوت.. أنا حافظة صوتها.. كبست عليها وقالت نفس الصوت !!!.. طلّعت شي كمان من الشنطة وقالت هاد الجكيت!.. هدول للبنات يلي كان بعرفهم.. نفس الصور يلي شفناهم بجهازه القديم.. حكتلها وجد وهالطوق تقريباً لوحدة كمان منهم أكيد.. أنا مو فاهمة شي.. جهاز الكمبيوتر القديم اخدو ولا ضل بغرفته !؟.. قالت اظن لسه بغرفته.. قامو عن السرير وأنا تهت بين الغرف وما عرفت وين أروح.. دخلت غرفة جنب غرفتهم واكتشفت انها غرفة حماتي أميره.. فتحت طرف الباب وأنا بستنى يطلعو من غرفة محمد القديمة.. وفجأة سمعت صوت حماتي أميره بتنادي على بناتها وبتقلهم وين رحتو أخدتو الشنطة وهربتو !!.. مايا !!.. مايا وينك ؟!.. أنا بقيت واقفة جنب الباب وهيه عم تفتش علينا.. زوجي كان معها وحكالها مو موجودة بالمطبخ والبنات مو بغرفتهم.. وأنا عم بتطلع من طرف الباب شفتهم دخلو لغرفة البنات وأنا طلعت فوراً من الغرفة ولقيت حماي بوجهي.. حكالي شو بتعملي بغرفتنا ؟!.. حكيتله ما بعرف اسفه.. دخلت بسرعة للمطبخ وسمعت زوجي بصرّخ على اخواته وبقلهم هدول مو الأغراض يلي جبتهم.. مايا وين!.. اجو لعندي عالمطبخ وكنت عم بجهّز رز.. سألني انتي غيرتي الهدايا يلي بالشنطة ؟!.. قلتله لأ وانا ما بعرف شو فيهم.. قلي هدول شو جابهم لهون.. حكيتله مابعرف انا ما طلعت من البيت وما بعرف وين انت حطيت الشنطة.. قال طيب هدول كيف أجو لهون !.. مين يلي حطهم بالشنطة!.. حكت حماتي اميره فهموني هدول اغراض مين.. وانت شو جبتلنا !!.. قال جبتلكم عطورات وملابس بس هدول اغراض ناس تانية.. قال لأمه هالشنطة مو النا هلأ تذكرت خربطو بتايلاند أكيد بين الشناطي.. قالت أميره ان شاء الله ما يكون يلي ببالي صحيح.. اخدت محمد لبرا وصارت تحكي معه بصوت مو مسموع وانا زاد توتري.. حسيت اني دايخة وبدي استفرغ ومو عارفة أوقف على رجلّيه.. كان بدي أشوف الصور يلي حكو عنهم ميادة ووجد لأنه أكيد من خلالهم رح أكشف هوية البنات يلي كان بعرفهم.. بس أنا مصدومة أذا هوه مستغرب من وجود الأغراض.. فكيف أجو بالشنطة !.. أكتر من أحتمال كان جوا راسي بس ما كنت عارفة الصح.. تركوني بالمطبخ وكنت خايفة حماي يحكي لحماتي أميره انه شافني بغرفة النوم لأنه وقتها رح تثبت التهمة عليه انه انا بدلت الهدايا بشغلات قديمة ووقتها زوجي اكيد ما رح يقول أنهم للبنات يلي عرفهم.. كنت بطبخ وشامه ريحة مو حلوة من جسمي وفي شي عم بخليني أتحرك بإتجاهات غريبة بالمطبخ متل البلاليع والمصارف الصحية.. بشوف نفسي جنبهم وبقوم فوراً بكمل الأكل.. رنتلي اختي أسماء وأنا عم بحرّك اللبن المطبوخ.. قالتلي اسفه ما حكيت معك كان مزاجي سيء لأني متخانقة مع حبيبي حمادة وبدي أخبرك أنه قرر يخطبني بس في شي صار.. قلتلها مو وقته أسماء أنا تعبانة.. حكتلي شو فيكي؟.. قلت صعب احكي على التلفون رح ابقى اجي لعندكم ونحكي.. حكتلي طيب اتطلعي وراكي أنا هون!.. حكيتلها اسماء شو قصدك انتي وين؟.. حكتلي جنبك تماماً لفي راسك لورا شوي.. كنت شايفه باب المطبخ عم بسكّر لحاله من الطنجرة والصورة عاكسة عليه.. رجّعت راسي لورا ما شفت حدا.. مسكت التلفون لأرد عليها.. شفت البنت يلي شعرها أحمر جنبي بالطنجرة وعم ترش شي.. صرخت وتطلعت حواليه ما كانت موجودة.. وصورتها اختفت.. كان بدي أطلع من المطبخ بس الصالة بعيدة وتوقعت انه ما حدا سمعني.. رفعت التلفون وسمعت أسماء بتحكي مايا وينك!؟.. ليه بتصرخي وين رحتي أنا عم بحكي معك لسه!!!.. قلتلها ليه بتحكيلي اتطلعي وراكي أنا هون!.. حكتلي كنت بقلك أنا هون بالبيت اذا بدك تيجي اليوم ما رح أطلع مع حمادة لأنه متخانقين.. وين بتختفي شو فيكي من شو تعبانة !!.. سكّرت الخط وحطيت الأكل بالصحون.. فتحت الباب حماتي اميره وحكتلي شو صار معك !؟.. الأكل جاهز !!.. قلتلها خلصته.. صرت عم بدخّله لحالي وميادة ووجد عم يتطلّعو عليه مستغربين من شكلي.. قرّبو كلهم ليبلشو أكل وحماي قال ريحة الأكل حلوة الظاهر فعلاً انتي شاطرة بالأكل متل ما قلنا محمد وقت كنتو مخطوبين!.. ابتسمتله وشفت الكل عم ياكل وفجأة صرخت حماتي أميره وقالت شعر بالأكل!!.. ميادة حكت في صرصور جوا صحني!.. شفت حماي بشد كتلة شعر أحمر طويلة من صحنه ومصدوم.. ومحمد رمى صحنه عالأرض وصار يبزق.. وحماتي اميره بتصرخ وبتحكي حشرات بالصحون!! وأنا سامعة صوت ضحك بنت براسي عم يعلى ويعلى!!!.. حكيت خلص خلص!! انخرسي!!! تطلعت حماتي وقالت بتحكيلي انخرسي كمان يا عديمة الأخلاق يا وسخة.. انقلعي من بيتي.. خد مرتك وانقلعو بسرعة.. قام عن الكرسي وهوه عم بمسح تمه وضربني على ضهري وشدني عن الكرسي وأنا لسه بحكي انخرسي بكفي صوتك موتّني!!!.. ما كانت سامعه شي منهم ولا شايفه شو عم بعملو بسبب صوت البنت يلي كان عم يعلى أكتر جوا راسي!!.. وصلنا البيت.. حبسني بالغرفة وهزّأني وكنت خايفة فعلاً يقتلني لأنه عيونه كانت رح تنفجر من شدة ما كانت حمرة!!!.. وأول ما وصله إتصال من صاحبه يوسف تغيّر تماماً وتبدّل برغم ما كنت متأكدة انه هوه يلي عم بحكي معه.. طلع من البيت وسمعته قفل عليّه من برا.. نزويت خايفة بالغرفة وصوت الضحك تقريباً اختفى.. هدوء بكل الغرف وأنا على أعصابي.. وكنت شامة ريحة نفس العطر من سريري بإتجاه مخدة زوجي !!.. بس نانسي شافت العلبة فاضية وأنا اتأكدت.. الريحة كيف عم ترجع.. واقوى من أول!!.. وصلني إتصال من ميادة أخت محمد.. حكتلي ما رح نسامحك على اللي صار اليوم وان شاء الله بتتطلقي عن قريب يا وسخة.. بابا حكا لأمي انك كنتي بغرفتهم وهاد دليل انك سمعتينا ونحنا بنحكي عن محمد!!.. هربتي لجوا لأنه المطبخ بعيد عن الغرف وبعدها طلعتي وانتقمتي منا وحطيتيلنا هالقرف !!.. بس نحنا رح نحرق قلبك أكتر هلأ ورح نبعتلك كل الصور والأدلة يلي بتثبت كلامنا.. سكرت التلفون وصارت تبعت فيديوهات وصور!!.. بلّشت أدقق فيهم وأنا مو عارفة مين كل وحدة.. بس كان متصور معهم والأغراض يلي كانو بالشنطة نفسهم لابسينهم وبخلفية الصورة وبالمكان يلي همه فيه!.. احترت وما قدرت ابعتلها شي لأنها عملت بلوك بسرعة.. ومفكّرة انه هيك دمرتني بس ماكانت بتعرف انه هاد احسن شي عملته معي بهالوقت!.. قمت بسرعة بإتجاه باب البيت وحاولت افتحه لأوصل لجارتي شروق بس ما قدرت لأنه الباب كان مسكّر.. ضليت اخبّط على الباب لحتى تسمعني.. وفجأة سمعت طقة سكرة باب البيت عم تفتح لحالها !!.. رجعت لورا وأنا برجف والباب فتح!!
الحلقة الرابعة
انتظرت لفتح الباب كامل وفجأة لقيت شروق.. دخلت وقالتلي أنا شروق لا تقلقي!.. قلتلها كيف جبتي مفتاح البيت!؟.. حكتلي أنا أخدته بس دخلت عندك وطبعته على معجونة صغيرة وانتي بتحكي معي بس ما انتبهتي.. نسخت عنه وخليته معي وما حبيت أحكيلك لأنه كنت متوقعة زوجك يحبسك.. صرخت عليها وقلتلها كيف بتعملي هيك!!.. قالت مو وقت الكلام واللوم.. انا اخدتلك موعد عند الشيخة زهراء.. لازم هلأ فوراً نقوم لعندها.. حكيتلها مين؟!.. حكت هلأ بتعرفي بس قومي بسرعة.. قلتلها بملابسي هيك!.. قالت متل ما انتي بس ادخلي معي شوي.. دخلت لغرفة النوم وقالتلي بدي كيس كبير.. اعطيتها وصارت تحط أغراض لزوجي وكل ما أسألها تحكيلي لا تسألي شي.. طلعنا من البيت واخدتني لمكان أول مرة بشوفه بحياتي.. حي قديم بس فيه بيوت فخمة.. التناقض العجيب يلي كان موجود بالمكان حيّرني لدرجة انه ما كنت عارفة بيت الشيخة يلي قالت عنها بيت متواضع أو بيت فخم!.. قالتلي هون.. أشّرت على بيت نصه كان لسه عم ينبنى جديد.. وكان طابقين كبار بس من أجمل البيوت الموجودة بهالحي!.. رنّت الجرس طلعت بنت صغيرة وقالت ماما بتنتظركم جوا.. أنا اسمي نايا وكانت مبارح بتقلنا في بنت رح تيجي لعنا اسمها مايا انتي هيّه مو هيك!.. قلتلها صح حبيبتي.. قالتلي خالتو انتي حلوة واسمك بشبه اسمي !.. بوستها وضحكتلها ودخلنا لجوا.. تطمنت شوي من بعد ما شفت البنت الصغيرة.. قعدت بالصالة متوترة.. شايفه نص اثاث وحيطان جوا عالعضم.. استغربت.. اجت البنت معها دفتر رسم.. قالتلي ارسميلي شي هون.. شفتها كاتبه كلمة نجران.. وحرف الألف مكرر تلات مرات.. قلتلها شو هاد.. قالت هون ارسمي.. اجيت ارسم قالتلي شروق.. هلأ بتيجي اتركي بنتها بحالها !.. دقيقة ودخلت من الصالة مره حلوة بعمري تقريباً ودخلت نايا تبتسملي !!.. نذهلت وسألتها بصوت واطي هي الشيخة!.. ابتسمتلي وقالت أنا زهراء.. تفضلي اجلسي.. حكت بعرف انك مستغربة توقعتي يكون عمري خمسين مثلاً مو هيك ؟!.. بس أنا تقريباً قدك.. الله أعطاني إلهام أنا مستغربة منه.. بس أنا بعرف السبب لهالشي!.. تطلّعت على الكيس وقالت هدول أغراض زوجك يلي طلبتهم من شروق؟!.. كنت رح أشرحلها حالتي قالت ما بدي تحكي شي.. صدقيني أنا بعرف.. مسكت الشعرة الحمرة يلي كنت محتفظه فيها وتطلّعت عليها.. حكتلي ريحتك وتصرفاتك ونظرات عيونك بتقول انك مأذية وأذية قويّة بس أنا صعب أعرف هلأ.. لازم أقعد مع نفسي واتفحص كل غرض.. حكيتلها بترجاكي حاولي أنقذيني.. جارتي حذرتني من يلي جاي وخايفة تتدمر علاقتي مع زوجي.. أنا لسه ما لحقت أفرح.. أنا متأكدة هوه ما كان هيك.. عم يتغيّر تدريجياً وحتى أنا عم بعمل تصرفات خارجة عن ارادتي!.. حكت قلتلك بعرف لا تشرحي!.. حافظة كل شي!.. انتي لازم ترجعي على بيتك وأنا رح أحكي معك تلفون وأحكيلك شو عرفت.. اعطيتها رقمي وقلتلها أنا ما بدي بس أنشفى من يلي صرلي.. أنا بدي أعرف مين يلي أذاني.. زوجي بقول عرف ست بنات وتعمّق بعلاقته معهم.. قلتلها شو سمعت من اخواته مياده ووجد.. وفرجيتها الصور يلي بتلفوني.. طلبت انقلهم على تلفونها.. وأنا رجعت على بيتي خايفة ومحتارة.. وأنا عالباب بحكي مع شروق.. قالتلي تركت ولادي عند امي لحتى اطلع معك.. حكيتلها انا اسفه بالأول ما ارتحتلك مابعرف ليه بس هلأ تأكدت انك انسانة منيحه.. رح أأمن بيتي عليكي ورح أخلّي المفتاح معك.. لو ما طلعت معك اليوم وكلام الشيخة زهراء ريحني شوي كنت بقيت محبوسة بالبيت.. دخلت عبيتها وأنا دخلت عالبيت.. كنت دايخة وحاسة نفسي جوعانة بس بنفس الوقت رح استفرغ!!.. كان بنتابني شعور انه في حدا معي بالبيت.. بس كنت بحكي يلي شفته مجرد هلوسات.. البنت يلي بشوفها شفتها بسبب شكوكي بزوجي.. بس فعلاً يلي بصير ما اله علاقة بهلوسة أو تعب.. أنا فعلاً مأذية من وحدة من البنات يلي كان بعرفهم!.. وكنت متشوّقة أعرف يلي رح تحكيه زهراء.. رحت لأطلّع شي من التلاجة رنّتلي أسماء اختي.. حكتلي ليه قفلتي بوجهي اليوم!.. احكيلي شو فيكي!.. حكيتلها صدقيني ما بعرف.. تخربطت حياتي فوقاني تحتاني وانا مو عارفة ليش.. قلتلها تخيلي نظفت نص البيت وما الي مراق انظف النص التاني.. جسمي هزلان وبحس بتعب.. قالت اذا بدك باجي اساعدك!.. وأنا بحكي معها وبتهرّب من أسئلتها شفت كوب مي عالمجلى معبى للنص وفوقه في أثر لشفاه وحده بروج أحمر.. مسكته وقلت لأسماء بحكي معك بعدين لأنه ممكن أجي لعندكم.. قفلت الخط وصرت بمشي بالصالة وبتطلّع على الأثاث اذا فيه تغيير.. الكنب.. طاولة التلفزيون.. التحف.. الشموع.. الكرسي الهزاز يلي كان أول قطعة بشتريها بالبيت!.. الشراشف والستاير والبراويز.. ما كان فيه تغيير.. أثاثي مرتب وما بوحي انه في حدا كان هون.. دخلت على غرفة النوم وتفقدتها ما حسيت في تغيير!.. فتحت الخزانة وطلعت مخدة جديدة لزوجي بدل يلي اخدتها شروق واعطتها لزهراء.. ورحت حطيتها عالسرير.. رجعت شمّيت نفس ريحة العطر!.. نفس العطر يلي اعطيته لنانسي ولقيته فاضي!.. توترت واتصلت معها وكانت مبسوطة.. حكتلي وليد يلي بشتغل بالصيدلية عنده قلي أنه بحبني وبده يخطبني!.. حكيتلها مبروك حبيبتي بس أنا بدي أسألك علبة العطر يلي جبتلك ياها من تايلاند ولقيتيها فاضيه وين حطيتيها ؟!.. نحنا كنا نحكي وانا ما بعرف اذا اخديتها أو لأ.. قالت تركتها بالبيت شو بدي فيها فاضية !؟.. سألتها ضلت عالطاولة !.. قالت ايوه ليه بتسألي ععلبة فاضية!.. حكيتلها ريحة هالعطر ما بتفارق سريري!!.. بدي أعرف وين راحت لازم أفتحها من جوا لأتأكد اذا هيه فعلاً الريحة ولا لأ.. أنا شمّيتها على ايد زوجي بآخر ليلة بالشاليه وفهمت انه هالريحة نفسها ريحة العطر يلي اهداني ياه.. مع انه كنت شاكه لأنه العلبة مسكّرة وهوه قلي جابها مبارح والريحة اجت عإيده قبل بساعة من دخولنا للسيارة.. أنا شاكة انه شاف وحدة وهالريحة ريحتها والعطر يلي جابه ريحته شي تاني!.. صارت تضحك وتقول اقطعي الشك باليقين وحطيله كاميرا بغرفة النوم!.. حكيتلها انا ما عم بمزح نانسي!.. أنا طلعت برا من شوي ورجعت لقيت هالريحة عالتخت وفوق هاد كوب مي عليه اثار شفايف وحدة بلون روج أحمر!!.. مع انه البيت مو متغيّر بأثاثه شي حتى شكل الشرشف متل ما تركته قبل ما أطلع مع شروق!.. حكتلي مين شروق!؟.. قلتلها جارتي.. قالت لحقتي!.. اسمعيني اذا بخونك فعلاً رح يبين عليه.. واذا هالشغلات يلي بتصير بسبب يلي قلتلك ياه فهالشي فعلاً غريب وبخوّف.. حكيتلها رح ارجع احكي معك.. قلت لازم أدوّر على علبة العطر.. أنا يمكن حطيتها بمكان ونسيت!.. فتحت الخزانة وصرت بدوّر بكل مكان.. وصلت خزانة زوجي.. فتحتها ودوّرت حسيت ايدي ضربت على شي قاسي ورا الملابس.. طلعته لقيتها شنطة!.. نفس الشنطة يلي كان فيها الهدايا !.. فتحتها لقيت هدايا تانية.. عطورات وملابس لأخواته !.. بهاللحظة شكيت انه في حدا معي بالبيت فعلاً لحتى حط شنطتين شبه بعض.. بس شو معنى يلي صار !.. انه البنات قريبين مني!.. وبلعبوا معي ومع زوجي!.. لأنه كان مستغرب متل اخواته بالضبط!.. تركتها على الأرض وقمت لجوا اشوف علبة العطر.. دوّرت بخزانة التلفزيون وتحت الطاولة يلي كنا نشرب عليها قهوة أنا ونانسي.. وأنا منزله راسي شفت الكرسي الهزاز بتحرّك.. رفعت راسي لقيته فعلاً بتحرّك.. البيت هادي ومافي هوا أبداً.. بعّدت عنه وفجأة لقيت علبة العطر مدفونه بالكنباية يلي كانت قاعدة عليها نانسي.. فتحتها.. كانت مليّانه !.. صورتها لنانسي وبعتلها ياها ..قلتلها العلبة مليانه!.. وريحتها نفس الريحة!.. حكتلي مستحيل.. أنا شفتها فاضية!.. ومتأكدة.. وبعد تركيز.. قالتلي مايا اسم هالعطر بختلف عن اسم يلي اعطيتيني ياه.. بتشبهها بالشكل الخارجي بس مو نفسها متأكدة.. العلبة الفاضيه كانت عطر شانيل الفخم وأنا بدقق عهالأمور.. زعلت كتير لأنه كان نفسي بوحدة منها.. وهي رخيصة بعرفه هالنوع.. تقريباً صناعة هندية.. خدامتنا بتستخدم منه.. بس شوفي كأنها عطر شانيل.. تقليد فعلاً.. قلتلها انتي هاد يلي هامك!.. نانسي انا خايفة.. صدقيني مرعوبة بالبيت.. تطلعت شفت الكرسي الهزاز موقّف.. حكيتلها طيب وين اختفت العلبة يلي كانت معك وهي كيف اجت لنفس المكان يلي كنتي قاعدة فيه.. بيتي مو أمان والله أنا خايفة !.. حكت ارجعي لبيت اهلك.. من بعد يلي حكيتيلي ياه عن زوجك والجريمة وما بعرف شو انا صرت خايفة منه!.. كيف انتي!!.. واذا فعلاً بتقولي غبتي ساعة عن البيت ورجعتي وشفتي كل هالكركبة حطيله كاميرا بالوقت يلي بتطلعي فيه وشوفي شو بتلاقي!.. قلتلها بس هوه ما بطلعني وغير هيك هوه مو هون!.. قالت صاحبة يوسف؟!.. حكت ايوه.. قالتلي رني لصاحبه واسأليه.. تصرفي لا تضلي غشيمة!.. حكيتلها طيب رح أقفل هلأ في وحدة بترنلي!.. حكتلي مين!.. قلتلها بفهمك بعدين.. سكّرت مع نانسي وزهراء كانت عالخط.. حكتلي مايا.. احاسيسي ملخبطة ولأول مرة الهامي ما بخدمني.. أنا ضايعة وحاسة ما رح اقدر أساعدك !.. حكيتلها شو معنى كلامك!.. شو حاسة فهميني!.. قالت حسيت أكتر من شي.. وأنا بعرف الهامي عمره ما خاب ولا مرة.. بدليل كل هالنسوان والناس يلي ساعدتها وشفيّت من شر الأشرار !!.. انا حاسة انه في أكتر من حدا عم يلف ليخرب حياتك.. ممكن يكونو هالبنات بس يلي حسيته وشفته ما بقول انه يلي بصير معك سببه عمل.. الشي واضح وضوح الشمس بس مو مفهوم لهيك حكيت معك بسرعة وما انتظرت للّيل.. قلتلها لسه بتحكي بالألغاز.. فهميني اجوكي.. حكتلي زوجك السبب.. مايا خدي بالك منه.. الشعرة يلي معي مو لبشر!.. حكيتلها لمين!.. قالت أثر للجن!.. كل الأدلة بتأكد إنه زوجك معشوق!.. ريحة العطر.. الشعر النسائي الأحمر.. البنت يلي شفتيها واختفت!.. الحركات والأحداث الغريبة يلي شهديتها.. والشي التاني يلي حسّيته إنه انتي نفسك ممكن يكون عليكي عمّل من حدا !.. بس أنا قلبي بأكدلي انه موضوع زوجك غير موضوعك!.. وفي شي تالت مو عارفة أفهمه.. اله علاقة بأهلك!.. أنا مشتته لأول مرة وضايعة!.. بس أنا متأكدة انه زوجك معشوق.. في جنيّة قرّبت منه بالليلة يلي كنتوا رح تغادرو فيها البلد وبقيت معكم.. هالجنيّة ما رح تفارقك الا لتخرب حياتك وتوخد زوجك منك!.. مرتبطة بزوجك ورح تأثر عليه لقدام لهيك بقلك خدي بالك منه وأنا ما بظن يلي صاير مع زوجك عمل لأنه الجن العاشق بتقرب من الانسان بأوقات معيّنه وخاصة لمّا يختلي بنفسه.. شوفي زوجك وين تركك وراح بهديك الليلة.. وراقبي تحركاته بالليل.. لو فيكي تحطّي كاميرا حطي!.. بس أنا ما بدي أظلم البنات يلي عرفهم لأنه ممكن ما يكونو السبب لأنه الأدلة بتأكد على مس عاشق وما اله علاقة بعمَل!.. قفلت الخط وأنا مرعوبة ووجهي أصفر.. هالشي أول مرة بصير معي بحياتي!.. تطلعت عالمرايه لقيت علبة العطر يلي جابلي ياها جنب اغراضي!.. رحت بسرعة وفتحتها ما شمّيت أي ريحة لأنها فاضية.. حكيت في علبتين عطر.. وشنطتين!.. أكيد القصة فيها أنس مو بس جن!.. اغراضهم بتأكد وجودهم!.. وجودهم بالمكان نفسه يلي كنا فيه!.. إذا مو كلهم وحدة منهم لحقتنا !!!.. وفجأة وأنا بشم بالعلبة شفت زوجي واقف عند الباب وبتطلع عليه.. فزّيت وصرخت ووقعت العلبة من إيدي!.. قلي ليه خفتي!.. حكيتله كيف اجيت فجأة ما حسيت عليك أنك دخلت ولا سمعت صوت الباب.. قلي لأنك سرحانة!.. شو طبختي؟!.. حكيتله ما طبخت.. انت حبستني وطلعت شو بدك اعمل وأنا زعلانة !؟.. لف راسه وقلي ليه التخت منفوض؟!.. والشنطة!.. هدول اغراض اهلي!.. قلتله انت يلي بتعمل هيك!.. محمد ليه !!.. هيّه عم تأمرك حبيبي!!.. لا تخليها تبعدنا انت لازم تشفى!.. احكيلي وين رحت واختفيت وقت رنيتلك وطلع موبايلك بالغرفة !.. قول الحقيقة.. قلي كنت بقتلهم!.. حكيتله ما بصدق.. انت مو مجرم!! قلّي مجرم وأسوء من ما بتتخيلي.. انا من كتر علاقاتي صرت بشك فيكي تكوني متلهم!.. انا كل دقيقة بشك فيكي.. بحسك بتنامي مع حدا تاني غيري بغيابي.. وبتحكي مع حدا تاني!.. وبتشوفي حدا !.. اذا هالشي صحيح احكيلي رح اقتله ليبعد عنك بس ما رح أصيبك!.. حكيتله انت مجنون وكلامها طلع صحيح.. أنا بدي أرجع عند اهلي اتركني.. حاولت اهرب منه بس كان بمسكني وبشدني بإيده كأنه بده يعتدي عليه غصب عني.. تصرفاته بتقول هيك!!.. مزّع ملابسي.. بس ما كان قادر يلمسني لأنه كان عم يصرّخ ويبعد عني ويرجع يقرّب ويرجع يبعد.. وصار يذكر أسماء على لسانه منهم ايناس وناديا واسماء تانية.. جنين رؤى ابرار ايثار !!.. يحكي كل اسم ويقول اتركيني بكل اسم من هالأسماء.. وصار يحكي على لسانه لغة غريبة أول مرة بسمعها.. تحوّل كلامه العربي للغة غريبة!.. ذكرتني بالكلام التايلندي يلي كنت اسمعه من الأمن والناس بتايلاند!.. بس ما كان بشبهه.. كان غريب اكتر!.. كأنه صيني أو ايراني أو هندي!.. كان بشدني متل الوحش للحظة ما اغمى عليه وارتمى نايم بوجه ازرق.. والبيت كان بخنق.. أنا كنت فعلاً مخنوقة!.. طلعت من الباب للصالة لأرجع لبيت اهلي.. وصلت الباب لقيته مسكّر.. المفتاح بجيبة زوجي أكيد.. وأنا كنت خايفة منه لدرجة ما بدي أرجع للغرفة.. طبّلت على الباب لتسمعني شروق بس ما سمعت.. رقمها ما كان معي لأنها أصلاً ما اعطتني ياه برغم كلامنا مع بعض.. ما كان الي الا اني ارن لزهراء واقلها تحكي مع شروق.. حكتلي كنت رح احكي معك بس سبقتيني.. حكيتلها شو في؟!.. قالت صور البنات فيهم شي غريب انتي ما لاحظتيه!!.. قلتلها لأ.. حكتلي برغم انه كل وحدة فيهم متصوّرة لحالها مع زوجك بس في أمور مشتركة بينهم.. نفس حركة الإيد بالصور.. ونفس النظرات.. والأهم من هيك الملابس!!.. كذا بنت كانت لابسه نفس اللبسه ومبدله مع غيرها !!.. البنات بعرفوا بعض!!.. قلتلها مستحيل هالشي ما لاحظوه اخواته برغم انهم بلاحظو عكل شي!.. حكت في صورة لزوجك جوا بيت بغرفة مغلقة في صورة على الحيط نفس البرواز مكرر نصه مع وحدة تانية.. يعني المكان يلي كان فيه نفس المكان يلي كان مع التانية.. زوجك كلامه كله غلط وبهلّوس غصب عنه بس أكيد البنات بعرفو بعض!.. وفجأة شفته واقف عند الباب وبقول بدك تعرفي مين بكونوا البنات ؟!.. سكّري التلفون وتعالي لعندي على الغرفة
الحلقة الخامسة
دخلت لعنده على الغرفة.. كان هادي ونظراته هادية.. قلي.. شكيت فيكي بعرف اني غلطان.. انتي مو متل يلي مرّو بحياتي.. انتي غير وعشان هيك كان بدي أتأكّد.. طلّع شي من جيبته وقلّي.. هاد المشط يلي شفتيه ؟!.. حكيتله المشط الأسود!.. كيف أجا لإيدك والشعر يلي عليه وين راح ؟!.. حكالي أنا يلي حطيته بالغرفة.. قلتله كيف بس المشط أختفى أول ما دخلت.. وليه لتحطه بغرفة الشاليه !.. انت يلي دخلت ورتبت كل شي بس طلعت أدوّر عليك برا عالشط ؟!.. قلّي.. أنا.. بس بدي منك تهدي وتروقي.. حياتنا رح تتصلح بس خليكي هون بالبيت لا تفكّري تروحي عند أهلك وتتركيني!.. قلتله بدك تقنعني أنك انت يلي حطيت المشط وشلته ورتبت المكان !؟ طيب ليه شو بتستفيد من هالتناقض بالتصرفات ؟!.. أنا ما بصدق.. في شي تاني عم بصير.. انت ليه بتحاول تشوّه صورتك قدامي.. أنا متأكدة إنه اختفى بلمح البصر وانك ما لحقت أصلاً تشيله لأنك كنت قبالي.. متل الشنطة تماماً !!.. ومتأكدة الشعر يلي لقيوه أهلك بالأكل هاد سبب من الشي يلي سمعت عنه !.. حكالي.. شو سمعتي ومن مين!.. حكيتله هاد مو الموضوع.. حكيتلي بدك تحكي عن علاقاتك السابقة والبنات يلي اخواتك بعتولي صورهم.. مين همه.. ومين يلي ممكن تأذينا.. إيناس؟.. ناديا ؟.. ولا ايثار أو أبراء أو جنين أو رؤى!.. هدول يلي خبّصت معهم!؟.. مين يلي انتقمت منا وخرّبت حياتنا مين!!!.. قلي بهدوء صدقيني ما بعرف.. حكيتله لكن مين بعرف ؟!.. طلعت زير نسا وانا مو عارفة.. كنت مفكرة حالي ماخدة سيد الرجال وطلعت ولا شي.. مو مخلّي وحدة إلا وموسّخ معها.. وهلأ جاي تقلي انتي مو متلهم !.. شو بعرفك اني مو متلهم ؟!.. انت تأكدت؟.. انت أصلاً شو بتعرف عني غير الظاهر مني لالك !! .. تعمقت جواتي ؟!! .. لأ .. لكن لا تقول اني مو متلهم.. أنا ممكن أطلع أسوء منهم وانت مو حاس.. قرّب من وجهي وقلّي أسوء منهم !.. انا كنت بختبرك.. أنا حتى قتلت عشانك.. حكيتله لا تجيب هالسيرة بتخوّفني منك أكتر.. انت مو مجرم!.. حكالي مجرم وقتلت وممكن أرجع أقتل.. أنا كنت بشوفك كاملة.. بتيجي بتحكيلي هيك بعد ما تزوجتك!!.. حكيتله لأنك مابتوثق فيّه.. فوراً صدقت وزاد شكك بلحظة.. شفت.. شوف تعابير وجهك كيف تحوّلت بثانية.. تطلّع بالمرايه !.. شخصيتك الحقيقية ظهرت هلأ وكلام الخطبة الحلو كان كله مجرد كلام بالهوا !.. غمض عيونه واخد نفس وهوه معصّب وبعدها ابتسم وقلّي.. انتي جوعانة صح؟!.. ما اكلنا شي.. رح أروح أجيب أكل.. حكيتله لأ ما بتتركني لحالي هون.. البيت أصلاً راعبني.. اطلب الأكل ديليفري.. طلب الأكل وأكلنا بالغرفة وتركنا السكاكين والشوّك عالكومادينو.. كان بحاول ينسيني كل شي.. بس أنا ما قدرت.. كنت خايفة يتوّحش ويحاول يعمل يلي عمله.. كنت مقتنعة من جواتي إنه في شي غلط.. كلامه كله غلط متل ما قالت زهراء.. عم يشتتني ويتوهني.. في شي عم بأثّر عليه أكيد.. بس لمّا يكون موجود معي كنت بحس بأمان أكتر من وأنا لحالي بالبيت.. كلامه كان حلو بهالليلة وحسيته بحاول يتقرّب مني ليصلّح يلي عمله.. بس في شي كان يبعّده.. سألته انت تعبان ؟!.. نام وبلا ما نسهر.. حكالي ما بعرف!.. بعّد عني ولف وجهه ونام.. وأنا بعّدت عنه شوي وتغطيت.. متوترة وعيوني بالسقف بغرفة مظلمة !.. وفجأة قلي بصوت محشرج وواطي وهوه لافف وجهه ودايرلي ظهره.. ريحتك بشعة.. وانتي بشعة.. أنا أصلاً أخدتك لأنه كان بدي أتزوج وبس.. يعني أنا ما حبيتك.. البنات يلي عرفتهم كانوا أوسخ من الوساخة بس حبيتهم كلهم !.. انتي متخيّلة واحد يتزوجك بس لأنه بده يتزوج.. ويحب بنات الشرف متبري منهم وما يحبك ؟!.. كنت مصدومة وهوه عم يحكي ويحكي.. وأنا ساكتة وبسمع.. كان التيبل لامب يلي جنبه ضاوي وأنا يلي جنبي مطفي.. وفجأة طفى الضو بأصبعه بعد ما خلّص حكي.. وصارت الغرفة كلها سودة.. حتى هوه ما كنت شايفته.. من تعب التفكير غفيت لدقايق ما حسيت إذا همه ساعة أو دقيقتين.. بس يلي فتحّلي عيوني صوت رجليه وحركاته الغريبة يلي كان بعملها وهوه نايم.. كان برفّس كتير وأنا تدايقت وبعدّت عنه.. وللحظة حسيت في شي تاني عم بدغدغ إيدي.. متل حشرة ناعمة بتنتقل بسرعة من إيدي لرجلي.. عيوني كانت بتغمّض بس حركاته ما هدّيت لوقت ما حطيت ايدي على ظهره وقلتله بكفي قوم!!.. حسيت بجسمه بلف لناحيتي.. ونفسه الساخن حسيته صار قريب من وجهي.. وجهه ما كنت شايفته من الظلمه بس مع كل نفس منه كانت الصورة بتوضح.. تهيألي صورة البنت قبالي بالظلمه.. بس بشكل رجولي قريب من ملامحه.. وريحة العطر كانت أقوى مرة بشمّها.. وبعد ما تأكدت من قرب عيوني لعيونها.. صرّخت ابعدي عني!.. حسيت ايدي بتنشد ومربوطة بالسرير ومو عارفة اتحرك.. كان في شي بلتف على رقبتي واديّه بشعور نفس شعور الدغدغة يلي حسّيته.. وبصعوبة وأنا عم بمد إيدي للتيبل لامب يلي جنبي قدرت أضوي الضو.. يلي شفته.. انها راكبة فوق وجهي ونصها معلّق بالهوا.. وهوه مو موجود جنبي.. ملامحها بشعة وقريبة منه.. وجسمها كامل أسود وشعرها الأحمر كان طويل وملفوف عرقبتي كله وعم بخنقني.. بهاللحظة تأكدت انه هاد مو حلم.. وتأكدت انه هالجنيّة عايشة بالبيت.. بس يلي شفته ما كنت عارفة أفسرّه !!.. سحبت إيدي من بعد ما حسيت بتشنج قوي شالل جسمي ومسكت السكين يلي كنا ناكل فيها من الكومادينو وصرت بمزع الشعر يلي بلتف على رقبتي وعم بدخل جوا تمي.. جرحت نفسي والدم نزل.. حسيت للحظة اني قطعت شرياني.. بس كان بدي أخلّص لأرتاح.. هربت للباب ولفيت راسي.. شفت زوجي نايم عالسرير ومفتّح عيونه عليّه وهيّه مالها وجود.. نظرة سريعة ما فهمت منها ولا شي!.. دخلت عالحمام وسكّرت الباب من جوا.. وتلفوني كان معي.. حكيت مع أسماء اختي وحكيتلها بترجاكم تعالو خدوني.. أنا بنزف.. حكتلي شو صايرلك الساعة تنتين الفجر !!!.. قلتلها لا تسألي بس تعالي انتي وماما خدوني.. وأنا محبوسة بالحمام ودمّي شبه تصفّى.. سمعت صوت الجرس.. ندق أكتر من عشرين مرة ومحمد ما قام فتح.. وفجأة نفتح الباب.. سمعت صوت امي واسماء بحكو وينها !! مايا وينك !؟ .. وصوت شروق بتقلهم اكيد قتلها المجرم!.. خبطت عالباب انا هون! حكتلي اسماء افتحي نحنا اجينا.. فتحت وشافو ملابسي مغرّقة بالدم.. اتصلو بالإسعاف.. منعتهم يدخلو غرفة النوم وهربنا من البيت.. بالمستشفى سكّرو الجرح.. وصلنا بيت أهلي وشروق كانت معنا.. تطمنوا عليّه وطلبت من أمي تعرّفها على نفسها.. قالتلها انا مدام غاليه.. دم بنتي يلي نزف ما رح يروح هدر.. حاول يقتلك !.. شكيت وقلبي حس لأنه اختك مو مرتاحة لصوتك بالتلفون!.. حسابهم بكرا معي!.. برغم انه امي همها الأول بيت زوجي بس شخصيتها قوية وما بتسمح لأي حد يهيّنا بعد موت بابا !.. ما كانت فاهمة شي ولا عارفة انه انا يلي عملت بنفسي هيك.. حكتلها شروق.. زوجها ممسوس.. اسماء صفنت وحكتلها شو بتحكي انتي!.. حكت صدقوني هالكلام قالته شيخة شافت مايا.. بإلهامها عرفت.. وطلبت مني أحكيلكم إنه حتى الأذية ممكن تنتقل لإلكم ولبيتكم هاد.. ممكن فيكي مدام غالية وممكن ببنتك أسماء.. حكتلها امي بإستغراب الساعة تلات ونص الفجر زوجك ما سأل عنك ليه ؟!.. قالت فهمته ظرف مايا وقلي اعملي أي شي لتساعديها.. أنا حتى مفتاح بيتها اعطتني ياه.. تطلعت فيّه وغمزتني.. قلت لأمي صحيح!.. استأذنت وراحت وامي عصّبت وقالت كيف بتعطيها مفتاح بيتك!!.. انتي شو بتعرفي عنها لحتى توثقي فيها !!.. قلتلها ساعدتني صدقيني ماما زوجي مجنون!.. انجن بآخر يوم قعدنا فيه بالشاليه.. انا ما بقدر اعيش معه.. حكتلي بكرا بتفاهم مع أهله.. اغلقي تلفونك!.. حاولت اغفى بس صورتها ماغابت عن بالي.. بصرّخ كل ما بنام وبشوفها ماسكة بروحي وبتشد عليّه!.. أو بتمشي بزوايا البيت.. امي حسّت التعب على وجهي ومن الصبح سمعنا صوت خبط على الباب.. كانت حماتي أميره.. قالت يا غاليه!.. بنتك بترجع على بيتها وهلأ.. قبل للفضيحة تصير على كل لسان!.. قالتلها شو قصدك!؟.. حكت اسبوع ما صارلهم متزوجين بنص الليل طلعت من بيتها وبدون علم زوجها !.. وفوق يلي عملته معنا بتهرب من البيت!!.. حاولت تفهمها يلي صار وانه ابنها مو طبيعي وحاول يقتلني.. حكت بنتك يلي حاولت تقتل حالها.. شوفي تفضلي.. اعطتها تلفونها وأنا ما كنت عارفة شو بتشوف!.. بهاللحظة عرفت انها بتشوف يلي صار مبارح بالليل.. زوجي حط كاميرا ليلية ليكشف شو بصير بغيابه عني.. ويلي شافته امي خلّاها تنصدم.. قالت مايا انتي حاولتي تقتلي نفسك!.. شفت نفسي بحارب بالهوا ومحمد جنبي وبلف وجهي بكل الجهات وبمسك السكين وبحاول اقطع شي وهمي انا حاسه فيه!.. بجرح نفسي وبهرب للحمام وزوجي بصحى وبتطلّع عليه مستغرب.. بس يلي ما اهتموله حركاته الغريبة يلي كان يعملها وهوه نايم.. كأنه حاسس بوجود وحدة جنبه غيري وبقرّب منها بحركات مو طبيعية !!.. امي حكت انتي مو منيحة بنتي.. بعرف انك ما بتحبي السفر.. مرضتي من السفرة.. حماتي اميره مسكت ايدي وحكت.. اوعك يا غالية تتدخلي بين ابني ومرته!.. امشي معي عبيتك.. امي سكتت وانا رحت بس شفت اسماء غضبانة وبدها تعمل شي.. بهاللحظة لحقتنا وأنا كنت حاسه.. رجعتني على البيت ومحمد تصرّف معي كأنه مابعرف شي ومصدوم من يلي شافه.. حكيتله انت واحد مريض!!.. مجنون!.. طلعت حماتي اميره من البيت وباب البيت فتح.. كنت بحكي معه بس واقفة قبال باب غرفتي وواضح قدام عيني صورة باب البيت وهوه جنبي بس بعيد عنه.. يلي دخلت أسماء.. هربت للصالة وما عرفت ليه أجت.. بس يلي بعرفّه اختي حشريّة ويلي عملته انها حكت مع شروق واخدت المفتاح.. طلع على شغله وأنا احترت وين ممكن حط الكاميرا.. دخلت وشفت اسماء.. حكتلي ماتوقعته مجنون هيك!.. انتي لازم توخدي بالك منه.. جارتك فهمتني على كل شي.. وحكتلي عن البنات يلي كان بعرفهم.. طلبت منها تبعتلي الصور يلي مع الشيخة يلي بعتتك عندها وبعتتلنا ياهم.. بدي أحكيلك إنه أنا شايفه وحدة منهم.. أنا مو شايفتها أنا متأكدة إني شايفتها !.. قلتلها مين.. حكت البنت هي النحيفة كتير ولابسة أحمر.. انا شاكه انها كانت تدرس بالجامعة عنا ووجهها مألوف.. فجأة صرت رح استفرغ.. قالتلي فيكي شي؟!.. حكيتلها لأ.. قالت زوجك مطوّل ليجي.. حاولي تصيري أحسن.. في فيلم هندي حلو هلأ رح يبلّش.. أول ما ذكرت هالجملة.. الكرسي الهزاز صار يتحرّك.. والشموع بالبيت اشتعلت.. شمعة شمعة.. وأصوات تانية صارت تطلع من الغرف.. البواب تفتح وترجع تسكّر.. والثرايات بالسقف تهتز وترجف.. أسماء وقفت مرعوبة وحكتلي شو بصير جوا بيتك !؟.. حكيتلها صدقتيني!.. وفجأة رن تلفوني.. سمعت صوت بنت بتقول.. حكتلك انه بتعرفها وهيّه ما بتعرفها !.. واستغربتي من بنتين لابسين نفس ملابس بعض وبمكان واحد مع زوجك.. وما عرفتي السبب.. البنات أخوات وأنا فاعلة خير بس بخبرك انهم عايشين ببيت قديم قبال المقبرة يلي كان بشتغل فيها أبو صاحبتها المرحوم!.. العلامة شجرة مدهونة بلون أصفر !.. وفجأة قطع الخط.. حكتلي اسماء مين بحكي أنا بطلت قادرة أتحمل بدي أطلع.. رجعت رنّيت لقيت الرقم مغلق.. قلتلها متأكدة هالصوت صوت حدا بعرفه!!.. تفاصيل صغيرة بلغز نحكالي بمكالمة مدتها دقيقة فتحتلي عيوني على شغلات وخلّتني أصفن بأختي وانسى يلي بصير جوا بيتي بهاللحظة !
الحلقة السادسة
حاولت أسماء تطلع من البيت بس أنا وقفتها وحكيتلها يلي حكت معي كيف عرفت انتي شو قلتيلي !؟.. قالت ما بعرف أنا مصدومة متلك !!.. بس أنا متأكدة إني شايفه البنت يلي بالصورة.. قلت انها حكت انه البنات يلي لابسين متل بعض بكونو اخوات !.. وبيتهم قبال مقبرة ويلي كان بشتغل فيها أبو صاحبتها المرحوم!.. بتذكر كلام ميادة ووجد لمّا حكو عنهم قالو انه البنت يلي إسمها ايناس أبوها كان بشتغل بالمقابر.. وهاد دليل إنه هالبنت بتكون صاحبتهم.. بس مين يلي اتصلت وليه لتخبرني بمكانهم!.. حكت أسماء خلينا نطلع من هون لأنه بالفعل بيتك بخوّف ومسكون.. فتحت الباب بالمفتاح وشافتنا شروق على الدرج.. قالت الزبال الحقير ما أجا يوخد الزباله وريحة العمارة كلها زبالة.. غرفة الزبالة نتنة كتير.. حكيتلها عن يلي صار وقالت هالكلام بتحكيه لزهراء لأنه ما فيكي تروحي تدوّري على بيت بعلامة بشجرة جنب مقبرة!.. انتي عارفة كم مقبرة في بالبلد !!.. حكتلها أسماء بتقدري توخدينا عند زهراء يلي قلتي عنها !؟.. حكت ايوه بقدر بس خلوني ألبس أي شي وأسكّت الولاد جوا.. دخلت وسكّرت الباب وبقينا نستنى برا وقت ونحنا بنحكي.. حكتلي أسماء بيتها هادي مو سامعة صوت ولاد !.. حكيتلها أكيد بيتها كبير متل بيتي وقاعدين جوا.. طلعت وحكت حكيت معها وبتستنانا.. وصلنا بيت زهراء.. قالت نايا بنتي بتضّل تسأل عنك يمكن لأنه أسمك بشبهها تعلقت فيكي.. قلتلها وينها ؟!.. حكت بالمدرسة هلأ.. سألتني عن ليلة مبارح أسئلة كتير وجاوبتها بكل شي شفته.. قالت السحر تحوّل لربط.. حكيتلها كيف يعني!.. قالت الجنية مرتبطة بزوجك وعم تحاول تبعده عنك وهوه ببعد بس بنفس الوقت بده تضلي معه عشان تضل تعذبك !.. حكيتلها هاد يلي حسيته مبارح.. كل يوم رح تتعمق بزوجك لتصير جزء منه وبتشبهه.. رح تعيش فيه ويمكن توسوسله بقتلك.. بس انتي مو لازم تبعدي عن البيت لأنه خلاصك الوحيد فيه.. لازم تبقي معه عشان تنهي هالقصة الصعبة.. ويلي تأكدت منه إنه في سحر تاني.. بس السحر ما إله أي علاقة بوجود هالجنية بحياتكم.. يلي مسحور هوه انتي!.. ويلي ملبوس هوه زوجك!.. خربطتني وخوّفتني!!.. قلتلها يعني أنا مادخلني باللي عم يصير معه والعكس صح ؟!.. قالت بالزبط.. مايا انتي عليكي أكتر من أذيّة ومن الممكن يكون سحر أسود !.. انتي لازم تلاقي البنات هدول بأسرع وقت!.. وياريت تجيبي أغراضهم لأنه من خلالهم أنا رح أكشفلك كل هويّتهم!.. حكيتلها بس الأغراض بغرفة اخوات زوجي وأنا لو أموت ما بدخلوني عليها !.. كيف أجيبهم الشنطة لسه معهم وما بعرف وين حاطينها !.. ومن بعد يلي عملته حماتي مستحيل تستقبلني.. قالت أسماء أنا رح أتصرف!.. حكيتلها شو رح تعملي!.. قالت حمادة رح يساعدنا بس يارب يلي عم بفكّر فيه يقدر يعمله.. حكتلي زهراء إنه ما في وقت وكل دقيقة عم تمر عم تنهيني أكتر.. سألتني إذا بحس بوجع بمكان! قلتلها بحس بدوخة وإرهاق بكل جسمي وعضمي وبحس بوجع براسي وشعور بإنه رح أستفرغ!.. حكتلي انتي فحصتي اذا حامل أو لأ !!.. قلتلها ما صرلي شهر متزوجة.. قالتلي السحر!.. طلعنا محتارين وأنا ما كنت صابرة وكان بدي أعرف وين بيتهم!.. ونحنا طالعين شفنا يوسف صاحب زوجي صدفة.. كان بدخّل أغراض بسيارته شاريها من السوبر ماركت.. ولأنه كنت كتير أشوفه وأسلّم عليه بوقت الخطبة عرفني فوراً وسألني عن زوجي!.. قلتله ليه هوه مو معك بالمكتب؟!.. قلي لأ أنا تركت المكتب من شهر ونص.. ومحمد صرلي أكتر من شهرين ما شفته!.. قلتله هوه بخير بس ممكن تعطيني رقمك لأنه زوجي ضيّعه وبدي اعطيه ياه.. قلي أكيد.. أسماء سجّلته على تلفونها وحكتلي زوجك كان بكذب عليكي!.. اعطتني مفتاح بيتي وقالت هلأ رح أروح أحكي مع حمادة عشان يلي طلبته زهراء.. شافتني شروق تعبانة قالت انا تأخرت على البيت.. انتي لوين ماشية.. خلص لا تضلي تفكري أنا متأكدة رح تنشفي وتنحل أمورك.. وزوجك يرجع متل الأول متل ما صار معي!.. حكيتلها هالصيدلية بتشتغل فيها صاحبتي نانسي.. أنا بدي أشوفها انتي ارجعي!.. حكتلي متل ما بدك.. راحت وأنا دخلت على الصيدلية.. شافتني نانسي استغربت وقالت حبيبتي كيفك!.. صرت أبكي.. حكيتلها ما عم تتركني.. بدها تقتلني ومو فاهمة تصرفاته وكل شي بقول إنه في بنات بالموضوع.. أنا خايفة أرجع على البيت بس زهراء بتقول لازم أرجع! حكيتلها عن المكالمة وقلتلها بدي أروح أدوّر على البيت.. أنا مو صابرة!.. حكت ما بتركك تروحي لحالك.. دخل وليد صاحب الصيدلية يلي بتشتغل عنده وسمع كلمة مقابر.. ولأنه ما كان بدي أوتّر علاقتهم من بعد ما طلب يخطبها حاولت اطلع من المكان بس حكتلي نانسي ما بتروحي لحالك.. فهّمت وليد وقلها باخدك بالسيارة وبنلف بكل مقابر البلد.. بس الدليل ضعيف ياريت حكتلك اسم شارع أو المنطقة !.. طلعت معه وبقيت نانسي بالصيدلية لحالها.. وصلنا أول مقبرة وكانت كبيرة وكلها شجر.. قلي هون ما في أي بيوت متل ما انتي شايفة خلا.. حكيتله مو هيّه اكيد.. وصلنا وحدة تانية كانت نفس الشي فاضية من البيوت حواليها وأصلاً ما فيها شجر.. لوقت ما وصلنا لوحدة كانت أكبر المقابر وفيها شجر جوا وبرا وبيوت قديمة ومو كتيرة حواليها.. قلبي حسّني إنه هون.. بس ما كنت شايفه العلامة الصفرة ولا على أي شجرة.. دخلت لجواها وهوه لحقني.. عالباب كانت الشجرة المدهونة أصفر.. ويلي كان جنبها قبر مكتوب عليه أبرار !!.. صفنت وخفت.. حكالي شو في!؟.. قلتله ابرار بنت من البنات!.. ما كان فاهم عليه وأنا ما كنت متوقعة انه وحدة منهم تكون ميّته.. طلعت من الباب وتطلعت على البيوت.. كان في تلات بيوت قريبة.. سألته أي بيت ممكن يكون بيتهم ؟!.. بعد ما استوعب الموضوع بشكل صحيح.. قلّي بتوقّع اقرب بيت للشجرة.. يعني يلي قبالنا !!.. ركضت ولحقني.. حكالي صعب تروحي عند ناس ما بنعرفهم.. نانسي قالتلي لا تخليها تروح!.. حكيتله وليد اسفه انا ما بدي أزعجكم بس صدقني أنا رح أموت لو ما عرفت مين البنات.. قلي تعالي معي!.. اخدني بسرعة ودقينا الباب.. ما حدا رد.. شد إيد الباب طلع مفتوح.. تطلعت فيه أنه ندخل ؟!.. دخل وصار بتطلع يمين ويسار.. البيت فاضي ومهجور !!.. بس في شي عالبلاط !!.. قلتله المشط!.. قال مشط شو!.. حكيت نفس المشط.. نفسه!!.. هاد كيف وصل لهون.. مبارح بإيد زوجي كان!.. يالله شو بصير أنا رح أنجن!.. كنت رح أدوخ مسكني وفجأة وصلني مكالمة كان محمد زوجي.. قلي وينك؟.. حكيتله بالبيت.. قلي لأ.. انتي مع مين هلأ !.. ما عرفت شو أرد وفصلت الخط بوجهه.. رجع رن.. قفلت التلفون.. قلتله كيف شك إني مع حدا !.. إذن هوه أكيد.. الله ينتقم منه الحقير!!.. بلعب معي وبخدعني وبده ينهيني.. بس فجأة قلت ببالي ممكن كل هالشي مو بإيده.. محمد كان كويّس!.. بهاللحظة سمعت طقة كعب برا البيت والباب مفتوح.. تذكرت الصوت ونحنا بتايلاند كان نفسه.. قلي شو فيكي!.. حكيت برا !.. طلعت وفجأة الباب طرّق بقوة.. صار هوا وغبرة والصوت كان قريب.. حكالي مو سامع شي.. انتي منيحه ؟!.. قلتله دايخه رجعني على الصيدلية وانا برجع عبيتي يمكن زوجي شك.. رجعنا ونانسي حاولت تهدّيني.. وفجأة استفرغت.. قالت انتي مريضه!!.. وليد حكالها لون وجهها مو طبيعي وجفونها ذبلانة.. اعطاني أدوية وأنا طلبت جهاز فحص حمل.. دخلت عالحمام وطلعت مصدومة.. حكتلي نانسي شو!؟.. قلتلها أنا حامل!.. رجعت على البيت.. لقيت محمد قاعد عالكنبة وبستناني.. قلي وين كنتي.. والمفتاح كيف اخدتيه مني ونسختي منه!؟.. ماعرفت شو ارد.. قرّب مني وضربني بقوة.. صرّخت فيه وقلتله انا بعمل هيك لأنقذ علاقتنا.. لأنقذ زواجنا لأني بحبك.. أنا رح أموت لو ما وقفت معي بترجاك ساعدني احكيلي مين بكونو ووين ساكنين وكل شي عنهم.. انا رح اتفاهم معهم.. طلّعت المشط من جيبي وقلتله هاد لوحده منهم صح؟!.. انت بتشوفهم وبتطلع معهم.. كانو معنا بتايلاند !؟.. انتو متفقين عليّه !.. ما رضي يجاوب وبقي يهزّأني.. وفجأة صار يخبص ويحكي كلام مو مفهوم.. بس مفهوم بنفس الوقت!!.. يلي بتكلم ما كان هوه.. هاد مو محمد!.. يلي بتكلم الجنيّة يلي لابسته وبتأثر عليه.. نظراته كانت حادة وعيونه حمرة.. قلّي بني الجن رح يحرقوكي لو حاولتي تعرفي الحقيقة.. وابوي ساكن بأرض هالعمارة وبمكان قريب كتير من شقتك.. الهند موطّنا والكاهن هوه أعز شخص عندي لأنه قربها مني.. اذا بتعرفي أي شي عنهم أنا رح أحرقك بإيدي وأقتلك متل ما قتلت غيرك.. لأنه حاولو يقتلوهم من بعد ما انتي طلعتي.. هالمشط إلها ووين ما بتكوني رح تلحقك.. ابعدي عني!!.. حكيتله ما ببعد عنكم ورح ترجعلي لأنه أنا حامل.. ويلي أذوني وبلعبوا معي رح ألاقيهم!!.. صار ينطرق الباب بقوة وسامعة صوت صراخ برا.. وفجأة صار يضحك.. كان في دخان بنزل من تحت الباب.. فتحت الباب طلعتلي شروق بتصرخ وبتقول بيتي بحترق!!.. احكي مع الاسعاف بترجاكي.. تلفون البيت وتلفوني الشخصي ولّعوا !.. حكيت مع الاسعاف وزوجي بقي يضحك.. كنت سامعة ناس بتصرخ من البناية وما كنت متوقعة أنه النار وصلت لبيوتهم.. طلع واحد لعنا من السكان فجأة والباب مفتوح وقلنا سكرو منافذ الأساسات بالحمامات أو المداخل.. بقولو لقيو زبال البناية مدفون بصندوق تجميع الزباله يلي بوصل لغرف الزباله بشقق الناس.. وطلعوه محروق والاسعاف بتطّفي ونبهتني أخبركم بهالشي.. وخبّر شروق انه الاسعاف دخل بيتها.. زوجي طردها وأنا يلي استغربته انا ما جابت سيرة زوجها ولا ولادها !!.. طلعت وفجأة دخلت حماتي اميره مع بنتها ميادة للبيت والباب لسه مفتوح.. قالت انتي وحدة وسخة وقليلة شرف ونحنا ندمانين انه غلطنا وزوجانكي ابنّا.. تغيّرت معالم وجه زوجي وقلتلها شو في!؟.. حكتله شوف صور مرتك مع واحد جوا بيت مهجور!!.. حكت ميادة وصلني على الفيسبوك من حساب بنت اسمها نانسي هالصور.. تفه وقحه!.. بمنطقة مقطوعة كمان !!.. زوجي رجع يضربني وأنا صرت أصرّخ واحكيله أنا حامل اتركني يا مجرم يا قتال القتلة.. شحطتني حماتي اميره للباب وحكتلي لبرا يا وسخة لعند أهلك وابني رح يطلقك.. صرّخ محمد بوجهها وقلها ما بطلقها.. لازم تبقى هون بالبيت!.. حكتله كيف بتقبل على حالك تشوف مرتك مع واحد بتخونك وما بتطلقها !.. قلها لحتى اعذبها هون.. فوق جنونها وعقلها الضارب طلعت خاينة !!.. أنا فوراً هربت برا الشقة وهمه لحقوني
الحلقة السابعة
نزلت بركض من البناية متل المجنونة وزوجي بصرّخ.. مع اندفاعات الناس وتجمعاتهم جنب الشقق قدرت أهرب منهم.. حاولت أدخل للأصنصير منعني إطفائي وقلي المصاعد ممنوعة.. كان محمد بلحقني بقوة بس أنا كنت بدخل بين الناس وبعيق طريقه لوقت ما وصلت الباب الأرضي الخارجي.. شفت تكسي بالحي.. ركبت فيه فوراً وحكيتله أمشي.. رجعت راسي لورا شفت محمد بدخل بسيارته بس الإطفائية كانت مسكرّة عليه.. وصلت لعند نانسي.. استغربت انه رجعت.. قلتلها ما بصدق!.. انتي تلحقينا وتصوّرينا وتبعتي الصور لأخواته!.. ليه عملتي هيك فهميني!!.. انتي وحدة واطية.. حكتلي مايا حبيبتي شو فيكي أهدي وفهميني.. فهّمتها وحلفتلي إنه ما دخلها وانه كيف بشك فيها بس عذرتني عشان وضعي.. قالتلي أنا أصلاً منعته يخليكي تروحي على البيت!.. كيف بتشكّي فيني!!.. حكتلي بدهم يوقّعوا بينا.. هدول بعرفو كل شي عنك!!.. وفجأة صفنت وقالت صح.. أنا في كتير اضافات وصلتني الصبح من بنات ما بعرفهم بس أنا ما بقبل الناس الغريبة!!.. حكيتلها فرجيني!.. قالت مبينين حسابات مزيّفة.. وهاد بدّل إنه هالبنات بحاولو يقرّبو مني ليعرفوني أكتر.. ويحاربونا ببعض!.. دخلت بنت للصيدلية شعرها أحمر ووجهها أبيض كتير.. ملامحها ناعمة !.. حكتلي نانسي عن أذنك أشوف البنت.. قامت وراحت تحكي معها وأنا متوتّرة وبتفحص تلفونها.. فتحت نانسي خزانة الدوا ولفت جسمها لورا لتدوّرلها على طلبها.. رفعت وجهي شفت البنت بتتطلّع عليّه وعيونها بتقلب للون أحمر.. فتحت تمّها.. فكّها كان شبه فك الحيوان المفترس.. عريض بسنان طويلة وصفرة.. أنا تشجنت من بعد ما رفعت عن شعرها وشفتلها قرون!!.. يلي خلّاني أصرّخ بصوت عالي بس سمعتها بتقول أنا بنت الجن يلي خرّبت حياتك.. أنا بنت الجن.. وابنك رح يكون منّا !.. تركت نانسي كل شي من إيدها وركضت لعندي وقالت شو صرلك مايا !!.. احكي معي ليه بتصرّخي.. فتحت عيوني شفت البنت صافنة فيّه وخايفة.. هربت من باب الصيدلية ونانسي قالت مشان الله فهميني شو فيكي!.. دخل وليد الصيدلية عصوت الصراخ.. وقال لنانسي شو فيها ؟!.. حكتله متشنجة مابعرف وبتشد على بطنها.. حكيتله بطني بتنحرق من جوا.. حاسة بنار جواتي.. قلّي ارفعي عن بطنك.. رفضت بس نانسي رفعت ملابسي بالغصب.. حاول يفحصني ليشوف اذا في شي على جلدي بحرقني أو لأ متل مابحكي.. دخل محمد زوجي الصيدلية وشاف كل شي.. هجم عليّه ومسك إيدي وقوّمني بالغصب.. وحكاله بحرقك لو قرّبت منها.. شدّني من شعري وأنا صرّخت.. نانسي حاولت تضربه وتبّعده بس رفسها للأرض ووقعها.. وليد دفشه لبرا.. صرّخ زوجي صرخة بصوت عالي.. الأغراض يلي بالخزاين كلها وقعت والأدوية تناثرت من كل جهة.. الباب طرق طرقة قوّية وسكّر.. وشفت نانسي بتتطلع عليه وخايفة وبتشد بإيد وليد.. بعّدو لبعيد ومسكني وفتح الباب وطلّعني.. قلتله مابدي أرجع على البيت!!.. رجعني عند أهلي.. دخّلني بالسيارة وقلي كنت عارف انك رايحة لعندها لتواجهيها.. ووعدتك أقتلك لو حاولتي تعرفي شي.. وصّلني على البيت وسكّر البواب كلهم وحبسّني بغرفة وحدة وحكالي بدك تعرفي وين البنات !؟.. البنات ماتو من زمان.. واذا مو مصدّقة روحي أحفري قبورهم وتأكدي.. حكيتله مستحيل أنا متأكدة إنهم عايشين وإذا مو كلهم وحدة أو تنتين منهم!!!.. قلي اعطيني المفتاح يلي نسختي عنه.. قلتله مو معي.. قلي مع مين ؟!.. احترت وقلت مع شروق.. ركض وفتح الباب.. طلع لبرا وخبط على بابها لقاه مفتوح.. دخل لجوا وشاف بيتها فاضي وحيطانه سودة من بعد الحريق!!.. عرفنا انها تركت البناية!.. رجعني على البيت واتصل مع واحد ليجي يغّير قفل الباب وتركني لحالي وطلع.. قعدت أفكر.. وقلت ليه لتتركني وتهرب!؟.. اذا هيّه انسانة سيئة ليه لتحاول تساعدني!؟.. صوت البنت يلي حكت معي بالتلفون رجع لذاكرتي.. برغم إنه ناعم بس مبيّن لبنت كبيرة بالعمر وإذا مألوف عليّه ممكن تكون هيه يلي حكت معي!.. بس منعتني أروح!!.. التعقيد ازداد وأنا صرت خايفة أكتر.. شفت قبر بإسم وحدة منهم ومحمد بحكي انهم ماتو.. وهمه ما إلهم أي أثر !.. طيب مين بعمل هيك معي!؟.. رنّت أسماء وقالت حمادة صار جوا بيت حماتك!.. قلتلها كيف شو عملتي!؟.. حكتلي مو حمادة عنده محل أثاث ؟!.. أنا حكيتله قصتك وفهمّته بالتفصيل!.. قلتله خدلهم خزانة كبيرة وقلّهم إنه انتو ربحتوها بسحب بالفيسبوك.. وحدة من بناتهم شاركت فيه!.. هوه بعتلي وقلي الموضوع مشي تمام.. حماتك اميرة مبسوطة والبنات شكّو بحالهم.. أنا قلتله مستغنية عن نص مهري بس ساعد اختي وجيب الأغراض يلي بخزانة البنات بأي طريقة.. هلأ هوه معه صحابه وقالولهم في شرط لتربحو قطعة تانية.. أنه ترتبو الخزانة بشكل منظّم لأنه رح يتم تصويرها متل ما تصوّر خزاين الناس التانية يلي ربحو متلهم!.. ورح يتصوّت عالصور بالصفحة ويلي رح يفوز بأجمل ترتيب رح يربح طقم كنب فخم!!!.. قلتلها حبيبتي مو معقول كيف قدرتي تفكّري هيك!؟.. حكتلي مافي وقت لازم نعرف كيف شكل الشنطة لأنه في مليون شنطة بغرفتهم!!.. قلتلها في جوا نفس الشنطة بغرفتي!!.. رح أصورلك ياها.. دخلت على الغرفة ونصدمت انه الخزاين مفتوحة.. الشنطة ما كان الها أثر أبداً.. لا بين ملابسي ولا بين ملابس زوجي.. حكيتلها اخدتها ميادة!.. متأكدة إنه هيّه يلي دخلت على غرفتي.. الشنطة سودة صغيرة.. بعتتلي صورة وقالت شوفي رتبو الخزانة وهدول اغراضهم.. قلتلها موجودة فوق عاليمين حاولي تجيبيها !!.. بس اذا ميادة اخدت يلي هون هيك صارو تنتين بشبهو بعض ويمكن تكون مو هيّه !!.. قالت بعتتله وهلأ رح يفتش الخزانة كاملة !.. اختفت وقت وبعدها بعتتلي حمادة ما برد عليه!.. أنا خايفة عليه يكونو شكّو فيه وطلبوله الشرطة.. حكيتلها أنا ماعدت صابرة تعالي لعندي جيبي واحد يكسر الباب.. بدي أروح أحرقهم حرق!!.. البيت خانقني أنا عم بموت هون.. كل شوي عم بتلمّس وبتطلع حواليه بحس في حد جنبي أو شي بشدني من إيدي وملابسي.. قالت حبيبتي هلأ انا وماما جايين لعندك.. حكيتلها احكي مع يوسف.. واحكيله انه زوجي نصب عليه بمشروع وانه واحد كذاب وكان يستغفله بكتير بالشغل.. واطلبي مساعدته.. اعملي أي شي بس طلعيني من البيت.. حكتلي دقايق وبحكي معك.. استنيت بالبيت وأنا واقفة بزاوية والظلمة بكل مكان.. ريحة بشعة بكل البيت وأنا صرلي مدة ما نظفت.. سمعت صوت طقة على الباب.. كانت اسماء وامي ويوسف.. حكالي ابعدي عن الباب رح نكسره.. بعدت وضربه ونكسر.. دخلو لعندي وامي حضنتني.. حكالي يوسف الكلام صحيح ؟!.. قلتله صح زوجي واحد قليل أصل ونصب عليك كتير.. أنا بدي تساعدني بترجاك.. اوقف معي ما عندي لا خوان ولا حدا وهوه واقف مع امه واخواته.. حكالي أنا معك ورح ننتقم منه.. بس كلام اختك صحيح.. انتي مسحورة ؟!.. حكيتله ايوه.. مابعرف شي محتارة والموضوع تعقد كتير.. كان في جارة هون اختفت بعد حريق الزبال بصندوق الزبالة.. بس أنا معي رقم الشيخة يلي بعتتني عندها.. قلي بنروح عندها.. حكيتله مو قبل لنجيب الشنطة.. رحنا كلنا بسيارته لبيت حماتي اميره وبقينا بالسياره على أمل انه ينزل حماده ويجيب الشنط.. بس ماحد نزل وما كان برد.. قالت اسماء اكيد بلغو عنه.. انا طالعه لفوق.. قلها يوسف لوين صعب تطلعي.. هدول ناس ما برحمو.. خلونا نستنى شوي كمان.. وفجأة وصلني اتصال من وجد اخت ميادة.. بتقول باعته تنين يسرقو الشنط ؟!.. بدك تنتقمي من البنات لأنك مفكرّة انهم سحروكي؟!.. في شي انتي مابتعرفيه نحنا عرفنا انهم ماتو.. واكيد هلأ روحهم يلي بتعذبك.. انقلعي من حياتنا.. واحكي لأختك انه حبيبها صار بالسجن.. صرخت الله يلعنك يا واطية!!.. نزلت من السيارة لفوق لعندهم وفتحت الباب وصرت أتوسّللهم انه يعطوني الشنطة لأنه خلاصي بالشنطة يلي فيها اغراض البنات.. قلتلهم لازم أعرفهم والله انا بنت كويّسة افهموني همه يلي فرّقو بينا !!.. قلي حماي محمد قال لاخواته انه البنات ماتو وانه ما يعطوكي الشنطة!.. حكيتله ارجوكي عمي!.. حكالهم اعطوها الشنطة!.. صرخت ميادة لأ!.. صرخ بوجهها ودخلت لجوا.. واعطوني ياها.. تفقدت لقيت الأغراض نفسهم.. الساعة والجكيت والبلورة وحتى المشط بقي بجيبتي.. كنت مبسوطة كتير!!!.. شكرته وابتسمتله وقلتله انا حامل في حفيد رح يجي عن قريب!.. قالت حماتي ما رح تحلمي تمسكيه بس يجي.. قلي حماي الشباب يلي دخلو هون ما بطلعو من السجن لأنهم اخترقو حرمة بيتي!.. وانتي اخدتي يلي بدك ياه.. طلعت من البيت وأنا مبسوطة.. الشنطة معي بس اسماء قلبت عصبية وحكتلي حياتي تدمرت عشانك!!.. هلأ ما رح يتزوجني.. خرب كل شي بسببك!!.. قلتلها لا تقولي هيك.. أنا أهم منه!!.. أنا أختك!.. تركتني ومشيت وامي لحقتها وقالتلي خدي بالك من نفسك.. وبس تخلصي من عند الشيخة يلي قلتي عنها تعالي لعنا فوراً.. بيت زوجك مابترجعيه لو بدك تتطلقي!.. ركبت مع يوسف ووصلنا لنفس البيت.. كان في عمال بناء.. قلتله هون بيتها والبيت اصلاً بنبني لسه وعالعضم من تحت.. يوسف كان شخص ذكي وحسيته ما ارتاح.. حس في شي!.. قلي تعالي.. دخلت معه ووصلنا البيت من جوا.. قلت لعمال البناء.. مدام زهراء وين!؟.. قال واحد مين!؟.. نزل واحد مابعرفه من درج من الطابق التاني يلي فوق.. البيت الجاهز.. قال مين بدكم تفضلو.. حكيتله في مره اسمها زهراء ساكنه مع بيتها وزوجها بالبيت يلي تحت.. أجار عندكم صح؟!.. قال هاد بيتنا يلي تحت وانا ابو خالد.. ويلي فوق كمان بيتنا.. مابنعرف وحدة اسمها زهراء انتي مخربطة بالعنوان.. حكيتله مستحيل.. دخلت لجوا وصرت بتطلع.. نفس البيت بس نصه بنبنى!!.. نفس الكنب نفس المكان!.. قلي بيتنا صدقيني.. ولادي الشباب بنزلو بسهرو اوقات مع صحابهم تحت.. بس ما بعرف صرلهم فترة مو مرتاحين للمكان وبطلعو منه.. حكيتله ممكن احكي مع حد من ولادك.. نزل ابنه خالد وسألته شو بتحس!.. قلي بنخنق وبطلع فوراً انا وصحابي وبنحس في شغلات غريبة بتمشي متل خيالات أو أشخاص بتطلعو علينا من البلور برا ونحنا بنكون بنلعب شدة!.. يوسف قال خلص شكراً.. امشي معي.. حكيتله لسه ما فهمت!! شو هالحكي مافهمت!.. قال مايا.. أنا صحيح مقاول.. بس بقرأ كتير.. أنا شخص مثقف.. تقريباً يلي شفتيهم وحكيتي معهم مو بشر!.. يلي تواصلو معك ودخلو بيتك همه جن على هيئة أنس!!.. متشكلين على شكل أشخاص يمكن يكونو عايشن بنفس الهيئة بس همه جن!!!.. حكيتله بس كانت تساعدني! عملت المستحيل لتساعدني!.. قلي جابتلك سيرة قرآن أو آيات أو شي من هالقبيل تعمليه لتشفي!.. قلتله لأ.. بس كانت تفهمني وتشرحلي وقالت ضلي بالبيت!.. حكالي كانو جن!.. رجعت بذاكرتي لورا.. تذكرت البنت نايا لمّا كانت ترسم وقالتلي ارسميلي شكل هون.. وكان مكتوب كلمة نجران وحرف الألف مكرر تلات مرات!.. قلتله شو معنى نجران ؟!.. قلي نجران بتكون مدينة بالسعودية
يتبع..
يتبع..
الحلقة الثامنة
وصّلني على بيت أهلي.. حكيتله اذا سألني زوجي مع مين كنت رح أقله معك.. حكالي وأنا ما عندي مانع.. كنت حاسس إنه حاسابات الشركة فيها غلط خصوصاً إنه كنا شركاء بالأول.. بس ما توقعت يطلع هوه ورا هالاختلاس والنصب!!.. حكيتله أنا خايفة كلامك خوّفني!.. قلي مايا أي شي بدك ياه لا تترددي تحكي معي.. رقمي معك.. وأنا ما رح أتردد أساعدك وأوقف جنبك.. امي قالتلي ما رح أسمحلهم يوخدوكي لو على جثتي!!.. دخلت على الغرفة كانت أسماء معصبة.. قلتلها يلي قلّي ياه يوسف.. خافت ونصدمت وقالت بسم الله أعوذ بالله !!.. نحنا شفناها وحكينا معها !!.. بدي أفهم كيف نحنا كنا نتكلم مع جن!.. هيه دخلت بيتك وصار بينكم كلام!.. بس كل شي عملته كان بوحي انها بدها تساعدك ما كانت بدها تأذيكي!.. قلتلها هاد يلي محيّرني بس حتى هالشي مو متأكدة منه لأنه كان معها مفتاح بيتي.. مابعرف اذا هيه دخلت حطّت شي أو لأ.. وما بعرف اذا هيّه حرقت الزبال وولعت الشقق لتهرب.. متل ما بتعرفي الجن قادر على انه يولع النار بأي مكان لأنه مخلوق من نار.. وأنا هلأ استوعبت يلي صار !!.. بس بدي أقلك شي.. أنا حاسة بشعور.. قالت شو!.. قلتلها حاسة انهم لسه موجودين جنبي.. عم بحس إنهم معي برغم انه اختفو وطلعو متل ما قلتلك!.. قالت لا تخوفيني.. أنا ما صدقت وهربت من بيتك.. مايا بيكفي يلي صرلي بسببك.. حمادة لسه بالسجن!.. وفجأة سكتت وقالتلي وجهك باهت وشكلك كتير بخوّف.. قمت بسرعة عالمراية وشفت حالي.. كان فعلاً شكلي غريب.. ضعفانة ووجهي باهت.. وحتى شعري مقصّف.. قالتلي تعالي في شي على شعرك.. انتي صابغتيه ؟!.. قلتلها لأ.. حكت في شعر من شعرك لونه غريب.. شعر أحمر.. خصل خفيفة كتير بس أنا بدقق وقادرة أشوف.. قلتلها لأ مستحيل.. شو معنى هالحكي!.. قالت شو !؟.. حكيتلها أنا يعني بتحوّل؟!.. وجهي ولا كأنه وجه مايا.. وفعلاً شعري أحمر.. أنا لازم أحل اللغز يلي كان على دفتر نايا !!.. ولازم أنشفى قبل لأموت وما أشوف ابني.. بدي أعرف مين خرّب حياتي.. بدي أعرف هدول كيف أجو وليه صار هيك وخربت حياتي كلها !!.. قالت أسماء.. شو اللغز ؟!.. حكيتلها بنت زهراء.. يلي ما بعرف اذا هيّه جن على هيئة أنس.. كان مكتوب نجران وحرف الألف مكرر تلات مرات.. قالت متل ما قلك يوسف.. نجران مدينة بالسعودية صح.. بس في شي ممكن يكون صح كمان.. سألتني شو أسماء البنات ؟!.. عددتلها ياهم.. حكت كل حرف من هالكلمة مأخوذة من أسم وحدة منهم.. النون ناديا.. والجيم جنين.. والراء رؤى.. والألف الأولى ايناس.. والتانية ايثار.. والتالتة ابرار والنون الأخيرة من الممكن تكون حرف من إسم نايا !.. يمكن عم تساعدك بهالكلمة لشي وختمتها بإسمها !!.. حكيتلها معقول بس أنا خايفة أسماء.. فهميني شو فيها مدينة نجران !.. حكتلي مدينة بجنوب السعودية فيها اثار المنطقة الأخدودية اللي ورد ذكرها بالقرآن الكريم في سورة البروج.. هالمنطقة زراعية وفيها نخيل وسد ماي.. معقول اذا رحتي هناك يكون شفائك وكل يلي صرلك يزول عنك!.. لا تنسي يا مايا انه زوجك أخدك على تايلاند شهر العسل!.. عارفة شو يعني مدينة تايلاند!.. مدينة الفسق والفجور!!.. ممكن المكان هناك سببلك انتكاس وخراب لأنه بسمع انه فيها مناطق ملعونة من كتر قلة الأخلاق والدين.. وهالمدينة يلي بالسعودية مدينة طاهرة يعني ممكن تكون خير لإلك لو رحتيها !.. قلتلها محمد حكا كلام غريب وقال انه ابوه ساكن بأرض العمارة والهند موطن لإله والكاهن اعز شخص عنده !!.. حكتلي واضحة.. يلي حرق العمارة بكون ابو الجنية يلي لابسته وبتحاول تفرق بينكم وبجوز فعلاً سكن الاساسات بالمكان يلي بوصّل صندوق الزبالة.. وشروق ما بعرف شو دورها اذا هالشي صحيح!.. والهند!..عارفة بس ذكرت كلمة فيلم هندي شو صار جوا بيتك!؟.. قلتلها شو المعنى؟!.. قالت الجنية من ديانة الهنود ولا تنسي انه مدينة تايلاند دولة بتقع بجنوب شرق آسيا في شبه الجزيرة الهندية الصينية !!.. يعني نص سكانها هنود كمان!.. زوجك كان طبيعي وقت تركك ورجع تخربط ونجن وتصرفاته صارت مو طبيعية وظهرت الجنية يلي شفتيها أول ما رجع للغرفة صح!.. قلتلها قبل ما يرجع الغرفة نقلبت وانا نقلبت نفسيتي!.. حكتلي هاد الوقت يلي صار فيه هالشي!.. زوجك عمل شي بالساعة يلي غاب فيها.. باللحظة يلي كان مشغول فيها نقلب كل شي!.. شكيت يكون القتل بالفعل!.. انه قتل شخصين سببوله لعنة!.. ولهيك تردد علسانه كلام غريب بلهجة غريبة وهلأ تأكدت انها هندية.. اسماء كانت ذكيّة بس في شي بقي ناقص.. كلام زهراء يلي ما غاب عن بالي.. بإنه في أذية تانية.. حكيتلها ممكن زهراء جنية طيبة!.. مو في جن سيئين بأذو وفي لأ !!.. حكت أنا خفت خلص قفلي السيرة.. قامت وفتحت الشباك.. وأنا توترت وبقيت أفكّر للوقت يلي رن فيه الجرس.. كان زوجي على الباب.. بخبّط ومنجن.. قال وينها بدي ترجع على البيت.. منعته امي بس دخل وشحطني وقلّها لا تتدخلي.. مرتي وأنا حر فيها.. بترجع على البيت والا بحرق هالبيت فيكم.. هيّه خدامة عندي وبدي أذلها متل ما استغفلتني وراحت مع واحد بمنطقة مهجورة!.. قلتله وليد بكون الشب يلي خطب نانسي صاحبتي!.. رحت لأخلص حياتنا من الجحيم يلي صار بسببك يا نسونجي!.. حكالي رح تندمي.. قلتله أنا أصلاً مو فارق معي وكنت مع يوسف صاحبك من شوي.. ولو عرفت شو صار بينا رح تنصدم!.. امي صفنت وهوه سحبني من إيدي لبرا.. طلعت ببكي وهوه صرّخ بأمي وناداها بإسمها.. غالية بحرقك لو قربتي من بنتك!.. وكان ماسك راسها وهوه بحكي.. امي داخت ووقعت وأسماء حاولت تضربه بس شد رقبتها بأصابعه ونفخ بوجهها
الحلقة التاسعة
حسيته بأذيهم.. تذكرت كلام زهراء بإنه رح ينأذو عيلتي!.. زوجي يلي بأذينا.. وأنا شو حيصير فيني لو رجعت معه!.. أنا رح انتهي بالبيت أكيد !!!!.. أخدني من ايدي وطلعنا وما عرفت شو صار بأمي وبأسماء.. وصلنا البيت.. رجع دخلني جوا وقلي الكاميرا لسه موجوده أي تحرك أي حدا ممكن يدخل البيت رح أشوفك.. كان بهددني وبصرّخ بوجه أحمر وعيون حادة النظر.. شلح الجكيت وساعته ليعرف يصرّخ بوجهي.. وقلي آخر مرة بحبسك هون المرة الجاية رح أقتلك لو حاولتي تفتحي الباب أو تكسريه !.. وأنا كنت عم بشم منه ريحة العطر وبهاللحظة عرفت انها هيّه.. هيّه يلي ساكنته وهيّه يلي بتحكي.. العطر الصناعة الهندية يلي قالتلي نانسي بتستخدمه خدامتهم هوه عطرها !!.. زوجي مظلوم!.. متأكدة إنه كان طعم للعبة وسخة من هالبنات ونحنا بتايلاند !!.. نتقمو منا فيها من خلال الكاهن يلي قال عنه!!.. لو ما انقذته رح ينهيني قبل لأنقذ نفسي!!.. طلع من البيت بدون سابق أنذار.. وأنا بقيت بالغرفه وغروب الشمس بدا يظهر.. حكيت مع اسماء وتطمنت عليها قالت نحنا كويسين بس امي عم تحس بإرهاق.. حكيتلها ضلي طمنيني بس بدي منك تحافظي على الشنطة يلي فيها الأغراض والمشط.. قريباً رح انهيهم!.. وفجأة لمحت عالسرير جكيت محمد.. طلع ونسيه!.. مسكته وفتشته لقيت تلفونه فيه!.. حكيتلها بحكي معك.. حاولت افتحه كان عليه كلمة سر برقم.. جربت تاريخ ميلاده ما زبط.. اخر رقم من تلفونه كمان ما زبط.. اجا براسي احط تاريخ زواجنا !!.. برغم اني ما كنت متوقعة النتيجة إلا أنه فتح!.. استغربت كيف لهلأ حاطه!.. فتحت التلفون ولأول مره بمسكه لأنه ما كان جاي ببالي أفتشه أبداً بسبب ثقتي فيه!!.. دخلت على الرسائل.. لقيت رسائل كتير من أرقام غريبة ومكالمات من نفس الأرقام بس كلها مو مسجّلة.. احترت على مين ارن !!.. تركت كل شي ودخلت على الصور !!.. شفت صور اله مع بنات بأوضاع مريبة !!.. والرسائل كانت نفس الشي.. بس يلي شد إنتباهي صورة مع بنت مخيفة وشكلها مقزز!!.. باينة مو عربيّة.. فضولي شدّني لأدخل على التاريخ لأنها من آخر الصور.. ويلي لاحظته انها كانت بآخر يوم النا بشهر العسل بتايلاند !!.. تدمّرت وما كنت متخيّلة يوصل معه لهون!.. تركت الصور ورجعت على الرسائل.. قرأت رسائلة كلها ويلي عرفته انه البنات على تواصل معه!!.. البنات نفسهم يلي ما قدرت ألاقيلهم أثر !.. بعتت رد لوحدة طلبت تشوفه.. وقلتلها بشوفك بس وين ؟!.. ردت كيف كلّفت نفسك ترد عليّه ؟!.. حكيتلها جاوبيني وين أشوفك !!.. قالت تعال على البيت ولا نسيته !!.. احترت شو أرد وقلتلها بيت المقبرة.. بدي احكي معك لحالنا.. قالت أي بيت مقبرة ؟!.. انا ايناس مو ايثار !!.. تعال هلأ على بيتي بستناك.. احترت وين بدي أشوفها !! وخفت تشك.. قمت بسرعة واخدت التلفون.. حاولت أفتح الباب ما قدرت لأنه غيّر القفل للمرة التانية من بعد ما خلعته.. قلت ما الي غير يوسف!.. رنّيتله وحكيتله تعال على بيتي.. لازم تخلع الباب مرة تانية.. أنا قدرت اوصل للبنات.. طلع بعرفهم وبتواصل معهم.. تصوّر قديش حقير !!!.. حكالي مسافة الطريق.. نزويت بالغرفة.. بين نظرات على الأثاث والغرف ونظرات على الباب.. كنت بسمع أصوات بتطلع من جوا.. وكل ما اقرب رجلي تختفي الأصوات.. الكرسي بهز بشكل بطيء والستارة بتفتح.. وصوت ضحك خفيف مسموع طالع من الحمام.. قرّبت منه ما سمعت شي.. توقعت من الجيران يلي تحت.. بس كان الصوت لولد صغير.. الصوت قلب لصراخ وصوت ضحكة البنت المزعجة رجع بدماغي.. ما قدرت أتحمل الأصوات وكل ما تعلى وجع ببطني يزيد !!!.. تلفوني رن.. قلي يوسف انا برا.. رح أكسر الباب.. بقي يضرب عليه لفتح.. قرّب مني وقلي شو فيكي!!.. الباب كان مفتوح بس ايده مخلوعه والأصوات راحت بس وجعي ما راح.. حكالي بسرعة ما في وقت انتي تعبانة ودايخة.. تطلعت على الباب لقيت زوجي جاي.. عرفت انه رجع يوخد تلفونه بس شفت صدمته بس شافني مع يوسف على الأرض.. قرّب منا وفجأة الباب تسكّر بقوة
الحلقة العاشرة
عيونه كانت بتقدح شرار.. وسأله شو بتعمل جوا بيتي ؟!.. قله بدي أساعد مرتك لأنها ما بتستاهلك واخدت واحد خاين ونصاب ونسونجي!.. قله انت ما كنت تساعدها انت كنت معها جوا بالغرفة وأنا شفتكم بالكاميرا !.. حكيتله انت فعلاً مجنون.. ابعد عني.. شدّنا بإيده ووقعنا وبهاللحظة شفت شي بتحرّك وراه.. أول ما قرّب ظهرت الجنّية.. حكيت ليوسف الجنيّة جنبه وبتأثّر عليه.. قلي ما في حدا.. حكيتله صدقني.. بقي زوجي يحكي خاينة وأنا أحاول أوصل الباب بس وجع بطني يزيد.. لوقت ما حاول يوسف يضربه بس إيد محمد كانت أقوى!.. ووجّعه.. مسك يوسف الكرسي الهزاز وخبطه براسه.. نزل دم من جبينه وأنا قلتله طلقني يا مجنون.. بس خفت يحكيها لأنه كنت مفكّرة لآخر لحظة إنه كل شي عم بصير ما اله دخل فيه.. بس وجود البنات كان يقول غير هيك.. صرت بشم ريحة دخان بتطلع من الفرش لوقت ما ولّعت أول كنبة.. صفن يوسف فيه وقلي فعلاً زوجك متل ما قلتي!.. خلينا نطلع.. كان محمد بتحرك وبمنعنا وشايفة الجنيّة بتتحرك بنفس الاتجاه وبنفس حركاته!!.. وبهاللحظة ما كان بإيد يوسف إلا يقرأ قرآن وأدعيّة بصوت عالي.. كل ما كان يقرأ كان محمد برجع لورا وهيّه بتنتفض وبتتطلع عليّه بعيونها البيضة وبتشد عسنانها.. رجع لآخر الغرفة وهوه حاطط إيده على راسه وجسّمه وهيّه بتبعد عنه وبترجع تقرّب.. بهاللحظة تحوّل وجهها من بنت طبيعية لجنيّة خالصة!.. نفس الشكل يلي تهيألي بالبنت يلي كانت بالصيدلية عند نانسي تماماً.. بنت شعرها أحمر طويل بقرون شبه قرون التيس.. وسنان شبه سنان الحيوان المفترس.. عيون حمرة عريضه بالطول وجسم كامل بلون أسود.. كنت شايفتها بوضوح والبيت كان بولّع.. حكالي الكنب بولّع والبيت رح يحترق.. فتحنا الباب.. قلتله ما بتركه جوا.. خلينا نوخده.. قلي لابسته لبس بدك يلحقنا ويولّع فينا !!.. حكيتله بترجاك.. وأول ما فتح الأصنصير.. طلعلنا زوجي يصرّخ من الباب وشكلّه مخيف.. كان شادد على إيديه وبعصر فيهم كأنه بده ياكلنا !!.. نزلنا بالأصنصير بسرعة قبل ليلحقنا.. طلعنا من البناية وركبني بسيارته.. قلّي تلفونه معك صحيح ؟!.. حكيتله معي.. بسرعة على نفس المكان يلي قالت عنه.. لازم نشوفها.. بعد ما حكيت مع ايناس بالسيارة.. طلبت منها أشوفها بمكان تاني.. على أساس زوجي بكلمها ومستعجل ما فيه يجي على بيتها.. قالت طيب.. ووصفتني مكان.. استغرب يوسف وقال شو هالمنطقة يلي قالتها.. قلتله بتقول في كوفي شوب كانت تروح معه زمان فيه.. وموجود جنب محل ميكانيك سيارات!.. قال كوفي شوب ومحل ميكانيك!؟.. قالت جنبه تماماً.. وادخل جوا واستناه !!.. مشينا مكان ما قالت تماماً.. وأول ما وصلنا ما لقينا كوفي شوب!.. لقينا مقبرة!.. حكيتله شو بصير !.. صار يحكي محل الميكانيك جنب المقبرة !.. شو قصدها لشو بدها توصل!.. حكيتله بدي انزل.. اقسم بالله اذا بشوفها لأقبرها فيها !.. حكالي استني.. قمت بركض ودخلت المقبرة.. هدوء.. وهوا خفيف والجو غائم وأنا مو فاهمة شي.. تطلّعت ناحية محل الميكانيك لقيت قبر قبال وجهي.. شكله جديد وباين في حد باقي يسقي تربته.. قرّبت منه لقيت اسم ايناس!!.. يوسف دخل وحكالي مايا وينك!.. حكيتله ايناس!.. مين يلي كان بحكي معي!.. ايناس ميّته!!.. حكالي شو هالقصة!!.. لأ الموضوع غريب وأنا بدأت أتوتر !!.. بعتت رسالة وينك؟!.. أنا بالكوفي شوب وصلت!.. قالت ادخل جوا.. حكيت دخلت.. وبعدها بطلت ترد.. قلتله معقول يلي بفكّر فيه صح!.. زوجي قتلهم!؟.. زوجي قاتل صدقني!.. بس مين بحكي معي!.. قال لأ لأ.. حكيتله طيب بدي أتأكد من شي.. رحت بسرعة وصرت بحفر القبر بإيدي وبأظافري.. مسك يوسف إيدي وقلي شو بتعملي!! رح ننفضح.. اذا حدا شافنا رح يسجنّا.. خلينا نطلع ما فينا نعمل شي!.. طلعنا وانا حاولت أرن على رقمها بس ما ردت!!.. صرت بفتش بالأرقام والرسائل التانية.. نفس الأسماء يلي حكو عنهم ميادة ووجد.. لوقت ما قرأت بين محادثة اسم جنين!!.. قلتله الله يخرب بيته شو طلع نسونجي وحقير.. أنا شو عملت لحتى يصير فيني هيك بسببه !!.. قلي أصلاً بيته نخرب وهوه يلي خرب بيته بإيده.. قلتله كنت ظانه فيه خير لآخر لحظة بس بعد يلي شفته بتلفونه كل شي بقول انه واحد واطي.. بس بدي أنقذ نفسي من يلي صار فيني وبعدها أتطلق.. صار يوسف يفكّر.. وأنا بحكي وبحكي.. قلّي أعطيني التلفون.. اخد التلفون وغيّر الطريق.. حكالي أكيد زوجك هلأ بدوّر علينا بس نحنا رح نروح على مكان ما بتوقع انه نروحه.. حكيتله وين ؟!.. وصلني على بيت حماي.. وأنا مستغربة.. قلي أنزلي.. اخواته بعرفوهم منيح.. حكيتله لأ ما بنزل عندهم رح تثبت التهمة علينا.. حكالي ما تخافي انتي معي وأنا رح أتصرف.. فتحنا الباب.. حكت حماتي أميرة مين يلي معك!.. حكيتلها بدي أشوف ميادة ووجد بترجاكي.. قالت لبرا.. وقحة وخاينة وفعلاً انه محمد معه حق.. رح أخليه يطلقك بعد ما تخلفي !!.. حكيتلها اعملي يلي بدك ياه بس خلينا نشوفهم.. حماي قلها خليهم يدخلو.. حكاله يوسف.. ابنك ممسوس بالجن.. صدقوني في جنيّة لاحقته ولابسته ورح تنهيه.. أنا شفت كل شي بعيوني صدقوني.. حكتله أميره احلف!؟.. حلفلها وقلها لحقنا والبيت احترق.. الحريق يلي صار سببه هالجنيّة.. خافت حماتي اميره وحكت لزوجها وانا حاسه بتصرفات غريبة معه.. بس لأ.. هيه المجنونة.. من أول يوم وصلو من السفر وتصرفاتها غلط.. نسيتي شو عملتي فينا بالأكل ويلي شفناه بغرفة النوم!.. انتي المجنونة وبدك تحطيها بإبني عشان تخلصي.. دخلو ميادة ووجد وحكو بدها تنتقم منه!.. بدها تطلعه مجنون عشان علاقاته.. اخونا كان بعرف بنات كتير.. بس بحياته ما قلكم.. هيه عرفت وهاد انتقام!!.. حاولت تطردني حماتي بس حماي حس بشي غريب!.. قال أنا حاسس انه التنين فيهم شي.. وجهها وشكلها بقول غير هيك!!.. انتي تعبانة !.. حكيتله أنا رح أموت عمي بترجاك اوقف معي!.. حكا لميادة ووجد مين البنات يلي بتعرفوهم!.. حكو بنات عرفهم كانو ست بنات.. واغراضهم يلي كانو بالشنطة.. وهوه تهرب منكم لحتى ما تسألوه.. وقال انه الشنطة خربطو فيها بمطار تايلاند بشنطة تانية.. بس ما كانت هيك!.. الشنطة يلي اخدناها من بيتهم هيه الشنطة يلي جابلنا ياها.. صارت تحكي ويوسف يستفسر منها.. قال حماي البنات همه يلي أذوهم.. وبلعبو معهم لعبة وسخة.. حكيتله محمد بتواصل معهم!!.. هوه بعرفهم بس يلي صار اليوم غريب ومش مفهوم.. رحت المكان لقيته مقبرة برغم انها مفكّرة أنه محمد هوه يلي بحكي.. أنا خايفة يكونو عنجد ميتين ويلي بصير لعنة أرواح!!.. لأنه سمعت كلام وجد وميادة قالو انه ظروفهم كانت صعبة وأذاهم كتير.. قال ياخسارة تربايتي فيه.. بلعب ببنات الناس!!.. قالت وجد هدول مو بنات ناس.. هدول بنات بلا شرف!.. ميادة جابت جهاز الكمبيوتر القديم يلي اله وفرجتهم الصور.. وفجأة رن تلفون يوسف.. قال يوسف أختك أسماء!!.. اخدت التلفون ورديت قالت ليه ما بتردي عتلفونك؟!.. حكيتلها لحتى محمد ما يلاقيني شو في!؟.. قالت عرفت مين البنت!.. قلتلها بتحكي عنجد!!.. قالت ايوه البنت اسمها رؤى.. ومره وانا وحماده شفناها مع واحد وقلي إنها بنت عاطلة.. ومن بعد ما استجوبته وقلتله كيف عرفت !.. قلي انها كانت تعرف صاحبه وهوه كشفها انها سيئة وتركها !!.. حمادة طلع من السجن وشاف الصور وتذكرنا سوا !!.. حكيتلها اعطيني رقمه.. اخدت رقمه وحكا يوسف معه.. قله بعرف بيتها وساكنه بشقة مع وحدة.. حكيت لحماي شكراً عمي لأنك صدقتني قبل لأجي وطلعت الشب يلي رح يخطب أختي من السجن!.. قلي يوسف ما في وقت يلا !!.. لاقينا حمادة بمكان.. واخدنا على الشقة من بعد ما تواصل مع صاحبه وعرف تفاصيل أكتر.. طلعتلنا بنت وقالت مين انتو!.. ادخلو بنتفاهم جوا بس هي شو بتعمل معكم !؟.. قال يوسف هلأ بتعرفي.. دخلنا للشقة.. وحكت ايوووه فهمت.. جايبينها تشتغل !؟.. بس نحنا هون ساكنين.. الشغل بمكان تاني.. قلها سمعنا في بنت حلوة اسمها رؤى.. هي صورتها لابسة احمر.. قالت صح شريكتي بالسكن وبالشغل.. وفي غيرها انتوا اختارو.. حكا وينها ؟!.. وفجأة فتح الباب ودخلت.. تطلعت فينا وقالت مين؟!.. حكها معها يوسف وفجأة ضربها وشد على إيدها مع حمادة وأنا قلتلها مين انتي وشو بدك مني انتي ويلي معك!؟.. خبريني وينهم!!.. بدي اعرف ليه خربتو حياتنا !!.. قالت أنا ما بعرفك ومو فاهمة شي!.. حكيتلها انا مرته لمحمد هاد!!.. ولا رح تنكري صورك معه!.. قالت ايوه موضوع قديم وزوجك كان زمان يتردد لعنا.. حكيتلها البنات هدول بتعرفيهم؟!.. قالت لأ.. مين هدول!.. حكيتلها هدول اخوات صحيح.. ايثار وابرار والهم صاحبة اسمها ايناس!.. همه بالفعل ماتو !؟.. حكت صدقيني ما بعرف شي.. اذا زوجك هيك معناته مو بس كان بعرفني.. كان بعرفني وبعرف غيري وعشرة قبلي ويمكن عشرين بعدي.. أنا شو بعرفني!!!!.. تطلعت بيوسف نظرة ضياع وتشتت وإستغراب وفجأة دخت ووقعت على الأرض
الحلقة الأخيرة (11)
بعد وقت قصير لقيت نفسي بالمستشفى.. وفي دكتور جنبي ويوسف معه.. حكا أنتي بأول حملك ووضعك كتير صعب.. في تفاعلات بجسمك بتصير مو عارفين سببها بتأثر على الجنين ولهيك لازم تنتبهي.. في أدوية كتبنالك عليها إذا أخدتيها ممكن يوقفها.. بس لو ما توقّفت.. قلتله شو ممكن يصير!.. حكا بنزل الجنين أو بيجي مشوّه.. طلع وبقيت مع يوسف.. حكالي لا تخافي ما بصير شي!.. قلتله أنا بالفعل مسحورة.. أنا حياتي كلها تدمرت وصعب ترجع متل الأول.. ويلي رح يجي لسه أصعب من يلي مضى.. انت روح واتركني لحالي.. خلص ما بدي أسببلك مشاكل أكتر.. بس خد بالك من محمد لأنه لو شافك ممكن يأذيك.. أنا اسفه.. قلي لا تحكي هيك أنا ما صدقت وصار هيك لحتى أساعدك.. حكيتله شو قصدك!.. انت مبسوط باللي صارلي؟!!.. قال لأ بس أنا.. حكيتله كمّل!.. انت شو!؟.. قلي أنا كنت معجب فيكي بالوقت اللي تعرّف عليكي محمد فيه وخطبك.. وبصراحة حسدّته عليكي.. لأني كنت بعرف قديشه شخص نسونجي وكذاب وما بستاهلك.. انتي بتستاهلي شخص يقدرك ويحبك ويكون صادق واهم شي يحترمك وما يخونك.. انتي وقعتي مع الشخص الغلط صدقيني.. أنا الشخص الصح!.. أنا متلك محترم وبخاف الله وأنا يلي بستاهلك!.. حكيتله لا تفكّرني الشخصية المثالية اللي ما في متلها بالوجود لأنك ما بتعرف شي.. ولا حتى محمد بعرف!.. أنا كمان كان عندي علاقات.. وكنت بحب واحد زمان كتير وطلع كذاب وخدعني وضحك عليّه.. أنا كنت مفكّرته غير وسلّمته نفسي وكنت معه متل المتزوجين لأني فكّرته رح يتزوجني.. فكّرت محمد الشخص الكامل يلي رح ينقذني من هالضياع وشفت فيه الشخص الشهم والطيب والغيور.. عالجت نفسي ومشيت معه وطلعت من الجامعة ليتزوجني ونسيت الموضوع.. بس يلي عرفته بعدين خلاّني أعرف إنه كل هالشي كان عقاب لإلي بسبب يلي عملته.. هالحكي حتى اختي اسماء ما بتعرفه.. أنا قلتلك لتبعد عني ولحتى لا تفكر الناس ملائكة لأنه الناس من برا شي ومن جوا شي تاني تماماً.. أنا مو سيئة بس مغفلة وحظها طلع سيء للمرة التانية.. قلي بتصدقيني إذا قلتلك انه كل يلي حكيتيه ما بهمني!.. أنا عنجد بحبك وكنت بحس بشعور قوي تجاهك لمّا كنت اشوفك.. بس منعت نفسي لأنه صاحبي ومتل أخوي وكان شريكي بالشغل ولأني كنت أشوفك مبسوطة معه !!.. حكيتله بعد كل شي حكيتلك ياه !!.. قلّي بعرف انك حدا منيح ويلي صار معك غصب عنك.. مستحيل يجي يوم وأحاسبك عليه لأني بعرف انه نحنا بالنهاية بشر وصعب يكون فينا حد كامل وما يغلط بحياته.. صدقيني أنا بحبك ورح أعمل أي شي لأنقذك وأخلّصك من هالملعون الشرير!!.. حكيتله إذا حابب تساعدني خدني على السعودية!!.. استغرب وقال ليه !؟.. حكيتله متأكدة الخلاص هناك بمدينة نجران.. احساسي بقلي أول ما أوصل هالمدينة رح أشفى.. وهوه خلّيه يولّع مع يلي لابسته.. ما بهمني أبداً.. قلي وإذا كان مجرد إحساس وما صار شي.. قلتله في علامة.. خليني أجرب أوصل هناك لأعرف شو رح بحس وبوعدك أفكر بكلامك.. وفجأة رن تلفونه.. حكيتله مين!.. قلي أختك أسماء.. رد عليها.. حكتله حمادة عرف كل شي!.. عرف وين مكان البنات.. رؤى كانت كذابة هوه ما صدقها وضل وراها لكشفها وين بتروح!!!.. حكيتله بدي أقوم.. أنا بدي أشوفهم وأحكي معهم.. نادى الطبيب وحكاله فيك تخرجها بس ضروري تلتزم عالأدوية ولازم تراجع لنعرف إذا في تأثير للدوا على التفاعلات بجسمها أو لأ.. شكره وطلعت معه وبقي ماسك بإيدي متل كأنه ماسك طفل صغير.. بالسيارة قليّ وعدتك أساعدك وما بتركك لو متت.. اوثقي فيّه.. شفنا حمادة وطلع بالسيارة.. قال كنت متأكد انها كذابة لأنه صاحبي قلّي انها مو هيّنة.. بس ما توقعت تكون قذرة لهالدرجة!!!.. حكا يوسف رح أنزل على محل هالألعاب دقيقة.. سألته ليه ؟!.. قلي هلأ بتفهمي.. استنيناه ونحنا بحالة توتر.. رجع ومعه كيس صغير.. حكا جبت مسدس لعبة بس باين حقيقي تماماً.. إذا ما خافو ما رح يحكو شي!!.. وصلنا للبيت يلي قالو عنه.. ضرب يوسف الباب برجله ودخلنا جوا.. صرنا نفتش الغرف.. شفنا أغراض لبنات وباين بيت بنات بالفعل!.. وأول ما وصلنا غرفة النوم لقينا ورقة كبيرة.. قربنا وأخدنا لنشوفها.. لقينا عليها رسمة بأشكال بتضحك وكلام قذر تحتها.. صعب تمسكونا يا... لا تحاولوا يا أبناء الـ...!! وكلام مقاطع من أغاني بآخر الصفحة!.. مسك حمادة الصفحة ومزعها وشتمهم بعصبية.. حكيتله طلعو مو ميتين متل ماتوقعت!.. حكيتلهم خدوني على المقبرة الأولى يلي جنبها بيت.. كنت حاسة شي.. بس استنيت لأوصل لحتى أتأكد.. دخلت المقبرة وتطلعت جنب الشجرة يلي مدهونة أصفر.. ما لقيت القبر يلي كان عليه إسم أبرار.. سألنا حارس المقبرة.. قال مسؤول المقبرة حفره ورجع شاله.. بس أنا ما كنت موجود ورجعت لقيته مختفي متلكم.. حتى مكانه كان غلط.. جنب الباب!!.. قلتلهم الحقوني.. وقفنا ورا البيت يلي رحته ولقيته فاضي من العفش.. حكيتلهم اخلعوه.. خلعوه وفجأة سمعنا صراخ جوا.. كان البيت فيه أثاث وشفت تلات بنات من يلي بالصورة قاعدين!!!.. ضحك يوسف وطلع المسدس وحكالهم.. حكيتولنا صعب نمسككم يا... احكو كل شي قبل لأصفي دمكم!.. حكت ما بنعرفكم اطلعو برا قبل لنجيب الشرطة.. مسكها حمادة وضربها وقلها احكي شو بتعرفي وليه هيك عملتو فيهم!!.. قالت أنا أبرار.. وهي أيثار اختي.. وايناس جديد لعرفناها !!.. حكا ايوه كملي؟!.. حكت نحنا كنا بحالنا لوقت ما وصلت كل وحدة رسالة عالفيسبوك بصورة زوج هي!!!.. كان مكتوب بدي أجتمع فيكم بمكان واذا حابين تعرفو تعالو.. رحنا للمكان وشفنا واحد ما بنعرفه.. قلنا حابين تلعبو لعبة على اللي ترككم وكان ناوي يتزوجكم وتوخدولكم كم قرش تمشّو حالكم ولا لأ !.. وافقنا.. طلب منا أغراض قديمة لإلنا من أيام ما كنا نعرفه وتقريباً يلي تصورناهم معه او يلي كانو بخلفية الصور.. اعطيناه ياهم.. حتى نحنا ما كنا نعرف باقي البنات يلي عرفهم.. بس همه كانو الستة يلي بالصور.. طلب منا نتواصل معه ونقله انه اشتقناله.. بس ما توقعنا انه يطلب من ايناس كمان هالطلب الغريب.. بما انه ابوها بحفر قبور.. شافه ببيتهم هون وطلب منه يعمل قبر بأكتر من مقبرة على إسم كل وحدة منا.. وبعدها يشيله.. برضه اعطاه مصاري وطلب نشيل العفش مؤقتاً.. لأنه انتي رح تيجي!!!.. مابعرف شكله مجنون!.. قلتلها ما قلك اسمه ؟!.. قالت لأ ما رضي يقول ولا شي عنه.. زوجك ما بهمنا واصلاً كل وحدة فينا هلأ على علاقة بواحد.. بس هوه كان يخبرنا بشغلات ويتواصل معنا ونحنا ننفذ ونتصرف.. حتى أمه كانت تتصل معنا وتمنعنا نتواصل معه بس كان يهددنا لو ما قبلنا نعمل هالشي.. ارجوك لا تقتلنا والله ما دخلنا.. نحنا حتى عملنا نفسنا بنات ليل وقليلات شرف لحتى يرضى!!.. كأنه كان مراقب حياتك مع زوجك وبسمع كل شي.. حكيت اذن هوه يلي عملّي السحر.. متأكدين مو انتو لا وحدة من الباقين!.. قالت ايناس.. سحر شو ؟!.. لأ نحنا بنخاف من هالأمور بنقسملك ما بنعرف شي لا عن سحر ولا عن غيره!!
الحلقة الأخيرة (22)
بهاللحظة تهت أكتر وحسيت نفسي بمتاهة ما في منها مخرج.. يوسف قلهم أكيد معكم رقمه صح!.. سكتو!.. صرّخ ووجّه المسدس عليهم وحكالهم اتصلو معه!!!.. حكت ايناس انا يلي بتواصل معه.. اصلا جنين وناديا ورؤى مادخلهم همه بنفذو وبس.. رنّت عليه وأنا اخدت التلفون وحطيته على أذني.. قال الو.. ومن أول كلمة عرفت إنه كان نزار.. الشخص يلي عرفته من أكتر من سبع سنين!!..حكيتله نزار أنا مايا.. لعبتك نكشفت انت وبنات ابليس يلي معك.. ليه عملت هيك!؟.. انت يلي تركتني ليه خرّبت حياتي!.. قلّي أنا برا ورح أدخل البيت.. وفجأة فتح الباب.. لفينا كلنا وشفناه داخل.. قال لأنه أنا حبيتك وكان بدي اتزوجك.. أنا لهالوقت بحبك.. بس امي بالوقت يلي صار الخلاف كله بينا ونسحبت هددتني وقالتلي مستحيل ازوجك وحدة انت مخبّص معها.. وانت بتتزوج بنت عمك.. دوّرت عليكي وعرفت انك متزوجة لأنها كانت بدها تبعدك عني لهاللحظة لأني رفضت اتزوج!.. أنا مو متل ما انتي متخيّلة.. أنا بس عرفت انك تزوجتي صرت بدي أخرب حياتك وأشتتها بتفاصيل غريبة من بعد ما بحثت عن ماضي زوجك وعرفت ماضيه لتتركيه.. عملتلك سحر عن طريق وحدة دجالة لحتى يأثر على حملك أول ما يحصل.. لحقتك على تايلاند وبقيت أراقبكم.. يلي عرفته انه زوجك واحد واطي وسافل.. انتي عارفة انه بالوقت يلي كان يتركك فيه كان يروح يشوف بنات من تايلاند ويخونك معهم!!.. شفته بعيني بعد ما دخلت بيتهم !!.. رجعت معكم على نفس الطيارة وما لاحظتي.. بدلت الشناطي بشنطة أغراض البنات لتشكي فيه وبعلاقاته وتتركيه وترجعيلي.. بس يلي اكتشفته انه امي سكنت جنبك وعملتلك سحر تاني ويلي هوه ربط ! وكانت ناوية تفك عنك سحر التفرقة لتضلي مع زوجك بس انا طلبت منها تدخل بيتك وتبدل شناطي بس كانت خايفة لأنه الكلام يلي سمعته ما كان تفرقة مني وبس !!.. شروق هيّه امي!.. وزهراء بالفعل كانت بنت متدينة عندها الهام.. بس كانت شاكّة بشروق لأنها كذبت عليها وقالتلها احكيلها انه انتي ساعدتيني بتفرقة صارت معي بزواجي.. يمكن كانت خايفة منها تأذيها وتأذي بنتها نايا.. ولهيك حكتلها اكتبي كلمة نجران أول ما تشوفك.. لأنه بهالمكان فيه شيخ بشفي الجن العاشق.. وبالفعل زوجك كان ممسوس من جنية عاشقة وأنا فهمت كل شي منها بس كشفت امي وين بتروح وانها بتشوفك.. طلبت منها تهرب من البيت لأنه زوجك رح يحرقك لو عرف وهاد يلي صار.. حريق بسببه هوه وبسبب يلي لابسته!.. رحت لبيت أبو خالد يلي ساكنه عندها زهراء وحكيتلهم البنت رح تطلع مع زوجها وبنتها من البيت بس رح تيجي بنت لعندك وتسأل عنها ورح تحكولها انه المكان كان شبه مسكون وغريب وانكم مابتعرفوهم لحتى ما تدورو عليهم وتضل التفرقة ويروح الربط!!.. أنا كان بدي أفرقكم!! والجنية ساعدتني بشكل كنت مستغربه وما توقعته.. بس أنا عارف كيف وصل هالشي لإله.. يلي كان معها زوجك بالبيت الوسخ هيّه بنت ساحرة وبتعرف كهنة.. البنت كانت تايلاندية بس الكاهن هندي وقرّبه من جنية من نفس الديانة لحتى ما يرجع على بلده ويترك تايلاند لأنها حبّته وكانت بدها ياه بس هوه قرر يهرب بسرعة وحتى ما كان بده يتمم اجراءات الخروج!!.. زوجك واطي واوطى من ما بتتخيلي ولو ما نقتلوا الشباب يلي عالشط كان ما رجع لعندك وبقي غرقان بعلاقاته الوسخة.. أنا سمعت كل شي من ورا الشباك وعرفت انه كان تلفونه بالغرفه وبالتأكيد هوه يلي حطّه لأنه شفته بآخر يوم وبعد ما طلع من البيت عم يرن من تلفون تاني.. أكيد ليتأكد من شكوكه لأنه يلي متله ما برتاح أبداً.. وبكون مفكّر يلي تزوجها متل يلي عم بقضي معهم نزواته.. تطلعت فيه.. و قلت بيني وبين نفسي.. كنت متأكدة إنه هوه ما قتلهم.. كنت متأكدة إنها عم تأثر عليه !!.. كنت متأكدة إنه ما كرهني ولا شايفني بالشكل يلي كان يوصفه لأنه تاريخ زواجنا بقي كلمة سر تلفونه لهاللحظة.. حكيتله لو بالفعل لسه بتحبني ساعدني لأنه الجنيّة رح تنهيني!!.. قلي بروح معك عند الشيخ.. قلت في كتير لسه أشياء ناقصة.. انت كيف كنت تعرف انه انا يلي ماسكه تلفون زوجي وكيف البنت يلي كلمتني عرفت انا شو بحكي مع اختي بالغرفة !.. قلي أولاً زوجك ما بعرف شو بعمل.. مرة بعقله ومرة لأ.. فهّمت البنات اذا بعتوله وما كان عارف انتو عن أي مكان بتحكو.. فبتكوني انتي يلي اخدتي التلفون.. وهاد يلي صار.. البنت يلي حكت معك ناديا.. وانتي توهمّلك انها امي شروق.. انتو صوتكم كان عالي وانا كنت جنب الباب.. انا كنت اقرب لالك من ما بتتخيلي.. جنبك دائماً وبستنى اللحظة يلي تتدمر علاقتك مع زوجك لأرجعلك لأنك الي !!.. طلعت من البيت وطلبت من يوسف يبعد عن نزار لأنه حاول يتهجّم عليه مع حمادة.. رحت لبيت حماي وحكيت كل القصة.. صدقوني.. وقلتلهم لو ما رحت معه على السعودية رح ينتهي.. وأنا رح أنتهي.. لازم نتعالج سوا.. بس بدي جواز سفري من البيت وخايفة اروح.. قال حماي البيت نصه نحرق بس رح نيجي معك لنتفاهم معه يمكن يكون بعقله!!.. رحنا كلنا على البيت ويوسف قلي انتبهي على حالك..دخلنا البيت وشفناه مرمي على الكنبة.. حالته صعبة والبيت حيطانه سودة.. أول ما شافني حاول يقتلني بس ابوه منعه وقلّه انت لازم تسافر وتخلص من يلي عايشة معك وفيك!!.. انت ممسوس يا ابني!!!.. حاول يبعدنا بس أنا دخلت وجبت غراضي وجواز سفري.. حكيت مع زهراء وتأسفتلي.. قالت صدقيني ما كنت بعرف.. لو عرفت انه هيّه يلي عملتلك سحر ربط كنت طردتها وساعدتك.. أنا شكيت فيها من أول يوم لهيك طلبت من بنتي تبعتلك علامة.. قلتلها صحيح وأنا دققت عليها.. لأنه الأحرف كانو بشبهو أحرف البنات يلي عرفهم زوجي بالصدفة و هالشي شد انتباهي!!.. أنا مسافرة ومو زعلانة منك.. بس بدي منك تحكيلي شو اسم الشيخ !!.. قالت الاسم.. وأنا ودّعتها وقلتلها شكراً إلك.. تركتهم معه ورحت مع يوسف.. وصلنا السعودية وفتشت على الشيخ.. لقيته.. وفك السحر عني بالقرآن وبالطهارة الكاملة.. كان شيخ نقي وتقي ومن أول نظرة شفته فيها ارتحت.. تاني يوم يوسف كلمّني وأنا بالفندق.. كنت مرتاحة ومبسوطة !!.. قلي شفت زوجك واهله هون.. تقريباً بدوّرو عليكي.. اتصلت مع حماتي اميره وقلتلها اسم الشيخ.. أخد الموضوع وقت لقدر يخلصه من يلي صابه.. وطهّره ونقّاه وريّح نفسيته.. الجنية اختفت من حياتي وحياته.. ارتحنا.. اجو على الفندق واهله اعتذرولي.. قالو كنا ظانين فيكي سوء.. وزوجك بنفسه جاي يعتذرلك.. حكالي أنا صح سيء بس حبيتك وشفت فيكي البنت يلي بدي أصلح حياتي معها.. بس ما كنت بعرف انه يلي فيه طبع صعب يتغيّر!!.. انا بالوقت يلي كنت بخونك فيه كنت بشك فيكي.. الشهر يلي قضيناه مع بعض.. عرفت فيه كتير بنات اجنبيات وعربيات غيرك!!.. لمّا رنولي وانا معك وسمعتيهم بالفعل كانو بعرفوني.. شطبت السجل بالسيارة لحتى ما تشكّي.. وريحة عطر البنت التايلاندية بقي على إيدي.. ما كنت واعي تماماً وقتها لأنه كنت بحس بوجود حدا معي وجبتلك عطر ماركة هندية رخيص.. نفس العطر يلي شمّيته عليها لأضل أشوفك فيها.. ولأنها هيه طلبت مني هيك بعقلي!!.. برغم كان معي عطر تاني ماركة غاليه.. بس كبيته بالحمام من بعد ما قالتلي فضّيه وارجع غلفه وارميه بالغرفه.. وحتى انتي ما كنتي واعية.. كان يتوهملك مشطها وشعرها وأثر شفايفها وطقة كعب رجلها.. وطلبت منك تعملي أفعال خارجة عن ارادتك.. نحنا التنين ضحية.. برغم سوئي بس أنا ما كنت سيء لهالدرجة !!.. انا تغيّرت صدقيني وانتي رح تجيبي ابني عن قريب.. لا تدمري بيتنا وحياتنا يلي لسه ما عشناها.. ارجعي معي وخليكي معي.. وخلينا نصلح من نفسنا ونكون أحسن من قبل!!.. طلعت من الفندق بس ما كنت لوحدي.. كنت معه.. حكيت مع يوسف وقلتله شكراً على مشاعرك وكل شي قدمتلي ياه.. انت بتستاهل بنت أحسن مني.. بتمنالك السعادة بحياتك لأنك بتستحقها.. عشت ببيت أهلي فترة لوقت ما جهّزلنا زوجي بيت جديد وعفش جديد وغرفة بيبي.. أشهر وجبت بنت.. قلت لزوجي.. أنا رح أنسى كل شي.. وما رح أشك فيك ولا رح أسألك على أي شي.. بس تذكر إنه عندك بنت.. وإنه أي شي رح تعمله سواء كان فعل سيء أو طيب رح تدفع ثمنه هالبنت.. إذا مو اليوم بكرا بس تكبر.. وعدني وأنا صدقته وسري ندفن معي لنقدر نعيش.. بس سألت نفسي سؤال وقلت.. أنا سامحته ونسيت كل علاقاته يلي ما بتنعد.. بس هوه لو عرف بماضيّه ويلي صار معي.. كان ممكن يسامحني وينسى.. أو لأ ؟!
هدف القصة
العلاقات المحرمّة قبل الزواج ذنب من أكبر الكبائر وأقبح الذنوب.. ونهانا الله عن قربها في كتابه العزيز.. " وَلاَ تَقْرَبُوا الزِّنَى إِنَّهُ كَانَ فَاحِشَةً وَسَاءَ سَبِيلاً " وهي ما يطلق عليها مصطلح ( علاقة غير شرعية ) وهي حرام سواء وصلت للعلاقة المغلظة أو كانت في حدود أقل.. ومخاطرها على دين الإنسان وإيمانه كبيرة وشنيعة.. أُسر وأشخاص وأنفس تدمرت بالكامل بسبب ساعة أو أقل من الشهوة.. وبهذا الوقت تزايدت الأمراض المنقولة بسبب إنتهاك قانون الله الطبيعي.. الإنسان المؤمن والواعي ليتمكن من العيش في حياة زواج جميلة وعميقة وخالية من الشك والظنون وعدم الثقة.. يبتعد تماماً عن رغباته واهواءه وقفل غرائزة لحين مجيء الوقت الصحيح للدخول في العلاقة.. ويحاول التمييز بين الحب الصادق والكاذب من أجل تفادي العواقب الوخيمة.. والأهم وضع مخافة الله بين العينين والتوبة في حال وقع بالحرام برغبته أو بدون.. برأيي.. التوافق والانسجام بين الذكر والأنثى بولد في نطاق الرابطة الزوجية المقدسة يلي بتجد الحماية والأمن في ظل القانون والعرف يلي بصادق على علاقتهم الشرعية.. لأنه التقدير الكامل الواعي للمحبة يلي بعثها فينا الخالق المُحب ما بتم اكتشافها أو اختبارها الا في نطاق الرابطة الزوجية السليمة.
هدف القصة
العلاقات المحرمّة قبل الزواج ذنب من أكبر الكبائر وأقبح الذنوب.. ونهانا الله عن قربها في كتابه العزيز.. " وَلاَ تَقْرَبُوا الزِّنَى إِنَّهُ كَانَ فَاحِشَةً وَسَاءَ سَبِيلاً " وهي ما يطلق عليها مصطلح ( علاقة غير شرعية ) وهي حرام سواء وصلت للعلاقة المغلظة أو كانت في حدود أقل.. ومخاطرها على دين الإنسان وإيمانه كبيرة وشنيعة.. أُسر وأشخاص وأنفس تدمرت بالكامل بسبب ساعة أو أقل من الشهوة.. وبهذا الوقت تزايدت الأمراض المنقولة بسبب إنتهاك قانون الله الطبيعي.. الإنسان المؤمن والواعي ليتمكن من العيش في حياة زواج جميلة وعميقة وخالية من الشك والظنون وعدم الثقة.. يبتعد تماماً عن رغباته واهواءه وقفل غرائزة لحين مجيء الوقت الصحيح للدخول في العلاقة.. ويحاول التمييز بين الحب الصادق والكاذب من أجل تفادي العواقب الوخيمة.. والأهم وضع مخافة الله بين العينين والتوبة في حال وقع بالحرام برغبته أو بدون.. برأيي.. التوافق والانسجام بين الذكر والأنثى بولد في نطاق الرابطة الزوجية المقدسة يلي بتجد الحماية والأمن في ظل القانون والعرف يلي بصادق على علاقتهم الشرعية.. لأنه التقدير الكامل الواعي للمحبة يلي بعثها فينا الخالق المُحب ما بتم اكتشافها أو اختبارها الا في نطاق الرابطة الزوجية السليمة.
النهاية
اهلا اسمي ياسر النايف تقني ومصم ومعرب قوالب بلوجر سوري الجنسية من محافضة دير الزور 15سنة.
ليست هناك تعليقات:
إرسال تعليق