قصة الجزار

#الــــــــجــــــــــزار
#قصة_واقعية

الــجــزء الأول + الثاني + الثالث + الرابع + الخامس(يتبع بمنشور جديد)

كــانت عم تنطق الحروف بصعوبة .. عم تتعرق وتمسح جبينها .. و تتابع وتكمل حكيها ..

( ماتوا .. )

- كيف ماتو ؟ وليش عم ترجفي هيك ... شو صار ..

رجعت كررت و كان التعب واضح على ملامحها لدرجة كبيرة .. ( كلــهم مــاتو .. ،، آخر شي حكتلي ياه .. قالتلي يا ماما
انا خايفه منو .. انا خايفه كتير .. )

- وبعدين شو صار ؟

حدقت عينها عم تتوسع .. وايديها عم ترجف .. رفعت عيونها .. وقالت مره تانيه.. .. ( هو قتلها )... ( قتل الكل) ..

_____________ قبل خمس سنوات_________________

ام إسلام : بنتي جهاد وينك ؟

جهاد : هون ماما عم احكي مع خطيبي ..

ام إسلام : ههههه لك الله يفرحني فيكن يا رب ويتمملكن على خير .. سلميلي عليه كتير

جهاد : يلا رح قلو ..

مشت ام إسلام على المطبخ وهي مبسوطة كتير بعد ما أمنت على ولادها التلاته وربتهن وصارو من أكتر الناس إحتراماً بالمجتمع

بنتها اسماء محاسبة ومتزوجة بالكويت .. و ابنها إسلام مهندس .. و اخر العنقود ودلولة العيلة وشمعة البيت جهاد ..
خريجة آداب أثار .. عمرها 20 سنة .. رب العالمين رزقها بجمال و أدب و ركازة بيلفتو النظر
في بوشها براءة و ســحــر ..
سمارها الناعم بيزيد جاذبيتها .. وابتسامتها بتخلي الدنيا ترقص على نغمة دئات ألبها ..

تمت خطبتها بوقت قريب من شب خلوق كتير و ألو سمعتو ومركــزو ..

وهييك ام إسلام حست انها أدت الأمانة على احسن وجه .. وربت ولادها لصارو بيرفعو الراس .. وصار لازم ترتاح
وتستمتع وهي عم تشوف ولادها هلأ كبروا و صارو قد المسؤولية ..

كانت عم تجهز لعرس جهاد بكل حرص واهتمام .. بتهتم بكل التفاصيل .. بتختار الألوان بدقة .. والموديلات بعناية فائقة

جهاد : ماما انتي عم تبالغي كتير .. ما في داعي لكل هالتكلف هاد

ام اسلام : لييش يا عمري ما بحقلي افرح ببنتي ؟ .. بدي اعملك جهاز ما صار .. وما بدي اسمع اي اعتراض

جهاد : ههههه يخليلي ياكي يا ست الكل ..

كل العيلة كانت عم تجهز لهل عرس الضخم .. كان واضح جداً انو رح يكون زفاف أسطوري .. وعرس ما صار متلو ولا كان

كانو قاعدين بالبيت و ام إسلام عم تفرد تياب من الجهاز وتتفرج عليهن

ام إسلام : شوفي هاد الموديل جبتلك منو كل الألوان ..

جهاد : ايه امي حلو

ام إسلام : وهاد ما عرفت اي لون رح يلبئلك منو ف كمان جبتلك كل الألوان

قامت جهاد وهي حاسة بملل وتعب من موضوع الجهاز .. ومشت لعند الشباك .. وفتحت الستارة بأصباعها .. وسندت ضهرها على الشباك

ام إسلام : اووف يا الله كل شي حلو عنجد كتير محتارة .. خلص طلعيهن معك كلهن والي بتلبسيه منيح والي ما بتلبسيه ما بيضر
هلأ تقريباً خلصنا كل شي .. ضل نجهزلك فرش البيت و الكهربائيات .. .في معرض عمك ابو خليل افخم معرض بالبلد
منروح عليه وبتختاري الي بتحبيه

جهاد : ما في داعي روحي انتي وخالتي وجيبو الي بدكن ياه

ام إسلام : لا ما بصير لازم تيجي معنا

جهاد : ماما انا متواعده مع رفئاتي ومو فاضيه خلص انا بوثق بزوئك حبيبتي

أم إسلام : انتي مهملة كتير يا بنت .. بعدين قلتي لخطيبك يحجز بفندق انتركونتيننتال ؟

كانت جهاد شاردة وما سمعت امها

ام إسلام : جهااااااد بنتي عم احكي معك

جهاد : اه ؟ نعم امي ؟ شو قلتي ما سمعت

ام إسلام : وين صافنه ؟

جهاد : و لا شي بس في لحام فتح هون بالحارة .. ليكو قدام بيتنا بالضبط

ام إسلام : جزار ؟

جهاد : أيه .. بس شكلو شب .. و لزيز ها هههههه

ام إسلام : يلا منيح كان لازم من زمان يفتحو محل قريب منا ، كتير اوقات بضطر انزل على نص البلد لجيب متل ما بدي
بس ان شاء الله يكون شغلو نظيف

جهاد : لا شكلو نظيف .. ههه

ام إسلام : شو قلتي ؟

جهاد : عم قول شكلو الشغل نظيف

ام إسلام : ايه هلأ شو قلتي مشان الأثاث ايمت بدنا نروح ؟

نطت جهاد لعند امها وباستها على خدها : يا مامي الله يخليلي ياكي .. انتي اختاري كل شي .. انا ضلولي هالكم شهر
بدي شوف رفقاتي وانبسط معهن .. بحبك انا

وركضت على غرفتها وهي عم تضحك

ام إسلام : لك يا بنت تعي لهون .. آآآآخ رح تجنني هالبنت .. ييي لك نسيت المكياج الي وصيت عليه من برا .. كان لازم يوصل اليوم
لازم اتصل فيهن فوراً ..

مرقو شهرين ونص .. وضل أسابيع قليلة قبل الزفاف الميمون .. عرس جهاد ..

وبهاد الوقت .. كان في تغيرات واضحة حتى الأعمى ممكن يبصرها عم تصير مع جهاد ..

انعازالها الدائم و شرودها كأنها بعالم تاني بعيد عن الكل و اهم شي عدم رضاها شو ما عملولها ، ما كان عم يعجبها شي .. وتنزعج من اصغر كلمة وتتخانئ مع الكل

حتى خطيبها كل يوم يتصل مع امها ويشتكي من مزاجية جهاد وعصبيتها معو .. وهي تواسيه وتهديه .. لوقت ما زاد الأمر عن حدو

وبطلت امها تقدر تسيطر على الأمور وصار الحمل تقيل عليها ..

فاتت لعند جهاد وهي معصبة .. وطرقت الباب وراها بقوة كبيرة

جهاد : ييي شبك امي

ام إسلام : انا الي شبني ؟ إنتي الي شبك رح تجنني بدك تموتيني ؟ ما عاد عم اتحمل طيشك و تصرفاتك هالفترة
شو عم يصيرلك

جهاد : ما في شي انتو كتير عم تخنئوني ما بعرف شبكن

ام إسلام : خطيبك عم يشكي منك .. الشب الف بنت بتتمناه وانتي عم تضيعيه من ايدك .. لك بيتقل بالدهب خطيبك اصحي بئى

جهاد : ايه حاضر ..

ام اسلام : هي اخر مرة بنبهك ها .. تاني مره رح خلي ابوكي هو الي يتصرف معك فهمتي

جهاد : طيب فهمت

لفت ضهرها ام إسلام وبدها تطلع من الغرفة وهي عم تحكي : بدها تطير الشب من ايدها والله ليتفركش العرس على هالحالة

همست جهاد : ايه بكون احسن ..

وقفت امها مكانها وهي عم تحاول تكزب حالها .. وتتخيل انها سمعت غلط .. وبنتها ما قالت هالكلمتين

ورجعت التفتت على جهاد ..

ام إسلام : شو قلتي ؟

جهاد بعدم اهتمام : ما قلت شي

ام إسلام : لا قلتي شي .. عيدي ؟

جهاد : ايه قلت .. قلت بيكون احسن

ام إسلام : انتي شو عم تخبصي ؟

وقفت جهاد كأنها عم تجهز حالها لمعركة كبيرة و قررت تقلب كل الموازين وتكسر حاجز الصمت .. بكلمات وقعت على امها متل الصاعقة

جهاد : انا ما بدي ياه لخطيبي .. انا بحب واحد تاني ..

ام إسلام : انتي شو عم تقولي ؟

جهاد : ايه امي .. انا بحب محمد وهو بحبني وبدي ياه

ام إسلام: لك مين محمد ؟

مشت جهاد لعند شباك غرفتها .. سحبت الستارة كلها .. و اشرت بأيدها لبرا البيت من الشباك ..

جهاد : محمد

قربت امها من الشباك بخطوات مهزوزة لتعرف بنتها وين واقعه .. ولتحاول تفهم المصيبة الي وقعت فيها وكيف بدها تحلها .. وقفت على الشباك وتطلعت محل ما اشرتلها بنتها
وكانت عم تحاول تستوعب وتستجمع حالها لوقت ما وقعو عيونها على الملحمة الي فتحت من فترة قصيرة .. ما كانت عم تسدئ... حطت ايدها على تمها وحكت بصوت ضعيف..

ام إسلام : اللحام ؟ .. محمد الجزار !!

#الــــــــجــــــــــزار_بقلم_مال_الشام

الــجــزء الــثــاني

جهاد : ايه .. محمد الجزار ..

ام إسلام : انتي وعيانه لحالك شو عم تقولي ؟

جهاد : وعيانه كتير .. بالعكس انا كل الوقت كنت غايبة عن الوعي لأن كنت رح اتزوج شخص ما بحبو .. وهلأ صحيت ..

ام إسلام : جهاد بنتي .. عرسك ضللو كم اسبوع .. ما تخبصي مشان الله

جهاد : انتي قلتيها .. لسه في وقت

مسكت ايدين امها وتطلعت بعيونها وكانت عم تترجاها

جهاد : امانه وقفي معي .. خلينا نلغي العرس

يـــــمـــكن هي كانت من أصعب المواقف و اللحظات الي ممكن تمر فيهن أي ام بالدنيا .. لحظات قليلة مرت على ام إسلام متل دهور وسنين
تركت بنتها وطلعت من الغرفة وهي محطمة ومنهارة .. قاطعت بنتها لمدة يومين
وضلت مشرفة على تجهيزات العرس وعم تحاول تنكر الي سمعتو وعندها امل انو بنتها تصحى لحالها
بس تحطم الأمل لما اتصل فيها خطيب بنتها و اعتذر منها و خبرها انو جهاد حكيت معو وطلبت منو الأنفصال
وهو نفذلها رغبتها
كان شاب بقمة الوعي و الأدب .. لما حس حالو غير مرغوب فيه انسحب بلطف وبهدوء .. واعتزر من العيلة كاملة
وقطع علاقتو بشكل نهائي بجهاد ..
وبسرعه غير متوقعه تقدم لخطبتها محمد .. العاشق المنتظر و الحبيب الأول والأخير ..

رفض ابوها لجهاد فوراً .. كان بالنسبة الهم خيار مستحيل .. وزواج فاشل سلفاً ..
شب غير متعلم .. من بيئة مختلف تماماً وعادات مختلفة و نمط حياة مختلف .. حتى سلوكو وطريقة حكيو كانت غير مشجعة

بس جهاد وقفت لتواجه الكل .. وتدافع عن حبيبها الي مستعده تعمل كل شي كرمالو .. كيف وايمت قدر يسلب قلبها ويسيطر على مشاعرها
ما حدا كان بيعرف ..

ام إسلام : مستحيل .. مستحيل انا ما رح خليها تضيع حالها

اسماء : شو بدك تعملي امي ؟

ام إسلام : ما بعرف حاسة حالي مشلولة ما في بأيدي شي .. تخيلي انتي ترجيتها ؟ ما ضل الا بوس ايديها
حكيتها بالعقل والمنطق .. حاولت معها بكل الوسائل الغصب والرضى واللين والعقاب حتى اهل الشب حكيت معهن و ترجيتهن بس ما مشي الحال .. خليت رفقاتها من المدرسة والجامعه يحكو معا

اسماء : وشو صار معهن ؟

ام اسلام : ما عم تتراجع ..بدها ياه

اسماء : لكن ما في حل

ام اسلام : شو يعني ؟

اسماء : يعني يا امي هالجوازة خلص بدها تتم .. واختي مو صغيرة .. خليها تمشي بهالطريق الي اختارتو
ولعلو خير

ام إسلام : ارمي بنتي للجزارررررر ؟؟

اسماء : حاجة تقولي عنو جزار يمكن يكون منيح خلص ما تخافي هيك .. اهدي

ام إسلام : خايفه عليها انتي ما شفتي الشب ما سمعتي كيف بيحكي و لا كيف بيضحك

اسماء : ما تخافي .. جهاد حبيبة البي بعمرها ما كانت نيتها الا صافية وكلها خير
وأكييد ربنا رح يتمملها على خير ويرزقها الفرح

ام إسلام : هيك رأيك ؟

اسماء : ايه امي هيك رأيي .. وحاجتك بكي ودموع .. بعرف انك بتدللي جهاد زياده بس مو منيح هالئد
صار لازم تتركيها تشوف حياتها وتحب وتعشئ وتاخود قرارها بأيدها
نحنا ما عاد نقدر نمنعها .. القطة كبرت وصارت تخرمش هههههههه

سكرت ام إسلام الخط مع بنتها .. وقعدت شوي مع حالها ..
مضت كل الليل وهي عم تفكر ببنتها وتحسب الموضوع .. ما نشفت دمعتها كل الوقت .. فاتت لعند بنوتتها وهي نايمة
غطتها منيح وباستها على جبينها .. وسحبت كرسي حطتو قدام تخت جهاد وقعدت ضلت عم تتأملها وهي نايمة متل الملاك ..

طلع الضو وصارت الساعه 7 و ام إسلام على قعدتها ..
رن المنبه الي ضابطتو جهاد .. وبلشت تفتح عيونها شوي شوي ..
انتبهت عليها امها .. وفوراً مسحت دموعها ..

جهاد : امي ؟ ..

تجلست من تختها وهي مستغربة : شو في ؟

ام إسلام : ولا شي حبيبتي

جهاد : ليش قاعده هون ؟

ام إسلام : ناطرتك لتصحي ..

قامت لعندها و قعدت جنبها عالتخت وضمتها

ام إسلام : انتي لسه بدك محمد ؟

جهاد : ايه اكيد

ام إسلام : وما رح تتراجعي ولا حتى ازا التلك انو رح تقتليني بهل جوازة هي ؟

جهاد : _ _ _

ام إسلام : يعني ما رح تتراجعي ؟

جهاد : ماما لا تعزبيني اكتر ..

ام إسلام : خلص ما رح عزبك

فتحت عيونها و هي ما عم تسدئ شو سمعت من امها ..

جهاد : شو يعني ؟

ام إسلام : يعني خلص .. متل ما بدك ..

جهاد : ياااااااااي .. اخيراااااااااااااا .. ما عم سدددددددددددئ .. بحبك بحبك بحبك بحبك يا احلى ام
ياااي ياااي .. يا عييييييني اخيراً اخيرااااااً

نطت من تختا وهي عم تغني وترقص .. وامها مخبية دموعها و قلبها مكسور

جهاد : والله لنكييييييييف .. ياااي ..

طلعت من غرفتها وتركت امها على تختها

ام إسلام : الله يختارلك الخير يا حبيبة البي .. يا مهجة روحي انتي ..

صارت مشاكل بالعيلة .. انقسمت العيلة بين معارضين .. ومؤيدين قليلن .. لدرجة العائلة قاطعت بعضها وكانو مصدومين
انو جهاد الي كانت رح تصير وتتصور اخر شي رح تاخود لحام !! مو من توبها ولا من عائلتها ما بيشبها بشي
ما كان حدا متقبلو بس صارت الأمور تمشي على مضض وغير رضى من الكل ومع هيك اهلها ما قدرو يكسرو بخاطرها
كملولها جهازها متل ما كان واحسن ..وقررو يفرحولها شو ما كان الوضع .. كان الأثاث والجهاز الي جابوه
افخم بكتير من الشقة الصغيرة المتهالكة والتعبانه الي استأجرها محمد ليزف عليها عروستو جهاد
بيت صغير .. مرطب .. ديئ .. وبحي عشوائي بس فرحة جهاد كانت كبيرة و الحب واضح بعيونها

لوقت ما اجا يوم العرس .. وصارت المصيبة واقع ما عاد يقدر حدا يردو ..

ام إسلام : يا ربي ايمت بدو يخلص هالعرس .. معقول هاد مكان ينعمل فيه عرس ؟

جهاد : خلص ماما طولي بالك خلصنا

ام إسلام : لك اختنئت .. وفي ريحة مجاري .. خالاتك وعماتك كلهن ضلو بس مشان خاطرنا

اسماء : بصراحة جهاد امك معها حئ .. معقولة انتي شو هاد

جهاد : خلص لا تزيدوها علي والله ما طلع بايدي شي محمد قلي هاد الموجود شو اعمل

ام إسلام : لو حكالنا قبل بفترة كنا نحنا حجزنالك مكان محترم .. مو بالشوارع متل المقطوعين

جهاد : _ _ _

بلشو المعازيم من طرف جهاد ينسحبو .. ورفقاتها يتهامسو ويتمسخرو .. هي جهاد الي كان الكل يتسائل مين رح يربح حبها
و وين رح يصرلها عرس .. واديش رح تطلع حلوة ..
خابت الأمال و خابت التوقعات .. وطلعت الأقل حظاً بين كل معارفها .. بس كانت راضيه .. ومصره على قرارها

انزفت لعريسها .. و وصلوها على بيتها .. ودعها ابوها ببوسة على جبينها ودعالها بالسترة والسعاده
اما امها ما كانت قادرة تتركها ... و قلبها مو هاين عليه تتركها وتمشي ..
باست جهاد ايد امها وهي عم تضحك

جهاد : ادعيلي

ام إسلام : الله يسعدك يا روح البي .. مبروك حبيبتي

جهاد : رضيانه علي امي ؟

ام إسلام : البي وربي رضيانين عليكي يا عمري انتي ..

جهاد : يوووه شو بحبك الله لا يحرمني منك

ام إسلام : ليكي امي .. انا عطول جنبك ايه ؟ بعمرك لا تفكري انو لانك اخدتي هالقرار لحالك رح اتخلى عنك
انا وابوكي واخوانك بضهرك .. و الي بتطلبيه اوامر ايه ؟

جهاد : بعرف امي الله يخليلي ياكن

كان محمد واقف خطوتين بعيد عنها لما بلش يتأفف

جهاد : يلا انا خليني روح مع جوزي

ام إسلام : ايه امي .. الله معك بامان الله ..

مشت جهاد لعند محمد الي تطلع على ام إسلام بنظرة مو مريحه وكانت العلاقة بيناتهن طول فترة الخطوبة سيئة
مسكت جهاد ايدو وقالتلو يلا .. وطلعو درج البناية وبلشو يغيبو شوي شوي عن عيون امها

ابو إسلام : يلا يا رجاء

ام إسلام : اه ؟

ابو إسلام : لايمت بدك تضلك واقفه بالطريق خلينا نمشي

ام اسلام : ما بدي .. مو مرتاحه مو قادرة اتركها .. قلبي عم يوجعني في شي مخوفني

ابو إسلام : اي هي اول ليلة بتنام بنتك بعيده عنك اكيد رح تحسي هيك

ام إسلام : لا .. مو هاد السبب ..

بعد ربع ساعه قدر يقنعها انو تتحرك .. وتطلع بالسيارة مشان يمشو ..
ركبت بالسيارة غصب عنها ودمعتها بعينها .. وتحركو .. وهي ضلت تطلع وراها على شباك الشقه تبع بنتها ..
وشوي شوي كانو يبعدو .. لوقت ما لمحت محمد واقف على الشباك .. نزل الستاير .. وطفى الضو

حطت ايدها على قلبها ونزلتها دمعتها لتحرقلها خدا

ام إسلام : يارب لطفك ..

#الــجــــزار_بقلم_مال_الشام

الــجزء الثالث

ضلت امها طول الليل قاعدة ما هديلها بال ولا غمضلها جفن .. عم تروح وتجي واعصابها متوترة كتير
حست حالها على شوي رح تجن من التفكير .. وما لقت إلا رب العالمين تلجئ الو
وبأول ركعة .. بلشت اعصابها تروق .. وقلبها يهدى .. مرقت ساعات طويلة بعدين
قامت ضبت سجادة الصلاة ومسكت الذكر .. قعدت على كرسي بصدر الصالون .. وبلشت اعصابها تهدا بالتدريج ..
طلع الضو عليها والشمس بلشت تشرق لصارت بنص السما ..

ابو إسلام : رجاء ؟ انتي صاحية ؟ ..

ام إسلام : ايه هلأ بس من شوي صحيت

ابو إسلام : طيب اعمليلنا فنجان قهوة الله يرضى عليكي

ام إسلام : قهوة ؟ شو رأيك تستنا ومنروح منشربها عند جهاد ؟

ابو إسلام : هههههههه الله عليكي على هالصبح .. ما بصير هدول عرسان اتركيهن على راحتهن ..

ام إسلام : بس انا اشتقتلها

ابو إسلام : بدك تتعودي .. فضي علينا البيت وشكلنا ختيرنا وضليت انا وياكي لحالنا

ام إسلام : قولك هيك ؟

ابو إسلام : قومي اعمليلنا فنجان قهوة يلا

عملو قهوة وقعدو شربو مع بعض .. وبحدود الساعه 12 .. رن الهاتف ..

ام إسلام : خليك خليك انا رح رد ..

ركضت عالتليفون ورفعت السماعه و سمعت الصوت الي برد قلبها ورسم الضحكة على شفافها

جهاد : الو .. ماما كييييييييفك ؟

ام إسلام : ييي يا عمري اشتئتلك يا عروس

جهاد : وانا كمان ، اول ما صحيت قلت لمحمد بدي احكي امي اشتئتلك كتير .. قومي تعي لعندي

ام إسلام : يعني ما رح ندايئكن ؟

جهاد : يوه شو هالحكي ؟ يلا بسرعه ناطرتك انا

ام إسلام : يلا ماشي .. جايين بسرعه ..

سكرت الخط وتبدلت ملامحها بثواني قليلة .. كأنو صوت بنتها غسل عن قلبها كل الزعل والخوف بالذات انو كان واضح من صوت جهاد
انها مبسوطه كتير ..

وهيك صارت جهاد مرتو لمحمد اللحام .. وكانت اول فترة من زواجها مبسوطه كتير وفخورة انها تزوجت بالشب الي اختارو قلبها
بس للأسف كانت حياتها من الناحية المادية سيئة جداً..
حاولوا اهلها بعوضوها شوي وما يحسسوها انو في شي تغير عليها ..
اختها اسماء الي ما قطعتها من الهدايا واخوها الي يومياً يتصل فيها ليتأكد ازا محتاجه شي
كانو كلهم محاوطينها بحب وحنان .. وهي متل الفراشة دايماً تضحك وتطمنهن ..
بأول شهر حملت جهاد .. وفرحو اهلها بهل خبر وقررو يمحو كل شي صار ويبدأو صفحة جديدة مع محمد
ويعتبرو انو هالعيلة صار عندها ولد جديد .. كبرت محبتو بقلبهن .. وصار غالي على قلوبهن كتير
حبوه على محبته لجهاد والكل كان يحاول يتقرب منو بس هو كان يبعد عن العيلة ويرفض الزيارات والجمعات معهن

ام إسلام : بأنو شهر صرتي ؟

جهاد : ما بعرف مو عرفانه احسب بالزبط بس يمكن بالرابع

ام إسلام : كيف يعني ؟ الدكتورة شو قالتلك ؟

جهاد : ما عاد رحت لعند الدكتورة من زمان

ام إسلام : لييييييييش !!

جهاد : _ _

ام إسلام : ما بصير هاد اول حمل الك وانتي حسمك ضعيف لازم تضلك تراجعي

جهاد : بس امي

ام إسلام : لا بس ولا بطيخ .. قومي يلا هلأ بدنا نروح

قامت وشدت بنتها من ايدها بس جهاد رفضت تقوم

جهاد : امي ما معي مصاري ..

ام إسلام : مو مشكلة انا باخدك

جهاد : لا ما بدي

ام إسلام : ليش ؟

جهاد : بخاف محمد يزعل

ام إسلام : يزعل ؟ .. وليش بدو يزعل ؟

جهاد : خلص ولا شي ...

سكتو التنين شوي .. وجهاد كانت ملبكة كتير

ام إسلام : بنتي اتطلعي فيني .. جوزك هو الي بضل يكسرلك الموبايل كل ما تبعتلك اختك واحد صح ؟ بس انتي بتقولي انو وقع منك وانكسر

جهاد : لا

ام إسلام : امبلى ..

جهاد : خلص .. رح اعملك كاسة شاي

قامت جهاد لتهرب من اسئلة امها ... و كانت منزلة شعراتها على طرف كتفها .. لما قامت مستعجلة نزلو و لمحت امها كدمات واثار ضرب
مسكتها من ايدها وشدتها لعندها

ام إسلام : شووووو هاااااااااااااااد ؟؟

جهاد : شو ؟ شو ؟ لا .. ولا ..ولا شي هاد .. ولا شي

حاولت ترفع كنزتها وترجع تخبيهن بس امها مسكتها بقوة وكانت اعصابها فايرة

ام إسلام : بعدي هييييييييييييييييك ..

نزلت الكنزة وكشفت عنها ورفعتلها شعرتها وتفحصتلها ايديها .. في كدمات بكل مكان .. جسمها كلو مدقدق

ام إسلام : لك شو هاد .. مين عامل فيكي هيك ؟؟؟؟؟؟؟؟؟؟

جهاد : ماا حدا .. انا عم اوقع كتير

ام إسلام : محمد بيضررررررربك ؟

انفتح باب البيت وسمعو صوت محمد على الباب .. صارت جهاد ترجف وتلبكت كتير

جهاد بصوت واطي : امي خلص اسكتي مشان الله تسكتي بفهمك كل شي بعدين

ام إسلام : لا ما رح اسكوت هلأ بدك تحكي

جهاد : ببوس ايدك مشان الله هسسسسسسس

فات محمد لعندهن وسلم بدون نفس وببرودة .. وسحب حالو على غرفتو وتركهن لحالهن ..

ام إسلام : لك ما الك عندو غير كم شهررررررر ... بيضربك لييييييييييش ؟؟؟؟؟؟؟؟؟ وانتي ليه ساااااااااكته

جهاد : امي وطي صوتك الله يحن عليكي

ام إسلام : لك بس فهميني

جهاد : بعدين .. بعدين بفهمك كل شي خلص هلأ اسكتي ..

كانت يوم عن يوم جهاد عم تدبل .. وعم يظهر عليها التعب والإرهاق بس ما كانت تحكي شي وكان سرها عميق كتير حتى على امها
لوقت ما بيوم من الأيام ... اتصلو فيهن جيران جهاد و طلبو منهن يجو بسرعه
ولما وصلو لعند جهاد .. لقوها مرمية بالأرض عم تنزف وعم تتوجع
اسعفوها فوراً و كانت حالتها خطيرة لدرجة ما كانت قدرانة تحكي ..

كان محمد ضاربها ضرب مبرح وبشكل عنيف كتير .. وما حدا عرف ليش السبب وليش هيك عمل فيها
اخوتها ما تحملهن عقلهن حدا يعمل هيك بأختهن .. والكل وقفو هالمرة ورفضو يرجعو جهاد لعندو حتى لو هي بدها
لان كانت قريبة من الموت .. بالذات انو الحمل متعبها كتير .. ولو ستر رب العالمين كان راح الجنين كمان ..

وبالفعل تم الطلاق تحت إصرار أهل جهاد .. وقعدت ببيت اهلها .. كانت نفسيتها تعبانه كتير .. وعم تسوء كل يوم اكتر من الي قبلو
الكل حواليها بس هي بعالم تاني .. ما حدا عرفان يرجع جهاد القديمة ولا حدا عارف يطلعها من الأزمة الي هي فيها ..

و بيوم من الأيام .. صحيت جهاد وش الفجر .. صلت الفجر وما اجاها نوم ..
قعدت عالتلفيزون وكان لسه الضو ما طلع ..

و وصلها رسالة على تليفونها

جهاد : اوف غريبة مين هلأ باعتلي ؟

تناولت الموبايل .. وفتحت الرسالة ..

( شو يا حلوة ؟ مبسوطة ؟ .. ما تنبسطي كتير .. لان رح شوهلك جمالك .. منتواجه .. ديري بالك على حالك )

هاد كان اول تهديد ..

وجهاد عم تخبي .. وتخاف ... وما حدا عرفان شبها ... لوقت ما وقعت الرسائل بايدين امها .. ورسائل تهديد عند الباب
اتصالات من مجهول .. كل يوم وبكل وقت كانو يتوقعو اتصال بأي لحظة
اتصال يكركب حياتهن
ويخلي جهاد تصير ترجف ...

حاولو يحاوطوها من كل جهة مشان يحموها من اصحاب هي التهديدات .. حتى هي التزمت بالبيت وما كانت تطلع ولا تفوت
متخبية بغرفتها ومرعوبة كل الوقت ..

بيوم من الأيام .. كانت إم إسلام بشغلها .. لما وصلها إتصال من جارتها بالبناية ..

ام إسلام : الو ؟

ام علاء : كيفك اختي ؟

ام إسلام : اهلين حبيبتي كيفك انتي ؟

ام علاء : انتي لازم تيجي فوراً

ام إسلام : خير شو في ؟

ام علاء : ما بينفع احكي على الهاتف .. بس ضروري تيجي فوراً .. وخلي زوجك يجي

ام إسلام: بس زوجي بشغلو وانا كمان ما فيني اطلع بهل بساطة .. خلص بشوفك المسا

ام علاء : لا انتي لازم تيجي هلأ ... وبسرعه

ام إسلام : لك شو في والله رعبتيني ؟

ام علاء : انا هلأ ببيتكن .. عند جهاد

ام إسلام : ليش شو في ؟

ام علاء : في حدا تهجم على جهاد ، ضربوها على باب البناية .. مقطعين تيابها و شعرها .. و لازم تيجي تشوفي بنتك لان انا مو عارفة اتصرف ابداً
البنت ازا بتضل هيك رح تروح من بين ايديكم .. تعي بسرعه ..

#الـــجــــزار_بقلم_مال_الشام

الجــــــــــزء الرابع

ام إسلام : ما بعرف كيف وصلت .. وما بعرف شو صارلي بس شفت بنتي بهل شكل هاد .. مين الو مصلحة يضربا هيك
لك شو بدهن منها !!!!!! البنت حامل ورح تضيع من بين ايدينا

ابو إسلام : خلص اهدي اهديييييييييي .. انا رح خبر الشرطى وهن رح يتصرفو

ام إٍسلام : هاد محمد .. ما في غيرو .. وهي ما عم تقتنع ولهلأ عم تدافع عنو .. لك شو صارلها البنت شو سحرها
خلص جننها عالخالص وعمى على عيونهاااااااااااااا !!

ابو إسلام : لا حول ولا قوة إلا بالله العلي العظيييييييييييييييم .. لا حول ولا قوة إلا بالله ..

حاولت امها تثبت للكل انو محمد زوج جهاد هو الي ورا هي التهديدات .. بس ما قدرت تمسك اي دليل او اي اثبات

لوقت ما قربت ولادة جهاد ... و بلش محمد يبعت واسطات و يعتزر عن الي صار ، وجهاد رجعت تحنلو .. وصارت تترجى الكل لترجع لعند جوزها
ازا مو مشانها مشان الطفل الي ببطنها ..

تم الصلح على فترة طويلة وبعد شروط كتيرة .. ورجعت جهاد لمحمد .. بس هالمره رجعت لحال اسوء من الي قبلو
سكر الملحمة وترك شغلو وقعد بالبيت .. وجهاد ما كانت قدرانة تعترض او تحكي شي .. تكفلو اهلها بكل مصارفيها
وكل مسؤولياتها والتزامات الولادة وتوابعها .. لوقت ما خلفت جهاد ..
وجابت ملاك صغير سمتو ( اسر ) كان ولد متل القمر .. بيشبه جهاد كتير نفس جمالها ونفس عيونها بالزبط الكل كانو فرحانين لان كتير كانو خايفين يجي الولد متضرر او غير سليم بسبب الظروف الي مرت فيها جهاد .. بس الحمدلله اجت العواقب سليمة

بعد ولادتها تفاجئت جهاد انو محمد عم يسلم شقتهن ويفرغها لان ما عم يقدر يأمن الأجار الشهري .. بدل ما يفرح البها بشي بعد هالتعب والألم الي مرت فيه .. كافئها بمصيبة جديدة
واخدها لتسكن ببيت اهلو .. بكيت كتير وترجتو كتير انو يغير رأيو عن هالسكنة .. بس ما كان في نتيجة

انتقلت جهاد للعيش ببيت اهلو لمحمد .. اخدت غرفة بالطابق التاني .. كانت الغرفة اشبة بزريبة ( حضيرة ) الحيوانات
غير مؤهلة للسكن .. وماكلها العفن

انجبرت تسكوت مشان الطفل الي صار على أيدها وبدها تربيه .. بس الغرفة ما كان ينعاش فيها ابداً خافت على ابنها من الأمراض والجراثيم وداقت فيها الدنيا ..
نزلت للبيت تحت .. وكان عندهم زريبة حيوانات فيها شوية مواشي .. وهون اجتها الفكرة انو ينظفو هالمكان هاد ويعقموه ويعملوه بيتهن الصغير
ويسكروه بباب لان كان مكشوف على الشارع مباشرة

بعد اقناع ومحاولات .. وافق محمد .. وبالفعل نزلو وعزلو الزريبة ونظفوها و حاولو يخلوها مؤهلة للسكن .. ركبو الباب الخارجي
وقبل ما يستقرو بيومين .. صحيت جهاد الصبح .. ونزلت لتشق على بيتها المستقبلي المتواضع الي كانت فرحانه فيه ..
لتلاقي الباب مكسور .. اخوان محمد .. خمس شباب كل واحد منهن متزوج والو بيتو الخاص .. بس اجو على بيت اهلهن وشافو انو محمد عم يجهز الحضيرة لتصير بيت الو كسرو الباب وقالولهن ازا بدهن يعيشو بهل مكان يعيشو بس ممنوع ينحط باب للشارع
رجعت انكسرت جهاد وقعدت بغرفتها الي كانت رح تخنقها .. خبت الغصة بقلبها.. وقبلت بالأمر الواقع لان ما ضل بأيدها شي تعملو

حاولت اسماء اختها لجهاد تدبرلها شغل عندها بالكويت .. مع انو محمد ما معو اي مؤهل علمي
بس حاولت كل طاقتها مشان تاخدو لعندها بلكي بتنحل مشكلة اختها
وبالفعل بصعوبة كبيرة قدرت تدبرلو شغل .. بس محمد رفض !!

كان رافض يترك جهاد تعيش .. ومصر يخليها بهل وضع الي ما بينحمل وما في اي مخلوق بيرضى فيه ..

و للمرة التانية .. طلعت جهاد حامل ..

والهمرة جابت نــيــــــر .. ابنها التاني .. ومتل المره الأولى .. كانت ولادتها ومسؤوليتها كلها على اهلها ..

و زوجها برا كل هي الحسابات ورافع ايدو تماماً عن الموضوع .. ومكتفي بالفرجة من بعيد ..

تعلقت ام إسلام بالأولاد كتير .. لان ولدو على ايديها وهي كانت مسؤولية عن كل شي بيتعلق فيهن ..

انجبرو ينحطو كلهن تحت الأمر الواقع ومرارة الحياة .. انو جهاد .. مدللة الكل وصغيرة العيلة .. صارت تحت رحمة جبروت محمد
ومزاجو المتقلب ..

كان الكل يحاول يتقرب منو ليعرفو يتفاهمو معو .. بس هو كان قاطع كل سبل التواصل ..

وجهاد كان عندها قدرة عجيبة بتحمل الألم والأذى .. مو مشانها ولا مشان الحب المجنون الي حست فيه لفترة قصيرة

بس مشان ولادها التنين الي ما بدها تخليهن يعيشو بدون أب ..

كــبر أسر وصار بعمر أربع سنوات ... وصار وقت يتسجل بحضانة مشان يتجهز لدخول المدرسة لاحقاً

ام إسلام : انا بدي حطو بمدرسة انترنشونال .. يؤبرني بحسو زكي كتير اكبر من بعمرو بمية مره

جهاد : بس يا ماما هي كلها مصاري غالية وانتي عارفة الوضع

ام إسلام : بنتي .. ولادك اتركيهن الي .. انا مسؤولة عن كل شي بيتعلق فيهن .. و أسر لازم يتسجل بأحسن مدرسة بالبلد
وغير هيك ما برضى.. مو هيك تيته ؟

أسر : اممممممم

ام إسلام : هههههه تؤبرنييييييي هات بوسة ..

جهاد : ماما ..

ام إسلام : ييييييي شو بتحبي تنقي .. شو ؟

جهاد : انتي بتعرفي انو بهي المدارس ما بقبلو اي حدا .. و لازم يكون المؤهل العلمي للوالدين على اقل تقدير جامعي
وانتي عارفه انو محمد مو دارس .. لهيك ما رح يقبلو يسر

ام إسلام : اوف كيف راح هالموضوع عن بالي !!

جهاد : شفتي .. ما رح تزبط .. حظي المعتر وبعرفو

ام إسلام : ما تحكي هيك خلص امك وراكي و رح تزبط الأمور

بلشت ام إسلام تقدم أوراق أسر على كل المدارس .. وكل يوم والتاني يبلغوها بالرفض .. بعد تعب طويل ..
حاولت توصل لحدا من معارفها و يتواسطولها لتدخل أسر بأرقى وأفضل المدارس .. وبالفعل قبلوه

قدرت ام إسلام تأمن لحفيدها فرصة ليمتحنوه ويحددو مستواه إزا بقبلو يضموه للحضانه و كان أسر زكي وعندو مؤهلات خلتو يتجاوز أمتحان الحضانة
فرحت جهاد كتير رغم انو محمد حذرها من هالموضوع وكان رافضو بشكل قطعي

يمكن نوع من عقدة النقص انو صعب عليه ابنو يلتحق بحضانة أميركية ضخمة ويتلقى هالتعليم والعناية وهو محصلو الدراسي صــفر

بس جهاد هالمرة رفضت تساير .. لأن كان صعب جداً تتنازل عن مستقبل اولادها مشان رضى محمد ..

وبالفعل تسجل أسر بالحضانة متل ما كان مخطط .. وبلش يداوم يومياً ..

هيك .. لوقت قرب تاريخ ( عيد الأم ) الي كان الو أهمية خاصة عند كل عيلة جهاد

وكان يوم مميز .. الو اجواء معتادة بكل سنه ..

بس هالمرة كان عيد .. غير كل عيد ..

#الــجـــزار_بقلم_مال_الشام

الجزء الــــــخــــــــامس

بعيد الأم هاد تحديداً كانت جهاد مكتئبة .. وامها عم تحضر لجمعة العيلة ببيت والدتها لأم إسلام .. يعني ستها لجهاد .. و كانت عم تزين البيت

ام إسلام : جهاد بنتي قومي ساعديني حاجه قاعده وحاطه ايدك على خدك .. عملت كل الأكلات وكل الأصناف
وطلعت طقم صحون وكاسات جديد
وغيرت شرشف الطاولة .. هاد الشرشف طرزتو على ايدي شفتيه ؟

جهاد : ايه امي شفتو كتير حلو ؟

ام إسلام : شبك بنتي ؟ ليش هيك زعلانه ؟

جهاد : ماما .. قولك محمد هالعيد بيتزكرني بشي ؟ ولا متل كل مرة رح يكسر بخاطري ؟

ام إسلام : لا اكيد رح يتزكرك .. هو مو جاي اليوم المسا ؟

جهاد : ايه اكدت عليه انو يجي .. وقال رح يجي عالأكيد

ام إسلام : معناها بكون جايبلك هديتك معو ..

جهاد بفرح : معقول ؟

ام إسلام : لك ايييييييه

جهاد : يييييي والله لجن من الفرحة ازا بيعملها .. هههه
يلا قليلي شو كان بدك ساعدك ؟

ام إسلام : هههه ايه هيك ها .. وردي وافرحي .. قومي عالمطبخ اعملي تبولة .. انا شوي وبلحقك

جهاد : ايه يلا فوراً ..

فاتت جهاد عالمطبخ .. وام إسلام فاتت على عرفتها وسكرت الباب وراها ..
فتحت خزانتها و طلعت صندوق الدهب تبعها ..
اختارت احلى خاتم عندها .. وتأملتو منيح

ام إسلام : رح تحبو جهاد كتير .. يارب تفرح وما ينكسر خاطرها بهاد اليوم

طلعت وخبت الخاتم بدرج الغرفة ..

وقبل موعد جمعة الكل بنص ساعه .. نادت حفيدها واعطتو الخاتم .. وفهمتو كيف يعطيه لأمو وكيف يقلها كل عام وانتي بخير يا ماما

ام إسلام كانت واثقة انو محمد رح يكسر بخاطر بنتها بهاد اليوم .. لهيك فكرت انو هيك رح تعوضها شوي وما رح تخليها تبكي ..

بلش جرس البيت يرن .. والأقارب يوصلو .. والكل يجتمعو .. كل افراد عيلة جهاد

وكان آخر الواصلين هو محمد .. فات بهيئة غير مرتبة وكان عاقد حواجبو و مكشر .. و واضح انو الوضع مو عاجبو

ضربت منو جهاد وشبكت ايدها بأيدو ..

كانت لابسه احلى فستان بعتتلها ياه اختها من الكويت

و حاسة حالها رح تسلب عقلو لمحمد .. قربت منو وهمستلو : اشتئتلك

محمد : بدنا نطول هون ؟

جهاد : ليش مستعجل هلأ وصلنا .. بعدين انت بتعرف انو عيد الام مهم كتير لعيلتي وكل سنه منجتمع فيه
افردها بئى حبيبي

محمد : طيب ..

جهاد : تعا طعميك من طبخي .. انا طبخت الاكلات الي بتحبهن .. تعال يلا

قعدو الكل .. وكانو يضحكو ويمزحو ..

واحد يحكي نكت .. واحد يتغزل بمرتو .. و جهاد عم تحاول تحكي مع محمد وهو روحو براس مناخيرو وكل الوقت عم يتطلع بالساعه
كانت ام إسلام ناطره تشوف محمد عم يعطي شي لجهاد .. بس قبت الساعه تصير 10 .. وكل واحد جايب هدية لامو او لاختو طلعها
خلصو اكل .. وبلشت الناس تروح ..
قربت ام اسلام من حفيدها اسر

ام إسلام : اسر تيته هلأ روح وقف بالنص وطلع الخاتم .. وقول لماما كل عام وانتي بخير

اسر : حاضر ..

ضرب اسر و وقف بالنص متل الغزال .. كانت طفولتو وبراءتو بياخدو العئل .. وطلع الخاتم ومسكو بين ايديه الصغار

أسر : كــــــــــــــــل عام وانتي بخييييييييير يا مامااااااااااا

جهاد : هاااااااد الييييييييييييييي ؟؟؟؟؟؟؟؟؟

ركضت على ابنها وغمرتو وشالتو عن الأرض .. هي اول مره بتحس بهل احساس .. الدنيا مو واسعيتها ... وفرحتها مو معطيتا لحدا ...

ما لحقت تكمل لحظات الفرح الي عايشيتهن .. نزلت اسر عالأرض و عيونها عم يدمعو

جهاد : هاد من بابا صح ؟

تلبكت ام إسلام كتير و محمد وقف من مطرحو وكان شادد على قبضة ايدو وعروقو بارزين

اسر : لا .. هاد من تيته ..

جهاد : الخاتم من تيته ؟

اسر : ايه .. هي التلي اعطيكي ياه

هجم محمد على ابنو .. وشلع الخاتم من ايدو .. ورماه بالأرض وهو عم يصرخ

محمد : انتو بدكن تحسسوني اني عاجز مو ؟؟؟؟؟؟ بدكن تقولولي انو انا ما بقدر جيب هدايا متلكن صح ؟
جايبيني لهون مشان تذلوني مو ؟ بس فشرتو .. ما حزرتو بنوووووووووووب

ام إسلام : يا ابني انا ..

وقبل ما يخلي حماتو تكمل حكيها .. شد جهاد من ايدها بقوة

محمد : يلا اطلعو من هون .. يلااا

جهاد : اااخ ايييدي شو صااارلك محمد

محمد : انا عم قول امشي قدامي

جهاد : نير بغرفت امي نايم بدي فوت جيبو

محمد : انا رح اخود أسر وانزل .. بسرعه ثواني وبتلحقيني

جهاد : حاضر حاااضرررررررر

حمل الولد بين ايديه ونزل فيه وكان اسر يبكي

فاتت جهاد بسرعه على الغرفة لجوا وهي عم تبكي وشالت ابنها

ام إسلام : بنتي انا والله ما كان قصدي

مسحت جهاد دموعها : بعرف امي امانة ما تزعلي مني

صارو التنتين يبكو وكل وحده حاسة بالذنب وحاسة انها زعلت التانية
وكل وحده تعتذر بخجل ..

ام إسلام : امانه خليكي نامي عندنا

جهاد : لا انا بدي روح عالبيت .. في كم شغلة لازم خلصهن .. خلص مره تانيه

ام إسلام : طيب لما توصلي طمنيني ايه ؟

جهاد : ان شاء الله .. يلا اعتزريلي من ابي مشان الي صار

ام إسلام : ولا يهمك حبيبتي .. صرنا نعرف طبع جوزك مو مشكلة

جهاد : ماشي امي .. سلام ..

شالت ابنها وضمتو لحضنها عن البرد ونزلت ..

ضلت امها كل الليل ناطره اتصالها .. بس ما دئتلها

وصلت جهاد هي وولادها على البيت .. وفاتت رجعت حاولت تنيم ابنها نير الي كان عمرو سنه ونص ..
ونيمت أسر .. كان محمد معصب بطريقه مو طبيعية

حاولت جهاد تطلع الموبايل لتحكي مع امها بس كانت خايفه ينتبه محمد ويعصب اكتر .. لهيك غضت نظر عن الموضوع وقررت الصبح انو
تطمن امها .. وبلشت تحاول تحكي مع محمد لتراضيه وينسو الي صار ..

بس محمد ما رضي يحكي معها ولا حرف .. ونام مباشرة ... وتركها وهي رح تجن من هالحياة المره الي عم تعيشها

ما عم تعرف ليش هيك عم يعاملها ولا هيك بيتصرف .. لأيمت رح تضل عايشة بهل طريقه ..

طلع الضو و ام إسلام كانت خايفه تدق لبنتها ...
بعد ما جهاد صحيت ونزلت ابنها أسر على الحضانه .. دقت لأمها فوراً

جهاد : صباح الخير أمي

ام إسلام : اهلين حبيبتي .. ليش ما دئيتيلي امبارح ؟

جهاد : خليها لالله يا

#قصة_واقعية
الجزء الــــــخــــــــامس + السادس + الخاتمة

بعيد الأم هاد تحديداً كانت جهاد مكتئبة .. وامها عم تحضر لجمعة العيلة ببيت والدتها لأم إسلام .. يعني ستها لجهاد .. و كانت عم تزين البيت

ام إسلام : جهاد بنتي قومي ساعديني حاجه قاعده وحاطه ايدك على خدك .. عملت كل الأكلات وكل الأصناف
وطلعت طقم صحون وكاسات جديد
وغيرت شرشف الطاولة .. هاد الشرشف طرزتو على ايدي شفتيه ؟

جهاد : ايه امي شفتو كتير حلو ؟

ام إسلام : شبك بنتي ؟ ليش هيك زعلانه ؟

جهاد : ماما .. قولك محمد هالعيد بيتزكرني بشي ؟ ولا متل كل مرة رح يكسر بخاطري ؟

ام إسلام : لا اكيد رح يتزكرك .. هو مو جاي اليوم المسا ؟

جهاد : ايه اكدت عليه انو يجي .. وقال رح يجي عالأكيد

ام إسلام : معناها بكون جايبلك هديتك معو ..

جهاد بفرح : معقول ؟

ام إسلام : لك ايييييييه

جهاد : يييييي والله لجن من الفرحة ازا بيعملها .. هههه
يلا قليلي شو كان بدك ساعدك ؟

ام إسلام : هههه ايه هيك ها .. وردي وافرحي .. قومي عالمطبخ اعملي تبولة .. انا شوي وبلحقك

جهاد : ايه يلا فوراً ..

فاتت جهاد عالمطبخ .. وام إسلام فاتت على عرفتها وسكرت الباب وراها ..
فتحت خزانتها و طلعت صندوق الدهب تبعها ..
اختارت احلى خاتم عندها .. وتأملتو منيح

ام إسلام : رح تحبو جهاد كتير .. يارب تفرح وما ينكسر خاطرها بهاد اليوم

طلعت وخبت الخاتم بدرج الغرفة ..

وقبل موعد جمعة الكل بنص ساعه .. نادت حفيدها واعطتو الخاتم .. وفهمتو كيف يعطيه لأمو وكيف يقلها كل عام وانتي بخير يا ماما

ام إسلام كانت واثقة انو محمد رح يكسر بخاطر بنتها بهاد اليوم .. لهيك فكرت انو هيك رح تعوضها شوي وما رح تخليها تبكي ..

بلش جرس البيت يرن .. والأقارب يوصلو .. والكل يجتمعو .. كل افراد عيلة جهاد

وكان آخر الواصلين هو محمد .. فات بهيئة غير مرتبة وكان عاقد حواجبو و مكشر .. و واضح انو الوضع مو عاجبو

ضربت منو جهاد وشبكت ايدها بأيدو ..

كانت لابسه احلى فستان بعتتلها ياه اختها من الكويت

و حاسة حالها رح تسلب عقلو لمحمد .. قربت منو وهمستلو : اشتئتلك

محمد : بدنا نطول هون ؟

جهاد : ليش مستعجل هلأ وصلنا .. بعدين انت بتعرف انو عيد الام مهم كتير لعيلتي وكل سنه منجتمع فيه
افردها بئى حبيبي

محمد : طيب ..

جهاد : تعا طعميك من طبخي .. انا طبخت الاكلات الي بتحبهن .. تعال يلا

قعدو الكل .. وكانو يضحكو ويمزحو ..

واحد يحكي نكت .. واحد يتغزل بمرتو .. و جهاد عم تحاول تحكي مع محمد وهو روحو براس مناخيرو وكل الوقت عم يتطلع بالساعه
كانت ام إسلام ناطره تشوف محمد عم يعطي شي لجهاد .. بس قبت الساعه تصير 10 .. وكل واحد جايب هدية لامو او لاختو طلعها
خلصو اكل .. وبلشت الناس تروح ..
قربت ام اسلام من حفيدها اسر

ام إسلام : اسر تيته هلأ روح وقف بالنص وطلع الخاتم .. وقول لماما كل عام وانتي بخير

اسر : حاضر ..

ضرب اسر و وقف بالنص متل الغزال .. كانت طفولتو وبراءتو بياخدو العئل .. وطلع الخاتم ومسكو بين ايديه الصغار

أسر : كــــــــــــــــل عام وانتي بخييييييييير يا مامااااااااااا

جهاد : هاااااااد الييييييييييييييي ؟؟؟؟؟؟؟؟؟

ركضت على ابنها وغمرتو وشالتو عن الأرض .. هي اول مره بتحس بهل احساس .. الدنيا مو واسعيتها ... وفرحتها مو معطيتا لحدا ...

ما لحقت تكمل لحظات الفرح الي عايشيتهن .. نزلت اسر عالأرض و عيونها عم يدمعو

جهاد : هاد من بابا صح ؟

تلبكت ام إسلام كتير و محمد وقف من مطرحو وكان شادد على قبضة ايدو وعروقو بارزين

اسر : لا .. هاد من تيته ..

جهاد : الخاتم من تيته ؟

اسر : ايه .. هي التلي اعطيكي ياه

هجم محمد على ابنو .. وشلع الخاتم من ايدو .. ورماه بالأرض وهو عم يصرخ

محمد : انتو بدكن تحسسوني اني عاجز مو ؟؟؟؟؟؟ بدكن تقولولي انو انا ما بقدر جيب هدايا متلكن صح ؟
جايبيني لهون مشان تذلوني مو ؟ بس فشرتو .. ما حزرتو بنوووووووووووب

ام إسلام : يا ابني انا ..

وقبل ما يخلي حماتو تكمل حكيها .. شد جهاد من ايدها بقوة

محمد : يلا اطلعو من هون .. يلااا

جهاد : اااخ ايييدي شو صااارلك محمد

محمد : انا عم قول امشي قدامي

جهاد : نير بغرفت امي نايم بدي فوت جيبو

محمد : انا رح اخود أسر وانزل .. بسرعه ثواني وبتلحقيني

جهاد : حاضر حاااضرررررررر

حمل الولد بين ايديه ونزل فيه وكان اسر يبكي

فاتت جهاد بسرعه على الغرفة لجوا وهي عم تبكي وشالت ابنها

ام إسلام : بنتي انا والله ما كان قصدي

مسحت جهاد دموعها : بعرف امي امانة ما تزعلي مني

صارو التنتين يبكو وكل وحده حاسة بالذنب وحاسة انها زعلت التانية
وكل وحده تعتذر بخجل ..

ام إسلام : امانه خليكي نامي عندنا

جهاد : لا انا بدي روح عالبيت .. في كم شغلة لازم خلصهن .. خلص مره تانيه

ام إسلام : طيب لما توصلي طمنيني ايه ؟

جهاد : ان شاء الله .. يلا اعتزريلي من ابي مشان الي صار

ام إسلام : ولا يهمك حبيبتي .. صرنا نعرف طبع جوزك مو مشكلة

جهاد : ماشي امي .. سلام ..

شالت ابنها وضمتو لحضنها عن البرد ونزلت ..

ضلت امها كل الليل ناطره اتصالها .. بس ما دئتلها

وصلت جهاد هي وولادها على البيت .. وفاتت رجعت حاولت تنيم ابنها نير الي كان عمرو سنه ونص ..
ونيمت أسر .. كان محمد معصب بطريقه مو طبيعية

حاولت جهاد تطلع الموبايل لتحكي مع امها بس كانت خايفه ينتبه محمد ويعصب اكتر .. لهيك غضت نظر عن الموضوع وقررت الصبح انو
تطمن امها .. وبلشت تحاول تحكي مع محمد لتراضيه وينسو الي صار ..

بس محمد ما رضي يحكي معها ولا حرف .. ونام مباشرة ... وتركها وهي رح تجن من هالحياة المره الي عم تعيشها

ما عم تعرف ليش هيك عم يعاملها ولا هيك بيتصرف .. لأيمت رح تضل عايشة بهل طريقه ..

طلع الضو و ام إسلام كانت خايفه تدق لبنتها ...
بعد ما جهاد صحيت ونزلت ابنها أسر على الحضانه .. دقت لأمها فوراً

جهاد : صباح الخير أمي

ام إسلام : اهلين حبيبتي .. ليش ما دئيتيلي امبارح ؟

جهاد : خليها لالله يامو

ام إسلام : الله يفرجها عليكي يا بنتي ..لأيش هيك موطية صوتك من وين عم تحكي ؟

جهاد : امي بدي قلك شغلة

ام إسلام : شو في ؟

جهاد : انا خايفه

ام إسلام : خايفة ؟ .. من شو ؟

جهاد : هلأ محمد قاعد برا

ام إسلام : اي ؟

جهاد : وما بعرف شبو من امبارح .. وين ما بروح و وين ما بجي .. بيلحقني
هلأ عم احكيكي مشان ما ينشغل بالك يا دوب قدرت انفد منو .. بس كتير خايفه ما بعرف شبو

ام إسلام : يوه .. يعني شو بدو يكون ..

جهاد : تخيلي انو صحى نير .. ونزلو تحت لعند ستو .. واجا وصار يمشي وراي وين ما بروح

ام إسلام : ايووووووه .. معناها بدو يراضيكي يا جدبة

جهاد : معقول ؟

ام إسلام : ايه حبيبتي .. واضحة .. ونزل الولد مشان تاخدو راحتكن

جهاد : هههه ان شاء الله ..

ام إسلام : يلا روحي قبل ما يفقدلك

جهاد : ايه ماشي امي يلا بدك شي

ام إسلام : جهاد حبيبتي

جهاد : ايه امي ؟

ام إسلام : لا إله إلا الله امي

جهاد : محمد رسول الله .. الله معك ماما

#الــجـــزار_بقلم_مال_الشام

الجزء السادس

طلعت جهاد بعد ما ارتاحت شوي وقت حكيت مع امها .. حاولت تتجنب محمد وما تحتك فيه وناطرتو ليجي يصالحها
بس كان ساكت بشكل غريب
وعم يتطلع فيها نظرات مو مفهومة ، تفتلت بالبيت و ضبضبتو نظفت كل شي .. وكانت كل ما يصحلها تفوت تدئ على امها
تحكي معا شوي وترجع تشتغل شغلها

بس خلصت فاتت تحممت .. ولبست فستان جديد كانت امها جايبتلها ياه ..

انتبهت عالوقت انو تقريباً رح يصير الظهر .. وقامت مستعجلة لتجهز الأكل قبل ما يرجع أسر من الحضانة ..

كانت واقفه ورا الغاز .. وعم تحضر الأكل .. .. عم تسلئ اللحمة .. وحاطة طنجرة فيها لوبيا ..
ومقطعة بندورة وحاطيتها بالخلاط ..

ما حست الا محمد قرب منها كتير .. من ورا ضهرها

جهاد : شبك ؟

ضل ساكت وما رد عليها .. وهي ضلت عم تحرك الأكل عالنار .. حط ايديه على كتافها .. وبلش يقربهن بحركة خفيفة لرقبتها ..

بلعت جهاد ريقها و بلشت تتعرق وحست بخوف

جهاد : محمد شو في ؟

بلش يضغط على رقبتها بقوة .. و فهمت جهاد انو عم يحاول يخنقها ..
صارت تصرخ وتحاول تفلت من ايدو و هو ما يكان يرد عليها بأي كلمة .. كأنو شيطان أخرس

سحبت طنجرة الأكل بأيدها و وقعتها عالأرض بأتجاهو .. وهيك قدرت تفلت منو .. ركضت على غرفة النوم وهي عم تصرخ
مشان حدا يجي يخلصها منو ..

سمعها رجال قاعد تحت ودق على باب البيت .. وطلعتلو ام محمد وقالتلو انو عادي وهن دايماً اصواتهن طالعه

وضلت جهاد لحالها بين ايدين .. الجزار ..

جهاد : محمد الله يوفئك طول بالك .. مشان الله تهدا .. شو في شو في شو عم يصيرررررررر

كانت هي عم ترجع لورا وهو عم يقرب منها ..

ضلت ترجع لورا .. ضربت رجلها بالتخت .. قعدت وهي عم ترجف بعد ما فقدت الأمل حدا ينقذها

جهاد : كل شي بصير متل ما بدك بس لا تعمل فيني شي .. خلص بس اهدى محمد .. محمد .. محمممممممممممممممممددددددددددد

قرب منها ولفها على الجهة التانية .. خلا وشها لفرشة التخت .. وثبت ايدها ورا ضهرها وحط ركبتو على ضهرها ليمنعها من الحركة ..

وضل عم يخنقها وهي عم تحاول تقاومو بكل قوتها ... بكل ذرة فيها بدها الحياة مو مشانها

مشان ولادها .. كانت عم تقاوم .. عم تصرخ .. عم تحلم بأخر لحظة حدا ينقذها من بين ايديـــــــه ..

ضل مثبتها .. لوقت ما قلت حركتها بالتدريج .. وبلشت تهدا بين ايــديه .. وانقطع نفسها تماماً

بس تأكد انها ماتت وما ضل فيها روح .. قلبها على وشها .. بعد شعرها عن عيونها ..

كان وشها احمر كتير .. تعبان كتير ..

تعبان من أيام مره عاشتها ..

تعبان من حــب ضيعها ..

كانت ملامحها عم تستنجد .. كأنها بس بدها تودع امها .. بدها تبوس ولادها .. بدها تطعميهن قبل ما تموت ..

رفعها عالتخت .. و مددها بشكل طبيعي كأنها نايمة ..

نكت تيابو .. وفتح باب البيت ونزل لعند امو ..

ام محمد : ولك شو صاير عندكن فوق مرتك فضحتنا صوتها عبى الحارة

محمد : ما في شي امي .. بس اعطيني نير وينو

ام محمد : عم يلعب بالمطبخ فوت خدو

فات محمد عالمطبخ و اخد الولد ..

محمد : يلا بوس تيته

قرب نير وخلاه يبوس ستو .. وطلعو معو لفوق ..

دور بالبيت على شي يخنق فيه ابنو .. ما كان بدو حدا يحكي لولادو من بعدو انو ابوهم قاتــل

قرر يقتلهم مشان ما حدا يخليهم يكرهوه بس يكبرو ويعرفو انو قتل امهم ..

بسلك الكهربا .. لفو على رقبة نير .. طفل بعمر السنة ونص..

كانت مقاومتو اقل من مقاومة امو .. استسلم بسرعه

و فارق الحياة بسرعه كبيرة ..

بهاد الوقت كانت ام إسلام عم تتصل على بنتها وما عم ترد عليها .. ومتل ما بقولو قلب الأم بعمرو ما خاب

شعلت جواتها نار .. تركت شغلها واتصلت بجوزها مشان يشوفلها بنتها بعد ما يئسو انو جهاد تردو عليها ..

اتصلو على محمد ورد عليهن

ابو إسلام : مرحبا ابني

محمد : اهلين

ابو اسلام : كيفك ؟ وكيفها جهاد ؟

محمد : والله تمام الحمدلله .. ة

ابو إسلام : عم نتصل على جهاد وما عم ترد علينا ابداً

محمد : اي تخانقنا وكسرتلها الموبايل

ابو إسلام : طيب اعطينا نحكي معها لان امها بدها تطمن عليها

محمد : _ _ _

ابو إسلام : الو ؟ .. محمد ؟ .. يا محمد ؟

سكر محمد الخط ..

رجعو اتصلو عليه وما رد عليهن ..

ام إسلام : في شي غلط .. انا قلبي متل النار .. محمد كان دايماً يهدد جهاد .. هي ما ضلت معو لهلأ غير لانو كان يبعتلها تهديدات ويخوفها
خايفه يكون عمل فيها شي

طلعت امها فوراً على مركز الشرطة .. احساسها كان قوي انو بنتها صايرلها شي...قررت تحط حد لمعانات بنتها
بس للاسف كانت متأخرة

وصلت للمركز وقدمت بلاغ ضد محمد انو دايماً بضرب جهاد وكل ما تقرر تتركو بيهددها انو يئذيلها ولادها او حدا من عيلتها
وقالتلهن انو من الصبح ما بتعرف شي عن جهاد وما عم يخليها تحكي معهن ..

بس الشرطة ما ساعدتها بشي وحكولها انو هي مشاكل عائلية والشرطى ما بتدخل بهيكـ امور ..

بهاد الوقت محمد كان عم يستنى ابنو أسر يرجع من الحضانة ..

كانت المشرفة على الباص ما بتسلم الأطفال إلا لأهلهن .. اتصلت كتير على جهاد وما حدا رد

طلعت ام إسلام على بيت اهلها .. واخدت اخوتها معها مشان تروح تشق على بنتها وتعرف شو صاير معها ..

وكانت لسه مشرفة الباص عم تتصل بجهاد
اخر شي اتصلت على محمد ورد عليها وقلها انو جهاد مريضه وهو رح ياخود أسر ..

وبالفعل نزل واستلم اسر منها .. و فوتو لعند ستو خلاه يبوسها .. وطلعو على البيت ..

حط سلك الكهربا ورا ضهرو .. وقعد أسر بحضنو

أسر : وينها ماما ؟

محمد : هلأ رح اخدك لعندها حبيبي

أسر : ليش وين راحت ؟

محمد : اسر .. عيد وراي شو رح قول .. مشان جيبلك شي حلو

أسر : ماشي يا بابا

محمد : قول معي ..
أشهد ان لا إله إلا الله .. واشهد ان محمد رسول الله

أسر باستغراب : يييييي هي طويله !! ما حفظتها ههههههه عيدها ..

طلع محمد السلك ولفو حوالين رقبة أسر ..

محمد : أشهد أن لا إله إلا الله وأشهد ان محمد عبده ورسوله .. قول يلا

بلش اسر يخاف لما حس في شي عم يلف حوالين رقبتو

أسر : أشهد .. ان .. لا .. إله ..

بلش يبكي وتنزل دموعو وسكت

أسر : بابا .. بابا شيل هاد عن رقبتي .. عم يوجعني ...

محمد : إلا الله .. وان محمد رسول الله

أسر : إلا ... إلا ..
إلا الله ..
وان محمد ..

بابا نسيت ؟

محمد : رسول الله ..

أسر : رســــول .. الله
#يتبع

#الــجــزار_بقلم_مال_الشام

الــخاتمة

خـــنق ابنو الأخير ... بدم برد .. وبسرعه كبيرة ... وحملو وحطو عالتخت جنب امو واخوه ..
نزل من البيت .. و كـــان رايح لعند أم إسلام .. امها لجهاد ... ليكمل جريمتو البشعه

اتصل محمد بأبو جهاد وسألو ازا حماتو موجوده بالبيت او لأ ... كان واقف عند البيت وبأيدو سكينة كبيرة

وام جهاد رايحه هي واخوها وخالها .. لعند بنتها .. وصلت متأخرة .. متأخرة كتير ..

____________________________________________________

( حواري مع ام جهاد )

- ليش قتلهن ؟

هو كان خايف تتركو .. كان متوقع بكل لحظة انها تتركو .. كان يهددها مشان تضل معو .. وبيعرف انو بيوم جهاد رح توقف بوشو
وما تعود تخاف من تهديداتو .. احساسو بالنقص .. خلاه يتحول لحيوان مجرد من اي احساس

- وولادو ليش قتلهن ؟

مشان ما يكبرو ويعرفو انو ابوهن قاتل .. مشان ما يعرفو انو ابوهن قتل امهن ..

- هيك ؟ بهل بساطة ؟ هاد مريض نفسي

لا لا ابداً .. ابداً .. كل الفحوصات اثبتت انو سليم تماماً .. وما بيتعاطى اي نوع من المخدارات

- جهاد حلوة كتير .. كتير حلوة

لو سمحتي ما تنشري صورها .. بس هاد صورة قبرها

- ليش ما منعتوها ؟

ما قدرت .. حاولت والله بس ما قدرت .. هي كانت مصره

- ربي يجعلها من اهل الجنة من غير حساب ولا سابق عذاب

نحنا عملنالها مسجد .. و 16عمره عنها ..

- ربي يلهمك الصبر والسلوان

انا اشتقت كتير .. شتقتلها وشتقت لأسر ونير .. وبدي بس تدعولي .. وبدي تدعو لجهاد بالرحمة والمغفرة

- بدك تزيدي اي اضافات قبل ما بلش كتابة القصة ؟

لا ما في اي اضافات .. بس بدي ما تنسونا من دعواتكم .. انا تعبانه كتير .. اشتقت لبنتي .. اشتقتلها كتير ..

#الـــــــــــنهــــــــــــاي